اقتوبە وبلىسىنداعى مۇنايشىلاردىڭ داۋى شەشىلىپ، ەندى ماڭعىستاۋ وبلىسىنىڭ مۇنايشىلارى ەڭبەكاقىنى كوتەرۋدى تالاپ ەتىپ وتىر، دەپ حابارلايدى "ادىرنا" ۇلتتىق پورتالى Sputnik.kz سايتىنا سىلتەمە جاساپ.
بۇعان دەيىن اقتوبە وبلىسىنداعى تەمىر اۋدانىندا جۇمىس ىستەپ جۇرگەن مۇنايشىلار ەرەۋىلگە شىققان بولاتىن. 25 قاڭتاردا كوكجيدە كەن ورنىندا "كمك مۇنايدىڭ" 100-گە جۋىق جۇمىسشىسى باس كوتەرسە، ءتورت كۇننەن كەيىن باشەنكولدە "امك مۇنايدىڭ" 62 مۇنايشىسى كوشەگە شىقتى. بارلىعى جالاقىنى كوتەرۋدى تالاپ ەتتى. سەبەبى ورتاشا جالاقى 60-150 مىڭ تەڭگەدەن اسپايدى. مۇنايشىلار پرەزيدەنتكە بەينەۇندەۋ دە جاريالادى.
وبلىستىق ەڭبەك ينسپەكتسياسىنىڭ باسشىسى سالامات امانباەۆتىڭ ايتۋىنشا، "كمك مۇنايدا" جۇمىسشىلاردىڭ جالاقىسىن 20 پروتسەنتكە كوتەرۋگە شەشىم قابىلداندى. وعان قوسا، تاريفتىك رازريادتاردى كوتەرەدى. وسىلايشا، ەڭبەك داۋى شەشىلىپ، مۇنايشىلار ءوز جۇمىسىنا كىرىستى.
"ال "امك مۇناي" كومپانياسىندا ءاربىر جۇمىسشىنىڭ جالاقىسىنا 40 مىڭ تەڭگە قوسىپ بەرەدى. ناۋرىز مەيرامىنا قاراي تاعى جالاقىنىڭ 50 پروتسەنتىن سىياقى رەتىندە الادى. ءۇش ايدىڭ ىشىندە جالاقىنىڭ كولەمى قارالىپ، جاڭا كەلىسىمشارتتا كورسەتىلەدى", - دەيدى امانباەۆ.
ايتا كەتەيىك،"كمك مۇناي" اق رەسمي سايتىندا كومپانيانىڭ ەكى ءىرى اكتسيونەرى كورسەتىلگەن. ولار - "سنپس-اقتوبەمۇنايگاز" اق جانە Yukon Energy Holding S.A. كومپانيا پرەزيدەنتى - Wang Jinbao (ۆان تسزينباو). ال "امك مۇناي" كومپانياسى كارىس كومپانياسىنا قىزمەت كورسەتەدى.
اقتوبە وبلىسىندا مۇنايشىلار ماسەلەسى شەشىلگەننەن كەيىن ماڭعىستاۋدىڭ مۇنايشىلارى كوشەگە شىقتى. جاڭاوزەندە "مۇنايسپەتسسناب كومپاني" جشس جۇمىسشىلارى جالاقىنى كوتەرۋدى جانە جۇمىس ءتارتىبىن رەتتەۋدى تالاپ ەتىپ وتىر. 1 اقپاندا اكتسياعا ونداعان ادام جينالدى. ولارمەن كومپانيانىڭ باس ديرەكتورى ەرلان سابيەۆ كەزدەستى.
