بەلگىلى بوكسشى باحتيار ارتاەۆ ارىپتەسى، باۋىرى قۋات ءحاميتتى قولداپ، ارنايى ۆيدەوۇندەۋ جاسادى دەپ حابارلايدى «ادىرنا» ۇلتتىق پورتالى سپورتشىنىڭ ينستاگرام پاراقشاسىنا سىلتەمە جاساپ.
«كەشەدەن بەرى ينتەرنەت جەلىسىن شۋلاتىپ جاتقان اقپارات - قۋات حاميتوۆتىڭ التى ايعا سوتتالعانى. وسىعان بايلانىستى قۋات باۋىرىممەن حابارلاستىم. ءمان-ءجايدى ءبىلدىم. راسىندا التى ايعا ءۇي قاماعىنا الىنعان ەكەن. وسى تۇرعىدا مەنىڭ ازاماتتىق پوزيتسيام: ول مەنىڭ باۋىرىم، سپورتشى بولعاندىقتان مەن بۇل جاعدايدا ۇندەمەي قالۋىم مۇمكىن ەمەس. ءبىز دەموكراتيالىق جانە زايىرلى مەملەكەت بولعاننان كەيىن ءوزىنىڭ ويىن اشىق جەتكىزە ءبىلۋ كەرەك. ەگەر ەلىم دەگەن ءار ازاماتتارىمىزدى قاماي بەرسەك، ەلىمىزدىڭ بولاشاعى نە بولماق؟ سوندىقتان مەن بۇل شەشىم دۇرىس ەمەس دەپ ەسەپتەيمىن.
كەرىسىنشە، وسىنداي ەلىم دەيتىن سپورتشىلار بار كەزدە ولاردى بارىنشا قولداپ، ەل اتىن شىعارۋىنا اتسالىسۋدىڭ ورنىنا ءبىز وكىنىشكە وراي ولاردى قاماپ جاتىرمىز. وسى تۇرعىدا ءبىر-اق نارسە ايتقىم كەلەدى. مەن مەملەكەت باسشىلىعىندا وتىرعان كىسىلەردەن ءادىل بولىپ، وسىنداي باتىرلارىمىزدى قولداۋلارىڭىزدى سۇرايمىن. ال قۋات سياقتى باۋىرلارىما امان بولىڭدار، ارقاشان ەل اتىن شىعارا بەرىڭدەر. ءبىز سەندەرمەن بىرگە بولامىز»، - دەدى ارتاەۆ ءوزىنىڭ ۇندەۋىندە.
