بارلىعى تەك قازاق تىلىندە جانە ساۋاتتى جازىلسىن!

10377
Adyrna.kz Telegram

تاۋەلسىزدىگىمىزدىڭ 30 جىلدىعىن تويلاعالى جاتساق تا، ءالى دە كوشەدەگى انا ءتىلىمىزدى قورلاپ، قاتە جازىلعان اقپاراتتان قۇتىلا الماي كەلەمىز. تەلەديدار مەن گازەتتەردە ايتىلا-ايتىلا اقجەم، جازا-جازا جاۋىر بولسا دا، باياعى جارتاس - سول جارتاس. ءتىپتى ۇيرەنىپ تە كەتتىك، كەيدە كۇلەمىز. شاراسىزدىقتان كۇلەتىن شىعارمىز... دەپۋتات بولىپ كەلگەسىن، ءبىرىنشى كەزەكتە وسى ماسەلەنى قولعا الىپ جاتىرمىز. بۇرىنعى ارىپتەستەرىم باستاعان جۇمىستى جالعاستىرۋ جانە وسى ماسەلە بويىنشا ارنايى جۇمىس توبىن باسقارۋ وزىمە بۇيىردى. بۇگىن جاڭا قۇرامنىڭ العاشقى وتىرىسى وتەدى.

كوشەلەردە تولىپ تۇرعان قاتەلەردىڭ ءالى دە دۇرىستالماۋىنىڭ بىرنەشە سەبەبى بار. بىرىنشىدەن، مۇنداعى باستى كەمشىلىك - انا تىلىمىزگە نەمقۇرايلى قاراۋ، ەش جاۋاپكەرشىلىكسىز اۋدارۋ، تىلىمىزگە جاننىڭ اشىماۋى. ەكىنشىدەن، كورگەن قاتەنى جوندەتۋگە ايماقتىق تىلدەردى دامىتۋ باسقارمالارىنىڭ قۇزىرەتى جوق. تەك قانا جارناما، كورنەكى اقپارات ەمەس، ءدارى-دارمەك انىقتاماسىنىڭ، سول سياقتى ءار سالاداعا كوپتەگەن انىقتامالاردىڭ دۇرىس اۋدارىلماۋى دا - قازىرگى قوعامنىڭ «باس اۋرۋى». ال بۇل دەگەنىمىز ءتىلدىڭ عانا ەمەس، ادامنىڭ ولىمىنە دە اكەپ سوعۋى ىقتيمال.

«تاۋەلسىزدىك بارىنەن قىمبات» اتتى ماقالاسىندا پرەزيدەنتىمىز قاسىم-جومارت توقاەۆ «ەلىمىزدىڭ باستى نىشاندارىنىڭ ءبىرى – مەملەكەتتىك ءتىل» ەكەنىن باسا ايتتى. قۇدايعا شۇكىر، قازاق ءتىلىن مەڭگەرگەن وتانداستارىمىزدىڭ سانى ارتىپ كەلەدى! سوندىقتان دا مەملەكەتتىك مەكەمەلەردىڭ، ەلدى مەكەندەر مەن كوشە اتتارىن تەك قازاق تىلىندە جازاتىن ۋاقىت كەلدى.

الەۋمەتتىك-مادەني دامۋ كوميتەتىندەگى ارىپتەستەرىم دارحان مىڭباي، بەكبولات تلەۋحان، ايدوس سارىم، ماقپال تاجماعامبەتوۆا، جۇمىس توبىنىڭ مۇشەلەرى قازىبەك يسا، جاناربەك ءاشىمجان، يۋري جۋلين، جانە باقىتبەك سماعۇل، ەرلان سايروۆ، ناتاليا دەمەنتەۆا، گەننادي ششيپوۆسكيح، باسقادا ارىپتەستەرىممەن بىرگە وسى ماسەلەنى دۇرىس جولعا سالامىز دەپ ۇمىتتەنەمىن.

بەرىك ابدىعاليۇلى،

قر پارلامەنتى ءماجىلىسىنىڭ دەپۋتاتى. 

پىكىرلەر