رەسەيلىكتەر ءپۋتيننىڭ ەسكەرتۋ يشارالارىن تىڭداعىسى كەلمەيدى

2079
Adyrna.kz Telegram

HardTalk باعدارلاماسىنىڭ جۇرگىزۋشىسى ستيۆەن ساكۋر الەكسەي ناۆالنىيدىڭ جاقىن سەرىگى، ساياساتكەر لەونيد ۆولكوۆپەن سۇحباتتاسىپ، وپپوزيتسيونەردىڭ حال-جاعدايىن سۇراپ ءبىلدى، دەپ حابارلايدى «ادىرنا» ءتىلشىسى.

«قازىر ناۆالنىيمەن زاڭگەرلەر ارقىلى بايلانىسا الامىز. ەشكىم ونىمەن جەكە قالىپ سويلەسە المايدى. بيلىك بارلىعىن ءوز باقىلاۋىنا الدى. بۇگىندە الەكسەي ءوز كامەراسىنان نارازىلىق ءبىلدىرىپ جاتىر دەۋ – بۇل اسىرا ايتۋ. شىندىعىندا، ونىڭ مۇنداي مۇمكىندىگى جوق. بىراق ناۆالنىي قۇرعان جانە قازىر مەن باسقارىپ وتىرعان ساياسي قۇرىلىم كەم دەگەندە ءبىراز ۋاقىت بۇل قارقىنعا توتەپ بەرە الادى»،-دەدى ول.

ۆولكوۆتىڭ ايتۋىنشا، وپپوزيتسيالىق ساياساتكەردىڭ جاعدايى جاقسى.

«فيزيكالىق تۇرعىدان العاندا، ول تولىقتاي قالپىنا كەلدى دەپ ايتۋعا بولادى. ويتكەنى، ناۆالنىي رەسەيدە ەلەۋلى تاۋەكەلدەرگە تاپ بولاتىنىن ءتۇسىندى. ايتا كەتەتىن دۇنيە بار. قازىر ناۆالنىي تانىمال «ماتروسسكايا تيشينا» تەرگەۋ اباقتىسىندا وتىر. وسى تۇرمەدە 2009 جىلى الاياقتىق ارەكەتتەردى اشكەرەلەۋگە تىرىسقان زاڭگەر سەرگەي ماگنيتسكي ازاپتالىپ، قايتىس بولعان ەدى. بۇل رەسەيدىڭ قۇپيا قىزمەتى فسب باسقاراتىن تۇرمە. ياعني، ول بەس اي بۇرىن دوسىمىزدى ولتىرۋگە تىرىسقان ادامداردىڭ باقىلاۋىندا»،-دەپ ءسوزىن تولىقتىردى ساياساتكەر.

سۇحبات بارىسىندا لەونيد ميحايلۇلى رەسەيلىكتەردىڭ ءپۋتيننىڭ ۇندەۋلەرىنە نازار اۋدارمايتىنىن اتاپ ءوتتى.

«قۋانتارلىعى، رەسەيلىكتەر ەندى پۋتين مىرزانىڭ ەسكەرتۋ يشارالارىن تىڭداعىسى كەلمەيدى. قازىر ولار رەسەيدىڭ وڭتۇستىگىندەگى قۇنى ءبىر ميلليارد فۋنت تۇراتىن ساراي تۋرالى تولىعىمەن بىلەدى. بەس اي بۇرىن بولعان ناۆالنىيدىڭ ۋلانۋى تۋرالى بىلەدى. وسى ۋلانۋدى 40 ميلليون ادام زەرتتەدى. بۇگىندە ءپۋتيننىڭ وتىرىككە نەگىزدەلگەن ناسيحاتى بۇدان بىرنەشە جىل بۇرىن بولعان سياقتى ەففەكتيۆتى ەمەس»،-دەدى ول.

«ادىرنا» ۇلتتىق پورتالى

پىكىرلەر