يران كيپردىڭ وڭتۇستىگىندەگى بريتاندىق جانە امەريكالىق اسكەري بازالارعا سوققى جاسادى. بۇل تۋرالى 1 ناۋرىزدا ۇلىبريتانيانىڭ قورعانىس ءمينيسترى دجون حيلي مالىمدەدى، دەپ حابارلايدى «ادىرنا» ءتىلشىسى The Independent باسىلىمىنا سىلتەمە جاساپ.
«ولاردىڭ كيپردى تىكەلەي نىساناعا الماعانىنا سەنىمدىمىز. دەگەنمەن، بۇل – ءبىزدىڭ بازالارىمىز، اسكەري قىزمەتكەرلەرىمىز بەن بەيبىت تۇرعىندارىمىز قازىرگى ۋاقىتتا قاۋىپ ايماعىندا تۇرعانىن كورسەتەدى»،- دەدى مينيستر.
حيلي سونداي-اق يران اسكەرىنىڭ باحرەيندەگى بازاعا جاساعان سوققىسى كەزىندە بريتاندىق اسكەري قىزمەتكەرلەردىڭ دە اتقىلاۋعا تاپ بولعانىن ايتتى. ونىڭ سوزىنشە، شابۋىل دروندار مەن زىمىرانداردى قولدانۋ ارقىلى جاسالعان، ال بازا اۋماعىندا شامامەن 300 اسكەري قىزمەتكەر بولعان.
«ولاردىڭ كەيبىرى سوققى تۇسكەن جەردەن بىرنەشە ءجۇز مەتر قاشىقتىقتا بولعان»،- دەپ اتاپ ءوتتى مينيستر.
ISNA اگەنتتىگى يراننىڭ تاياۋ شىعىستاعى امەريكالىق نىساندارعا سوققى بەرۋ ءۇشىن العاش رەت «فاتتاح-2» گيپەردىبىستىق قاناتتى زىمىراندارىن قولدانعانىن حابارلادى.
ءوز كەزەگىندە يسلام رەسپۋبليكاسىنىڭ ارميا باس قولباسشىسى امير حاتامي اقش پەن يزرايل تاراپىنان جاسالعان شابۋىلعا تويتارىس بەرۋ ءۇشىن يران قارۋلى كۇشتەرىنىڭ بارلىق ءتۇرى پايدالانىلعانىن مالىمدەدى. ول يراندىق اسكەري قىزمەتكەرلەردىڭ ەلىن قورعاۋعا جانە قارسىلاستىڭ بارلىق جوسپارىن بۇزۋعا تولىقتاي بەل بۋعانىنا سەنىم ءبىلدىردى.
ال The Times of Israel باسىلىمىنىڭ جازۋىنشا، 28 اقپاننان بەرى يزرايل اسكەري-اۋە كۇشتەرى يران اۋماعىنداعى ءتۇرلى نىساندارعا 1,2 مىڭنان استام وق-ءدارى تاستاعان. تساحال مالىمەتىنشە، سوققىلار يراننىڭ جۇزدەگەن اسكەري نىسانىن، سونىڭ ىشىندە بالليستيكالىق زىمىران قوندىرعىلارى مەن اۋە قورعانىسى جۇيەلەرىن جويعان.
