يران يسلام رەۆوليۋتسياسى ساقشىلارىنىڭ كورپۋسى ەلدىڭ رۋحاني كوسەمى اياتوللا ءالي حامەنەيدىڭ قازا تاپقانىن راستادى، دەپ حابارلايدى «ادىرنا» ءتىلشىسى.
«يسلام رەۆوليۋتسياسىنىڭ جوعارعى كوشباسشىسى، ۇلى اياتوللا ءالي حامەنەي 28 اقپان كۇنى امەريكا مەن ءيزرايلدىڭ بىرلەسكەن شابۋىلى سالدارىنان قازا تاۋىپ، ءشاھيد بولدى. بۇل ۇلى عالىم ءارى كورنەكتى كۇرەسكەر ءوز ءومىرىن يران مەن يسلامدى وركەندەتۋگە ارنادى»،– دەلىنگەن حابارلامادا.
يران اسكەريلەرى ءوز كوشباسشىسىنىڭ ءىسىن جالعاستىراتىنىن جانە يسلام رەسپۋبليكاسىنا شابۋىل جاساعانداردى جازالايتىنىن جەتكىزدى. سونداي-اق بۇل ارەكەت جاقىن ارادا جۇزەگە اساتىنى حابارلاندى.
ەلدىڭ مەملەكەتتىك تەلەارناسى دا حامەنەيدىڭ قازاسى تۋرالى اقپارات تاراتتى. جەرگىلىكتى باق مالىمەتىنشە، اقش پەن ءيزرايلدىڭ شابۋىلدارى ناتيجەسىندە ونىڭ قىزى، نەمەرەسى، كۇيەۋ بالاسى جانە كەلىنى دە كوز جۇمعان.
IRIB News قايعىلى وقيعاعا بايلانىستى يراندا 40 كۇندىك جالپىۇلتتىق ازا تۇتۋ جاريالانىپ، 7 كۇندىك دەمالىس كۇنى بەلگىلەنەتىنىن ايتتى.
قازىرگى ۋاقىتتا ەلدى باسقارۋ كەلەسى باسشى سايلانعانعا دەيىن پرەزيدەنت، پارلامەنت توراعاسى جانە سوت بيلىگىنىڭ باسشىسى ارقىلى جۇزەگە اسىرىلىپ جاتىر. يراندىق باق-تىڭ جازۋىنشا، جاقىن ارادا جاڭا كوشباسشىنىڭ ەسىمى جاريالاناتىن بولادى.
اقش پرەزيدەنتى دونالد ترامپ Truth Social الەۋمەتتىك جەلىسىندەگى بۇل وقيعاعا قاتىستى پىكىر ءبىلدىردى.
«تاريحتاعى ەڭ زۇلىم ادامداردىڭ ءبىرى – حامەنەي ءولدى. ول ءبىزدىڭ ارنايى قىزمەتتەرىمىز بەن جوعارى تەحنولوگيالىق باقىلاۋ جۇيەلەرىمىزدەن قاشىپ قۇتىلا المادى. يزرايلمەن تىعىز ىنتىماقتاستىقتا جۇمىس ىستەدىك. ول دا، ونىمەن بىرگە قازا تاپقان باسقا جەتەكشىلەر دە ەشتەڭە ىستەي المادى. بۇل — يران حالقى ءۇشىن ءوز ەلىن قايتارىپ الۋدىڭ جالعىز مۇمكىندىگى. ءبىز ولاردىڭ كسير، اسكەر جانە باسقا دا قاۋىپسىزدىك كۇشتەرى مەن پوليتسيا قۇرامىنداعى كوپتەگەن وكىلى سوعىسقىسى كەلمەيتىنىن ەستىپ وتىرمىز»، — دەپ اتاپ ءوتتى ول.
امەريكالىق كوشباسشى قارقىندى ءارى نىسانالى بومبالاۋ ءبىر اپتا بويى نەمەسە «تاياۋ شىعىستا جانە جالپى الەمدە بەيبىتشىلىك ورناتۋ ماقساتىنا جەتكەنگە دەيىن» جالعاساتىنىن مالىمدەدى.
بۇعان دەيىن قاسىم-جومارت توقاەۆتىڭ اراب ەلدەرىنە قولداۋ ءبىلدىرىپ، اسكەري ارەكەتتەردى ايىپتاعانىن جازعان ەدىك.
