قازاقستان جازۋشىلار وداعى نۇر-سۇلتان قالالىق فيليالى جاڭا جىلدى مازمۇندى ءىس-شارالارمەن باستادى. وسىدان ءبىر اي بۇرىن قازاقستان جازۋشىلار وداعى نۇر-سۇلتان قالالىق فيليالى مەن نۇر-سۇلتان قالاسى اكىمدىگىنىڭ ۇيىمداستىرۋىمەن اقىندار اراسىندا «كوڭىلدە الاڭ باسىلسا...» اتتى ءمۇشايرا جاريالانعان بولاتىن.
ەلوردا اكىمدىگىنىڭ قارجىلاندىرۋىمەن وتكەن جىر دوداسىنىڭ جەڭىمپازدارى انىقتالىپ، ماراپاتتاۋ ءراسىمى ءوتتى. جاس قالامگەرلەردىڭ شىعارمالارىن باعالاپ، ساراپتاعان قازىلار القاسىنىڭ قۇرامىندا اقىندار وڭايگۇل تۇرجان، جانات اسكەربەكقىزى، فيليال ديرەكتورى داۋلەتكەرەي كاپۇلى بولدى.
ەلۋگە تارتا اقىن سىنعا تۇسكەن جىر سايىسىندا باس جۇلدەنى ءبىرجان احمەر ەنشىلەدى. ءبىرىنشى ورىنعا اقىن ايزادا راحىمجانوۆا يە بولسا، ەكىنشى ورىن ەرلان امانقوجاعا بۇيىردى. ال ءۇشىنشى دارەجەلى ديپلومعا ايدانا سەگىزباەۆا، ءالي بەكمۇحانبەت، ىنتالاندىرۋ سىيلىعىنا الپامىس فايزوللا، اۋعانباي ساناقۇلى، ەراسىل سادۋاقاس لايىق دەپ تابىلدى. جۇلدەلى ولەڭدەردى ەلوردالىق تەاتر اكتەرلەرى وقيتىنىن دا ايتا كەتۋگە ءتيىسپىز.
جەڭىمپاز قالامگەرلەرگە ساتتىلىك تىلەگەن اقىن وڭايگۇل تۇرجان جەلكىلدەگەن جاس كەزىندە جۇبان مولداعاليەۆتەي كلاسسيكتەر اق باتاسىن بەرىپ، تىلەكشى بولعانىن، بۇگىن وزدەرىنىڭ دە وسكەلەڭ ۇرپاققا جول سىلتەيتىن ۋاقىتقا كەلگەنىن جەتكىزدى. ءوز سوزىندە سىرشىل اقىن جاستاردىڭ كوپشىلىگىنىڭ تانىمى تومەن، ءبىلىمى تاياز ەكەنىن جاسىرىپ قالمادى. ودان شىعار جول تىنىمسىز ىزدەنىس، قاجىماس قايرات دەگەن ويلارى جينالعانداردىڭ كوكەيىنە قونعانداي.
شارا اياسىندا ەلوردالىق بولىمشە ديرەكتورى داۋلەتكەرەي كاپۇلىنىڭ جاستار شىعارماشىلىعى جونىندەگى ورىنباسارى بولىپ اقىن، جۋرناليست ولجاس قاسىم تاعايىندالدى. جاۋاپكەرشىلىك جۇگىن ارقالاعان قالامگەر سەنىم ۇدەسىنەن شىعاتىنىن ايتىپ، جاستارمەن بىرلەسە جۇمىس ىستەيتىنىن مالىمدەدى. سونداي – اق باسقوسۋ بارىسىندا قالاداعى اقىن-جازۋشىلارعا ءازىربايجان ەلشىسى ر.ماممادوۆتىڭ العىس حاتى، رەسپۋبليكالىق «Samuryq» ادەبي-مادەني جۋرنالى تابىستالدى.
