Qazaqstan Jazýshylar odaǵy Nur-Sultan qalalyq fılıaly jańa jyldy mazmundy is-sharalarmen bastady. Osydan bir aı buryn Qazaqstan Jazýshylar odaǵy Nur-Sultan qalalyq fılıaly men Nur-Sultan qalasy ákimdiginiń uıymdastyrýymen aqyndar arasynda «Kóńilde alań basylsa...» atty músháıra jarııalanǵan bolatyn.
Elorda ákimdiginiń qarjylandyrýymen ótken jyr dodasynyń jeńimpazdary anyqtalyp, marapattaý rásimi ótti. Jas qalamgerlerdiń shyǵarmalaryn baǵalap, saraptaǵan qazylar alqasynyń quramynda aqyndar Ońaıgúl Turjan, Janat Áskerbekqyzy, fılıal dırektory Dáýletkereı Kápuly boldy.
Elýge tarta aqyn synǵa túsken jyr saıysynda bas júldeni Birjan Ahmer enshiledi. Birinshi orynǵa aqyn Aızada Rahymjanova ıe bolsa, ekinshi oryn Erlan Amanqojaǵa buıyrdy. Al úshinshi dárejeli dıplomǵa Aıdana Segizbaeva, Álı Bekmuhanbet, yntalandyrý syılyǵyna Alpamys Faızolla, Aýǵanbaı Sanaquly, Erasyl Sádýaqas laıyq dep tabyldy. Júldeli óleńderdi elordalyq teatr akterleri oqıtynyn da aıta ketýge tıispiz.
Jeńimpaz qalamgerlerge sáttilik tilegen aqyn Ońaıgúl Turjan jelkildegen jas kezinde Juban Moldaǵalıevteı klassıkter aq batasyn berip, tilekshi bolǵanyn, búgin ózderiniń de óskeleń urpaqqa jol silteıtin ýaqytqa kelgenin jetkizdi. Óz sózinde syrshyl aqyn jastardyń kópshiliginiń tanymy tómen, bilimi taıaz ekenin jasyryp qalmady. Odan shyǵar jol tynymsyz izdenis, qajymas qaırat degen oılary jınalǵandardyń kókeıine qonǵandaı.
Shara aıasynda elordalyq bólimshe dırektory Dáýletkereı Kápulynyń jastar shyǵarmashylyǵy jónindegi orynbasary bolyp aqyn, jýrnalıst Oljas Qasym taǵaıyndaldy. Jaýapkershilik júgin arqalaǵan qalamger senim údesinen shyǵatynyn aıtyp, jastarmen birlese jumys isteıtinin málimdedi. Sondaı – aq basqosý barysynda qaladaǵy aqyn-jazýshylarǵa Ázirbaıjan Elshisi R.Mammadovtyń alǵys haty, respýblıkalyq «Samuryq» ádebı-mádenı jýrnaly tabystaldy.
