رەسەيدەگى حالىق تولقىنىسى باسىلماي تۇر. الەكسەي ناۆالنىيدىڭ بوساتىلۋىن تالاپ ەتكەن جۇرت كۇش-قۇرىلىمدارى مەن پوليتسيانىڭ ەسكەرتۋلەرىنە قاراماستان شەرۋدى جالعاستىرۋدا. اتالعان ماسەلە قازاق ەلىنە قالاي اسەر ەتەدى؟ ءپۋتيننىڭ ورنىنان كەتۋى مۇمكىن بە؟ وسىنداي ساۋالمەن ەلىمىزدەگى ساياساتتانۋشى جانە باسقا دا ازاماتتىق قوعام وكىلدەرىنىڭ پىكىرىن ءبىلىپ كورگەن ەدىك.
ءازىمباي عالي، ساياساتتانۋشى:
- سوڭعى 7-8 جىلدا رەسەي ەكونوميكاسى مۇلدە وسپەدى دەسە دە بولادى. ەكونوميكاسى قاتتى توقىراۋعا ۇشىرادى. قازىر رەسەي اقش-پەن «قىرعي-قاباق سوعىس» جۇرگىزىپ جاتىر. بۇل كەڭەس ۇكىمەتى كەزىندە دە بولعان. بىراق ول كەزدەگى كسرو كەزىندەگى جاعدايعا قاراعاندا ەكونوميكاسى تۇراقسىز قازىرگى رەسەيدىڭ دامىعان اقش-قا ساي كەلمەيتىنى انىق. رەسەي دونباسس پەن لۋگانسكتە سوعىسى ونىڭ الەۋەتىنىڭ جاعدايى ءماز ەمەس ەكەنىن اڭعارتتى. رەسەيدىڭ الەمدىك ارەنادا، ەۋروپا ەلدەرى الدىنداعى ابىروي-بەدەلى ءتۇستى. ەكونوميكا جاعىنان قاتتى قۇلدىراپ بارادى.
پۋتين رەسەيدە دەربەس بيلىكتى ۇستاپ تۇر. ەكونوميكاداعى ستاگناتسيا 7-8 پايىزدان ارتىق ءوسىپ كەتتى. رەسەي ەكونوميكاسى كەرى دامىپ كەلەدى. رەسەيدىڭ قۇرامىنداعى شەشەنستان رەسەيگە باعىنعان ءتۇر كورسەتكەنىمەن، شىن مانىندە باعىنبايدى. قىرىمدى الداپ الدى. باتىس بىرىنەن سوڭ ءبىرىن سانكتسيالار سالىپ جاتىر. رەسەيدىڭ قازىرگى جاعدايى ءماز ەمەس. بەلورۋستى قوسىپ العىسى كەلدى. رەسەيدەگى بولىپ جاتقان حالىق تولقىنىسى لوكالدى سيپات الدى. ول قيىر شىعىستى ۇلكەن اۋماقتى الادى دەپ كۇتىلگەن. بىراق ولاي بولمادى. ناۆالنىي جەمقورلىققا قارسى شىعادى دەپ تۇسىنگەن.
قازىر ول ءپۋتيننىڭ وزىنە اۋىز سالدى. بىرنەشە مارتە قۋعىندالسا دا، قايسار جىگىتتىڭ جەڭىلەتىن ءتۇرى كورىنبەيدى. رەسەي يمپەرياشىل حالىق. ەكونوميكاسى قۇلدىراپ جاتسا دا، يمپەريالىق دۇركىرەپ تۇرسىن دەگەن تۇسىنىك باسىم. ميتينگ بولىپ حالىق تولقۋىنىڭ نەگىزگى سەبەبى ۇرلىق كوپ. ءپۋتيندى «باس ۇرى» دەپ جاتىر. بىراق پۋتين ورنىنان ءوز بەتىمەن كەتپەيدى. ونىڭ قازىر جاسى 68-گە كەلدى. از-ماز بەلى اۋىرعانى بولماسا، دەنساۋلىعى ءالى مىعىم. پۋتين ورنىنان ءوز بەتىمەن كەتپەيدى. رەسەيدىڭ تۇبىنە جەتەتىن ءتۇرى بار. وسىعان دەيىن 5 ورىندا تۇرعان. قازىر ەكونوميكاسى مۇلدە وسپەگەن كۇيى قالعان. پۋتين ەشكىمگە سەنبەيتىن ادام. وتە ساق. مەنىڭ قورقاتىنىم قازاقستانعا قارسى اگرەسسيا باستاي ما دەپ قاۋىپتەنەم. بىراق ولاي جاساماۋى ءتيىس. ەگەر تاعى ءبىر جاۋگەرشىلىك ارەكەت جاساسا، باتىس قاتتى سانكتسيا سالادى. سوندىقتان پۋتين مۇندايعا بارمايدى ويلايمىن.
قۋانىش ەدىلحانتەگى, ازاماتتىق قوعام وكىلى:
- كەشەدەن بەرى رەسەيدەن جەتكەن قانشاما ۆيدەونى قاراپ شىقتىم. ۆولكوۆ دەگەن كەلەسى ۋيك-ەندىدە تاعى شىعامىز دەپ جاتتى. ارينە، ولارعا اقىل ايتاتىن ءبىز ەمەس، بىراق ءبىر قىزىنىپ العان حالىقتى توقتاتپاي، ۋكرايندىق مايدانعا اينالدىرسا عانا ناتيجە شىعۋى مۇمكىن، ايتپەسە اپتا بويى ءۇي-ءۇيدى ارالاپ، بەلسەندىلەردى ۇستاپ، وزدەرى دە دەمالىپ دەگەندەي، كۇش الىپ كەتۋى مۇمكىن عوي؟
بىزدە كەشەگى ازاتتىق راديوسىنىڭ جاريالانىمى (تۇرىك كاسىپكەرى تامينجي تۋرالى), ادۆوكات ايمان حانىمنىڭ مالىمدەمەسى، ت.س.س. بار، تەك... ناۆالنىي جەتىسپەي تۇر.
ءتىرى بولعاندا مارقۇم دۋلات اعادىل وسى ءرولدى ويناي الار ەدى. قازىر بىلمەيمىن...
"ادىرنا" ۇلتتىق پورتالى.
