شەت ەلدىك عىلىمي باسىلىمدارعا زەرتتەۋ ماقالاڭىزدى جاريالاۋ ءۇشىن باسىلىم تالاپتارىنا قاراي عىلىمي ستيلدەردىڭ ءبىرىن تاڭداۋ قاجەت بولادى. وتكەن جولى ءبىز ارا تۋرالى شولۋ جاسادىق. ەندى اما تۋرالى پىكىرىمىزدى ورتاعا سالامىز.
اما (American Medical Association) ءستيلى دە قالىپتاسقان عىلىمي ستيلدەردىڭ ءبىرى.
اتالعان ستيل اكادەميالىق ورتادا اۆتورلارعا ءوز زەرتتەۋىنە بايلانىستى بەلگىلى ءبىر تەوريانىڭ دالەلدەنۋى نەمەسە بەلگىلى ءبىر ونەرتاپقىشتىق، جاڭا عىلىمي اشىلۋعا بايلانىستى قولدانىلاتىن، ياعني، ول تەوريانىڭ نەمەسە جاڭالىقتىڭ اشىلۋىنا قانداي زەرتتەۋ ىقپال ەتكەنىن كورسەتۋگە مۇمكىندىك بەرەتىن جۇيە.
اما عىلىمي سىلتەمەلىك ءستيلىن امەريكالىق مەديتسينالىق قاۋىمداستىق ارنايى شەشىممەن العاشقىدا تەك ءوز باسىلىمدارىندا قولدانۋ ماقساتىندا قالىپتاستىرعان. بۇگىنگى كۇنى بۇل ستيل تەك مەديتسينالىق باسىلىمدارعدا عانا ەمەس، كەز كەلگەن ونەرتاپقىشتىق، عىلىمي جاڭالىقتارعا بايلانىستى ءتۇرلى سالالىق زەرتتەۋلەردە كەڭىنەن قولدانىلادى.
سول سەبەپتى دە بىرقاتار وزگەرىستەرگە يە. بۇل ستيلدە دايەكسوزدەر دە، سىلتەمەلەرگە دە سىلتەمە جاساۋ ەكى بولەك جۇزەگە اسىرىلعانمەن، دايەكسوز ءماتىن مازمۇنىندا كەلتىرىلەدى. ال سىلتەمە مىندەتتى تۇردە زەرتتەۋ جۇمىسىنىڭ سوڭىنداعى انىقتاما تىزىمىندە كورسەتىلۋى ءتيىس. اما ستيلىندە فورماتتاۋدىڭ بىرنەشە جولى بار. ەڭ ءتيىمدىسى، دايىندالعان عىلىمي ماقالاڭىزدى ارنايى ۆەب-سايتتا وڭدەپ شىعۋ. قازاق تىلىنەن اۋدارىلعان كەز كەلگەن عىلىمي ماقالا ءۇشىن بۇل جەردە ءبىر مۇقيات قارايتىن جاعداي: سويلەمدەگى (اسىرەسە گۋمانيتارلىق سالالاردا) كەيبىر اۋدارىلعان ۇعىمدار مەن تەرميندەردى «تۇسىنبەي» قالۋى مۇمكىن. مۇنداي قولايسىزدىق تۋىنداماۋ ءۇشىن سول ءاربىر ۇعىمنىڭ ماعىناسىن قىسقا، ءارى ناقتى تۇسىندىرەتىن سىلتەمە بەرىپ، الدىن-الا انىقتامالىق بيۋرو پاراقشاسىنا تىركەپ قويعانىڭىز ءجون بولادى.
