"ايتا-ايتا التايدى، جامال اپام قارتايدى" دەمەكشى، جەمقورلىقتىڭ الدىن الۋ جونىندە ايتىلماعان ءسوز، ەستىمەگەن قۇلاق قالمادى. دەسە دە ناتيجە بولۋى ءۇشىن ناقتى شارالار جۇرگىزىلۋى قاجەت-اق.
جالپى، ەگەمەندى ەل بولىپ، ەسىمىزدى جيناعالى قوعامىمىز وسى دەرتپەن كۇرەسۋدە. جەمقورلىق جەگى قۇرتتىڭ تۋرا وزىنە اينالدى. ادام ءولتىرۋ اۋىر قىلمىس بولسا، ەڭ سوراقىسى – وسى جەمقورلىق. وسىنىڭ كەسىرىنەن كوپتەگەن ەلدەر باتپاققا باتقان كولىكتەي، نە العا جىلجۋعا، نە كەرى اينالىپ وتۋگە ەش مۇرشاسى جوق.
كوك بايراعىمىزدا كوككە سامعاعان بۇركىتتىڭ بەينەسىن حالقىمىزدىڭ ارمان-ماقساتىنىڭ سيمۆولى دەپ تانىساق، ونىڭ قاناتىن كەڭ اشىپ، ەركىن سامعاۋىنا كەدەرگى ەتەتىن - وسى جەمقورلىق. مۇنى جەڭبەي، ەش ءىسىمىز وڭبايدى. جەمقورلىقتى ۇلتتىق قاۋىپسىزدىگىمىزگە تونگەن جويقىن قاۋىپ دەپ قاراۋىمىز قاجەت.
جەمقورلىقتى العان اداممەن شەكتەمەي، بەرگەن ادامدى بارىپ تۇرعان قىسمىسكەر دەپ ساناۋىمىز كەرەك. ارينە، العانى مەن بەرگەنى بولسىن، بۇلارىڭ اسپاننان سالبىراپ تۇسپەيدى. ولار ءبىزدىڭ ورتامىزدان شىعىپ وتىر. بارلىعى دا ءبىزدىڭ اعا-كوكەلەرىمىز، ۇل-قىزدارىمىز، ءوز ازاماتتارىمىز. كىشىلەرى ۇلكەنىنەن ۇلگى الىپ، ال ۇلكەنى ارام پيعىلىنا ەرىك بەرگەن زامان.
مۇنى قازىر الدىن الىپ، شورت كەسىپ دوعارتپاساق، كەلەشەك ۇرپاق تا وسىلاي بولىپ قالىپتاسادى. بالاپان ۇيادان نەنى كورسە، ۇشقاندا سونى ىلەدى. ءدال جاس بۇردىرشىندەرىمىز، ستۋدەنت پەن وقۋشىلارىمىز جەمقورلىق دەگەندە جيىركەنەتىندەي سەزىمدە بولۋى كەرەك.
جالپى قاراساق، بۇل كەسەل جوقتىقتان تۋىندايدى. ال جوقتىقتى تۋىنداتاتىن ۇكىمەت تاراپىنان بولىنەتىن قاراجات بولسىن، كومەك بولسىن، ءار نەرسە ءوز دىتتەگەن جەرىنە جەتپەۋى. سوندىقتان، حالىقتىڭ تۇرمىسىن جاقسارتۋعا ەرەكشە كوڭىل ءبولۋ قاجەت.
ۇكىمەت ءار سالاعا جىل سايىن قوماقتى قاراجات ءبولىپ وتىرادى. مەملەكەتتىك باعدارلامالاردىڭ باسىم بولىگى تۇرعىنداردىڭ تۇرمىسىن جاقسارتۋعا باعىتتالعان. الايدا، كوپ جاعدايدا تيەسىلى كومەكتىڭ ءوز جەرىنە جەتپەۋى، ارادا تالان-تاراجعا كەتۋى حالىق تۇرمىسىنىڭ ناشارلاۋىنا اكەلەدى.
حالقىمىز تالاي قيىندىقتاردى وتكەرىپ، كوپ نارسەگە شىدامدىلىق تانىتتى. ءار شاڭىراق "بىرەۋدىڭ الا ءجىبىن اتتاما، ەشكىمنىڭ اقىسىن جەمە" دەگەن قاعيدانىڭ توڭىرەگىندە ءومىر سۇرەتىن. ءجاسوسپىرىم ۇلكەندەردىڭ العىس-تىلەگىنە بولەنىپ وسەتىن.
اۋرۋىن جاسىرعان اۋىرماي ولەدى دەمەكشى، قاقساپ تۇرعان جەرىمىزدى اشىق مويىنداۋىمىز كەرەك. بۇل ءبىر. ەكىنشىسى، ونى زاڭ تۇرىندە وتە قاتال جازالاۋ قاجەت.
جەمقور - ناعىز قىلمىسكەر. ءوز پايداسىن حالىق مۇددەسىنەن جوعارى قويعان ادامنان ەش نارسە وڭبەيدى. جەمقورلىقتىڭ كوپتەگەن كورىنىستەرى بار. ونى تىزبەلەپ وتىرۋ دا قاجەت-اق. جەمقورلىق – اتا-بابالارىمىزدان مۇرا بولىپ كەلگەن دۇنيە ەمەس. بۇل حالقىمىزدىڭ تابيعاتىنا جات نارسە بولعاندىقتان، ونى جەڭۋ، تامىرىمەن جويۋ – مىندەت.
ءبىز قانشا ۋاقىتتى قۇر بوس وتكىزىپ الدىق، وسى ۋاقىتتا جەمقورلىق تامىرىن جايىپ ۇلگەردى، بۇل كەسەلدى قانشا ازاماتتارىمىز وتباسىمەن بىرگە جۇقتىرىپ تا ۇلگەردى. دەگەنمەن، قانداي اۋرۋ بولماسىن، ونى ەمدەۋگە بولادى. قاجەت بولسا كۇشتەپ ەمدەتۋ كەرەك.
قانشاما اقىن-جازۋشىلارىمىز "جارقىن بولاشاق" جايلى ۇرانداتىپ، ءۇمىت ەتۋدە. وعان قول جەتكىزۋدىڭ جولى – جەمقورلىقتى جويۋ. بىزگە ايعا ۇشۋدىڭ، دامىعان ەل بولامىز دەپ شەتەلدىڭ ۇستانىمدارىن ەندىرۋدىڭ ءازىر ەش قاجەتى جوق. الدىمەن، بىزدە ءورشىپ تۇرعان جەمقورلىقتى اۋىزدىقتاۋ. وسىنى ورىنداساق قانا كوركەيەمىز. جانە بۇل عاجايىپ نارسە ەمەس، بۇل - قاراپايىم زاڭدىلىق.
تورەگەلدى شارمانوۆ،
ۇلتتىق عىلىم اكادەمياسىنىڭ اكادەميگى
