بالالار ءۇيىنىڭ تۇلەگى سامات بەكەباەۆ بالالاردىڭ قۇقىعىن قورعاۋعا قاتىستى جاڭا زاڭعا پىكىرىن ءبىلدىردى، دەپ حابارلايدى «ادىرنا» ءتىلشىسى.
«ەلىمىزدە جەتىمدەر سانى وتە كوپ جانە ونى ازايتۋ مۇمكىن بولماي وتىر. بيۋدجەتتەن اسىراپ الۋعا بولىنەتىن قارجى دا ءماز ەمەس. سوندىقتان بالالاردى اسىراپ الۋشىدان گورى تاستاۋشىلار كوپ. ەگەر جاڭا زاڭناما قابىلدانسا، وندا ءتىرى جەتىمدەردىڭ سانى التى ەسەگە ارتادى. مەنى كەزىندە ءبىر ەمەس، بىرنەشە وتباسى اسىراپ الۋعا نيەت بىلدىرگەن. الايدا بالالار ءۇيىنىڭ باسشىلارى نەمەسە شىمكەنتتىك باسقارما باسشىلارى اپتا سايىن، اي سايىن مەنى اسىراپ العان وتباسىلاردىڭ ۇيىنە كەز كەلگەن ۋاقىتتا بارىپ، تەكسەرۋ جۇرگىزدى. كوپتەگەن قۇجاتقا بايلانىستى كەدەرگىلەر بولدى. ال وعان سەبەپ – مەنى بالالار ۇيىنە قايتارۋ. مەن سياقتى مىڭداعان بالالار ءۇيىنىڭ تۇلەكتەرى بار. ولاردىڭ كوپشىلىگىن ءبىر ەمەس، بىرنەشە وتباسى اسىراپ، قايتا بالالار ۇيىنە اكەلگەن. بولاشاقتا قارتتار، جەتىمدەر ءۇيى تولادى. قىسقاسى، بالالارىمىزعا شەتەلگە كەتۋ يا جەتىمدەر ۇيىندە قالۋ ەمەس، تەك ءوز اتا-اناسىمەن ءومىر ءسۇرۋ باقىتى بۇيىرسىن»،-دەدى ول.
«ادىرنا» ۇلتتىق پورتالى
