«قۇرالاي حانىم ەلدى اداستىرىپ ءجۇر»

5095

ءداستۇرلى ءانشى، قازاقستاننىڭ ەڭبەك سىڭىرگەن قايراتكەرى ايگۇل ەلشىباەۆا قۇرالاي حانىممەن تاعى شايقاسقا ءتۇستى. ءانشى قۇرالاي حانىم جەلى ارقىلى اقىلى ترەنينگتەر وتكىزىپ، ەلدى اداستىرىپ ءجۇر دەگەندى تاعى ايتتى. ونىڭ سوڭىنان ەرگەندەر ساۋاتسىز ايەلدەر دەپ سانايدى. بۇل تۋرالى 

">"بۇگىن" باعدارلاماسىنا سىلتەمە جاساپ، stan.kz حابارلادى دەپ جازادى "ادىرنا" ۇلتتىق پورتالى. 

ايگۇل ەلشىباەۆا ەل اراسىندا اقىلى ترەنينگتەرى، دارىستەرى مەن دۋاسى ارقىلى تانىلعان قۇرالاي حانىمدى بۇعان دەيىن دە تالاي سىناعان ەدى. جەلىدە بەلسەندى، ميلليونداعان وقىرمانى بار قۇرالاي حانىم ونىڭ بىرىنە دە جاۋاپ قاتقان جوق. تىكەلەي ەفيردىڭ بىرىندە ول ءسوزىن "مەن ەشكىممەن داۋلاسپايمىن، وعان ۋاقىتىمدى سارپ ەتپەيمىن، اقتالمايمىن" دەپ قىسقا قايىردى.

ءداستۇرلى ءانشى قۇرالاي حانىمنىڭ ساۋاتسىزدىعىن، ەلدى اداستىرىپ، ءتىپتى ادام ولىمىنە دەيىن جەتكىزگەنىن ايتىپ ايىپتادى.

"مەن اففيرماتسيا، ۆيزۋاليزاتسيا، مەديتاتسيا دەگەندەردى تۇسىنبەي ءجۇردىم. ادامدارعا سوزبەن ەمەس، ىسپەن ارەكەت ەتۋ كەرەك ەكەنىن تۇسىندىرە الماي-اق قويدىم. 9 اي كارانتيندە وسى سوزدەردىڭ ءمانىن ءتۇسىندىم. قۇرالايدىڭ 40 كۇن دۇعاسى تۋرالى ۇقتىم. ءابجاد تۋرالى وقىدىم. پسيحولوگيانى وقىدىم. اقىرىندا قۇرالايدىڭ يسلامدى ۇيرەتەم دەپ، باسقا ءدىندى، بۋددا ءدىنىن ناسيحاتتاپ جۇرگەنىن ءتۇسىندىم. پراۆدينانىڭ ءىلىمىن ۇيرەتىپ، مىستانداردىڭ دۋاسىن ناسيحاتتايدى. سوپىلىق ىلىمىندەگىلەر ابدەن رۋحاني كەمەلدەنىپ، شەگىنە جەتكەندە جىندارمەن كۇرەسەدى ەكەن. قىرىق كۇن دۇعا دەگەنگە كەلەدى ەكەن. ال پسيحولوگيانىڭ نە ەكەنىن بىلمەي تۇرىپ، ءوزىن پسيحولوگپىن دەپ جۇرگەن قۇرالاي "اپام" دارەتىن الا الماي، ءبىر سۇرە جاتتاي الماي جۇرگەندەرگە قىرىق كۇن دۇعا ۇيرەتىپ ءجۇر. قۇنانبايدى وسەككە ەرگەن دەيدى ءبىر اڭگىمەسىندە. ادەبيەتتى بىلمەگەن ادام ادەبيەت تۋرالى ءسوز ايتادى", - دەيدى ەلشىباەۆا.

ءانشىنىڭ ايتۋىنشا، قۇرالاي حانىمنىڭ دۋاسىنان كەيىن كوز جۇمعان جاستار بولعان. مۇنى اتا-انالاردىڭ وزدەرى حابارلادى دەيدى ءوزى.

"قۇرالايدىڭ دۋاسىنان كەيىن ءولىپ كەتكەن ءبىر-ەكى ادام بار. ماعان اتا-انالارىنىڭ وزدەرى ايتتى. اقتوبەدە جۋرناليست قىز كوز جۇمدى. كەيىن زاتتارىن قاراسا، قۇرالاي حانىم ايتقان زاتتار تابىلعان. ادام ءولىپ جاتسا، مەن ەشتەڭە دەمەي قاراپ وتىرا المايمىن. اركىم ءوز ىسىمەن اينالىسۋ كەرەك", - دەيدى ءداستۇرلى ءانشى.

فوتو اشىق دەرەككوزدەن الىندى.

پىكىرلەر
رەداكتسيا تاڭداۋى