تەگەران ءال-قۇدىس ەليتالىق جاساعىنىڭ قولباسشىسى، گەنەرال كاسەم سۋلەيمانيدىڭ ولىمىنە دونالد ترامپتى كىنالايدى. بۇل تۋرالى ەلدىڭ سوت بيلىگىنىڭ باسشىسى يبراگيم رايسي ايتتى، دەپ حابارلايدى «ادىرنا» ءتىلشىسى ريا نوۆوستي-گە سىلتەمە جاساپ.
«ترامپ – سۇلەيمانيدىڭ ولىمىنە جاۋاپتى ءنومىرى ءبىرىنشى قىلمىسكەر. بىراق ونى جازادان قۇتىلىپ كەتتى دەپ ساناۋعا بولمايدى»،-دەدى ول.
ءرايسيدىڭ ايتۋىنشا، يراندا بۇل ءىستى زاڭ جۇزىندە قاراۋ ءۇشىن جەتكىلىكتى دالەلدەر بار. الداعى ۋاقىتتا ول تەرگەۋدى جالعاستىرىپ، كىسى ءولتىرۋدى ۇيىمداستىرۋشىلار مەن مەن قىلمىستى ورىنداۋشىلاردى جازاعا تارتپاق.
ەسكە سالا كەتەيىك، اقش اسكەريلەرى 3 قاڭتار كۇنى باعداتتا اۋە شابۋىلىن جاساپ، گەنەرال كاسەم سۋلەيمانيدى ولتىرگەن بولاتىن. كوپ ۇزاماي يران قولباسشىنى ولتىرگەنى ءۇشىن اقش-تان كەك الاتىنىن مالىمدەدى.
«ادىرنا» ۇلتتىق پورتالى
