«جەڭدى مە، جەڭبەدى مە؟»: اسحات سادىرباي «الەم حانىمى-2020» بايقاۋى تۋرالى پىكىر ءبىلدىردى

6084
Adyrna.kz Telegram

بەلگىلى جۋرناليست اسحات سادىرباي قايرات نۇرتاستىڭ جارى، اكتريسا جۇلدىز ابدىكارىموۆا جەڭىمپاز اتانعان "الەم حانىمى-2020" بايقاۋى تۋرالى پىكىر ءبىلدىردى، دەپ حابارلايدى «ادىرنا» ءتىلشىسى. ونىڭ ايتۋىنشا، ابدىكارىموۆانىڭ جەڭىسى تۋرالى اقپارات تەك وتاندىق سايتتاردا عانا جاريالانعان.

« "Mrs. Universe 2020"-عا قاتىستى... كەشەلى بەرى وسى بايقاۋعا قازاقستاننان قاتىسقان جۇلدىز ابدىكارىموۆا باس جۇلدەنى جەڭىپ الدى دەگەن اقپاراتتى وقىپ جاتىرمىز. قۋانىشتىمىز. قۇتتى بولسىن. بىراق...جاڭالىقتار جازاتىن شەتەلدىك سايتتاردى اقتارسام بۇل اقپارات تەك قازاقستاندىق سايتتاردا عانا جاريالانعان. رەسەيلىكتەر ءوز ەلدەرىنەن قاتىسقان ۇمىتكەر جەڭدى دەپ جازىپتى. تۇسىنىكسىز.

قايبىر جىلى فرانتسيادا وتەتىن “Intervilles” - “نامىس دودا” حالىقارالىق تۆ دوداسىنا بارعان ءبىزدىڭ ەلدىڭ كومانداسى باس جۇلدەنى جەڭىپ العان عوي. رەسەيدە ول شوۋ “بولشيە گونكي” دەگەن اتاۋمەن “پەرۆىي كانال”دان كورسەتىلەتىن. ءسويتىپ فينالدا ءبارى قازاقستاندى قۇتتىقتاپ، شامپان اتىپ، كۋبوكتى تاپسىرىپ اياقتاعان. ءبارى بىتكەن سوڭ رەسەيلىك ارىپتەستەر كۋبوكتى سۇراپ الىپ، رەسەي جەڭدى قىلىپ، وزدەرىنە باسقاشا ءتۇسىرىپ العان. ءبىر ويىن، ءبىر كۋبوك، ءارتۇرلى ناتيجە مەن ءارتۇرلى جەڭىمپاز.

ال، ەندى مىناۋ حانشايىمدار سايىسىندا دا سونداي بىردەڭە بولماعان شىعار؟»-دەدى ول.

ءجۋرناليستىڭ ساۋالىنا بايقاۋدا توپ جارعان اكتريسا رەسمي جاۋاپ بەرمەدى.

ايتا كەتەيىك، بۇعان دەيىن جۇلدىز ابدىكارىموۆانىڭ "الەم حانىمى – 2020" اتانعانىن حابارلاعان ەدىك.

«ادىرنا» ۇلتتىق پورتالى

پىكىرلەر