Belgili jýrnalıst Ashat Sadyrbaı Qaırat Nurtastyń jary, aktrısa Juldyz Ábdikárimova jeńimpaz atanǵan "Álem hanymy-2020" baıqaýy týraly pikir bildirdi, dep habarlaıdy «Adyrna» tilshisi. Onyń aıtýynsha, Ábdikárimovanyń jeńisi týraly aqparat tek otandyq saıttarda ǵana jarııalanǵan.
« "Mrs. Universe 2020"-ǵa qatysty... Kesheli beri osy baıqaýǵa Qazaqstannan qatysqan Juldyz Ábdikárimova bas júldeni jeńip aldy degen aqparatty oqyp jatyrmyz. Qýanyshtymyz. Qutty bolsyn. Biraq...Jańalyqtar jazatyn sheteldik saıttardy aqtarsam bul aqparat tek qazaqstandyq saıttarda ǵana jarııalanǵan. Reseılikter óz elderinen qatysqan úmitker jeńdi dep jazypty. Túsiniksiz.
Qaıbir jyly Franııada ótetin “Intervilles” - “Namys doda” halyqaralyq tv dodasyna barǵan bizdiń eldiń komandasy bas júldeni jeńip alǵan ǵoı. Reseıde ol shoý “Bolshıe gonkı” degen ataýmen “Pervyı kanal”dan kórsetiletin. Sóıtip fınalda bári Qazaqstandy quttyqtap, shampan atyp, kýbokty tapsyryp aıaqtaǵan. Bári bitken soń reseılik áriptester kýbokty surap alyp, Reseı jeńdi qylyp, ózderine basqasha túsirip alǵan. Bir oıyn, bir kýbok, ártúrli nátıje men ártúrli jeńimpaz.
Al, endi mynaý hanshaıymdar saıysynda da sondaı birdeńe bolmaǵan shyǵar?»-dedi ol.
Jýrnalıstiń saýalyna baıqaýda top jarǵan aktrısa resmı jaýap bermedi.
Aıta keteıik, buǵan deıin Juldyz Ábdikárimovanyń "Álem hanymy – 2020" atanǵanyn habarlaǵan edik.
«Adyrna» ulttyq portaly
