بۇگىن فاريزا اقىننىڭ تۋعان كۇنى!

789

بۇگىن سىرشىل سۇلۋلىقتىڭ، ۇلىلىقتىڭ سيمۆولىنا اينالعان فاريزا وڭعارسىنوۆانىڭ تۋعان كۇنى. قارا قىلدى قاق جارىپ، ادىلدىكتى جاقتاپ وتكەن، پوەزيا پاديشاسى، حالىقتىڭ اياۋلى قىزى ءتىرى بولعاندا 81 جاسقا تولار ەدى. قايسار قىز كىشكەنتايىنان ادەبيەتكە جاقىن بولىپ، اقىندىق قاسيەتتەرىن تانىتا باستاعان. اقىننىڭ ادەبيەت دەپ اتالاتىن ازابى كوپ اۋىلعا كەلۋىنە جاراتىلىستىڭ اكەنىڭ قانى، انانىڭ سۇتىمەن بەرگەن قاسيەتى.

فاريزا بىرەۋ دە بولسا، بىرەگەي دەگەن ۇعىمدى بىلدىرەدى. ونىڭ وتتى جىرلارى ۇلتتىڭ قۋانىشى دا، جۇبانىشى دا بولعان. فاريزادا ءوزىنىڭ تالانتىنا لايىق تەگەۋرىندى مىنەز دە بولدى. تالايدى وپىندىرعان دا، بىراق اقىندى بيىك شىڭعا جەتەلەگەن دە، ءدال وسى مىنەز بولاتىن. ول ەڭ الدىمەن قالىڭ قازاق جۇرتىنا شىنشىل جۋرناليست رەتىندە تانىلدى. ودان سوڭ بىرنەشە گازەتتەردىڭ باس رەداكتورى بولىپ قىزمەت اتقاردى، پارلامەنت ءماجىلىسىنىڭ دەپۋتاتى بولدى.

اقىننىڭ شىعارماشىلىعىنا ءتان باستى قاسيەتى شىندىقتى تۋ ەتەتىندىگىندە ەدى. تەك جاي جىرلاۋ ەمەس، قازىرگى زامانا تالابىنىڭ بيىك دەڭگەيىنە لايىقتاپ جىرلاۋ فاريزا شىعارماشىلىعىنىڭ ءبىر قىرى بولدى. اقىن قىزدىڭ بالا كەزدەن ساناسىنا توقىپ، قانىنا ءسىڭىپ العان ادالدىق، تازالىق، ەرەكشە تالعامى مەن تالابى، وسىلاي شىڭدالا بەردى. جالعان سويلەگەن جانعا بۇيرەگى بۇرىلمايتىن تاعى ءبىر ەرگە ءتان قايسار مىنەزى بار-دى. جىرلارىندا حالقىنىڭ تۇرمىس-تىرشىلىگى ايقىن بەينەلەنىپ، وقىرمان جۇرەگىنە بىردەن جول تارتتى. 75 جاسقا قاراعان شاعىندا دۇنيە سالعان كورنەكتى اقىن قازاق ادەبيەتىن بيىك دەڭگەيگە كوتەرۋگە زور ۇلەس قوسىپ، جىر الەمىندە وزىندىك قولتاڭباسىن قالدىردى. اقىننىڭ ءوزى ومىردەن وزسا دا، سوزدەرى ماڭگى وشپەس مۇرا بولىپ قالارى انىق..  

اياۋلىم تىلەۋقابىل،

«ادىرنا» ۇلتتىق پورتالى

پىكىرلەر
رەداكتسيا تاڭداۋى