مەملەكەت باسشىسى قاسىم-جومارت توقاەۆ ۆولونتەرلەر جىلىنىڭ جابىلۋ راسىمىندە ءسوز سويلەدى.
ايتا كەتۋ كەرەك، پرەزيدەنت قاسىم-جومارت توقاەۆ ەلدەگى ۆولونتەرلىك ۇيىمدى دامىتۋ ماقساتىندا 2020 جىلدى ەرىكتىلەر جىلى دەپ جاريالاعانى ءمالىم. ەلباسى جاريالاعان جاستار جىلىنىڭ زاڭدى جالعاسى رەتىندە بولعان ەرىكتىلەر جىلى شىن مانىندە ەلگە قامقور، قايىرىمدى ازاماتتاردىڭ وتە كوپ ەكەندىگىن كورسەتتى.
شىندىعىندا دا كوپكە كومەك كورسەتۋ، قىسىلعان جانعا قول ۇشىن بەرۋ قازاق حالقىندا بۇرىننان بار نارسە. اتاپ ايتار بولساق، اسارلاتىپ كومەك جاساپ، اعايىننىڭ ءۇيىن سالۋ نەمەسە قولعابىس جاساۋ الىمساقتان ۇلتتى ۇيىستىرعان يگى قادام. بۇل جاقسى ءۇردىس زامان وركەندەگەن سايىن جاقسارىپ، يگى ىسكە اينالىپ كەلەدى.
راسى كەرەك، ازاماتتىق قوعامدى دامىتۋدا ەرىكتىلەر ۇيىمى ەلدىڭ رۋحىن كوتەردى. ازاماتتىق قوعامدى دامىتۋدىڭ 2025 جىلعا دەيىنگى قابىلدانعان تۇجىرىمداماسىندا دا ەلىمىزدە ەرىكتىلەر قوزعالىسىن دامىتۋ جانە قايىرىمدىلىق شارالارىن ۇيىمداستىرۋ جانە ولاردى ىنتىلاندىرۋ ماقساتىندا ىرگەلى شارالار جۇرگىزىلدى.
راسى كەرەك، پاندەميا جايلاعان ۋاقىتتا دا ۆولونتەرلەر قىسىلعان ازاماتتاردىڭ جانىنان تابىلدى. سىرقات جاندارعا كومەكتەستى. قول ۇشىن بەردى.كومەكتەستى. مۇنى مەملەكەت باسشىسى قاسىم-جومارت توقاەۆ ۆولونتەرلەر جىلىنىڭ جابىلۋ راسىمىندە سويلەگەن سوزىندە ناقتى ايتتى.
–ەرىكتىلەر جىلى جالىندى جاستارىمىزدىڭ بويىنداعى ەڭ اسىل قاسيەتتەردى دارىپتەگەن ەرەكشە جىلعا اينالدى. بۇل جاناشىرلىققا، جاۋاپكەرشىلىك پەن قامقورلىققا ۇندەگەن كەزەڭ بولدى. ءبىز مۇقتاج جاندارعا قول ۇشىن بەرىپ، ءتۇرلى قيىندىقتارمەن بىرگە كۇرەستىك. وسىلايشا، ادامگەرشىلىك قۇندىلىقتاردى جوعارى باعالايتىن قوعام ەكەنىمىزدى تانىتتىق. الەمدى جايلاعان ىندەت قايىرىم مەن مەيىرىمنىڭ قانشالىقتى ماڭىزدى ەكەنىن انىق كورسەتتى.سوندىقتان، ۆولونتەر جىلىنىڭ ءدال بيىل ءوتۋى ۋاقتىلى جانە ورىندى بولدى دەپ سانايمىن. قاۋىپتى دەرت ەل-جۇرتتىڭ دەنساۋلىعىن عانا ەمەس، بەكەم بىرلىگىن دە سىنعا الدى. ءبىز ءبىر ەل، ءبىر حالىق بولىپ بۇل سىنعا توتەپ بەردىك. اۋقىمدى جۇمىستار اتقارىپ، كوپتەگەن جوبانى جۇزەگە اسىردىق. بارلىق ايماقتا اشىلعان ەرىكتىلەردىڭ فرونت-وفيستەرىندە ماڭىزدى باستامالار كوتەرىلدى. بۇل جۇمىسقا مىڭداعان ازاماتتارىمىز اتسالىستى.
وتانعا قىزمەت ەتۋدىڭ وزىق ۇلگىسىن كورسەتتى. راسىندا، جانى تازا ادام عانا ۆولونتەر بولا الادى. ەرىكتىلەر – وزگەنىڭ ماسەلەسىن ءوز ىسىندەي كورەتىن جۇرەگى كەڭ، نيەتى دۇرىس جاندار.ءبىزدىڭ ەلىمىز ءدال وسىنداي ازاماتتاردان كەندە ەمەس. سىزدەردىڭ قوعام ءۇشىن جاساعان پايدالى ىستەرىڭىز، كوپشىلىكتىڭ ىستىق ىقىلاسى مەن اق باتاسى – سونىڭ ايقىن دالەلى.
ارقايسىڭىز – شىنايى قۇرمەتكە لايىقتى ناعىز وتانشىل ازاماتسىزدار.
مۇنى ەش كۇمانسىز، نىق سەنىممەن ايتۋعا بولادى. سول سەبەپتى، مەنىڭ جارلىعىممەن كوپتەگەن ۆولونتەرلەر «حالىق العىسى» مەدالىمەن ماراپاتتالدى»،-دەدى مەملەكەت باسشىسى قاسىم-جومارت توقاەۆ.
انىعىن ايتساق، مەملەكەت باسشىسىنىڭ تاپسىرماسى بويىنشا جاسالعان ەرىكتىلەردىڭ «ساباقتاستىق». «ساۋلىق»، «تازا الەم»، «اسىل مۇرا»، «قامقور»، «ءبىلىم»، «ءۇمىت» باعىتى بويىنشا جاساعان كومەگى ەرەسەن بولدى.
وسىعان وراي بيىلعى جىلى ەرىكتىلەردىڭ سانى ەكى ەسەگە ارتىپ، 100 مىڭعا جەتتى. پاندەميانىڭ كەزىندە ولاردىڭ سانى 500 مىڭنان استى. جوعارىدا اتاپ كورسەتىلگەن جەتى باعىت بويىنشا ءبىر جىلدىڭ ىشىندە 18 قولداۋ ورتالىعى، 6 مىڭ دايىندىق ورتالىعى اشىلدى. 2 مىڭنان اسا شارا وتكىزىلىپ، 1 ميلليوننان استام ادامعا كومەك كورسەتىلدى. پاندەميا ۋاقىتىندا 3,5 مىڭنان استام ۆولونتەر -مەديكتەر، نوتاريۋستەر، ادۆوكاتتار جانە زاڭ فاكۋلتەتىنىڭ ستۋدەنتتەرى ازاماتتارعا قۇقىقتىق تۇرعىدان تەگىن زاڭدىق كەڭەس بەرىپ، قولداۋ كورسەتتى.
مەملەكەت باسشىسى قاسىم-جومارت توقاەۆ ۆولونتەرلەردىڭ جىلىنىڭ جابىلۋ راسىمىندە سويلەگەن سوزىندە ەرىكتىلەر ۇيىمى مەن قايىرىمدىلىق قورلارىنىڭ زاڭدىق مارتەبەسى جوق ەكەندىگىن ايتا كەلىپ، ««مەنىڭ تاپسىرمام بويىنشا «قايىرىمدىلىق تۋرالى» ارنايى زاڭ ازىرلەنىپ جاتىر،- دەدى. وسىعان بايلانىستى پرەزيدەنت ۇكىمەتكە بىرقاتار تاپسىرمالار بەردى. اتاپ ايتقاندا، قايىرىمدىلىق قورلارىنىڭ جۇمىسى قالىپتاسۋ ءۇشىن العاشقى جىلى جەڭىل نەسيە بەرۋدى شەشۋ كەرەك. ۆولونتەرلىك ۇيىمدارعا مەملەكەت جانە بيزنەس تاراپىنان قولداۋ كورسەتكەن ءلازىم. سونداي-اق قايىرىمدىلىق قورلارى قىزمەتىنىڭ اشىقتىعىن قامتاماسىز ەتۋ ءۇشىن ولاردىڭ رەسسترىن ەنگىزۋ ماسەلەسىن شەشكەن دۇرىس. سونىمەن قاتار، ەرىكتىلەر ۇيىمى جۇمىسىنىڭ كوكجيەگىن كەڭەيتۋ ءۇشىن ارنايى گرانتتار بولگەن ءجون. مەملەكەت باسشىسى ەرىكتىلەر ۇيىمىنا جاستار عانا ەمەس، اعا ۇرپاق وكىلدەرى دە بەلسەنە قاتىسىپ جاتقانىن ايتا كەلىپ، ۆولونتەرلىك قىزمەتتى قولداۋدىڭ بىرىڭعاي ستاندارتىن جاساۋدى تاپسىردى.
راسىن ايتۋ كەرەك، ۆولونتەرلەر جىلى شىندىعىندا دا تابىستى اياقتالدى. «ادامزاتتىڭ ءبارىن ءسۇي» باۋىرىم»،- دەپ اقىن اباي اتامىزدىڭ دانالىق ءسوزىنىڭ اقيقاتى ايقىن كورىندى. ءبىر عانا مىسال، «قوعامدىق باقىلاۋ» رەسپۋبليكالىق توبىنىڭ ۇيلەستىرۋشىسى سايدا تاۋكەلەۆا ۆولونتەرلەر جىلىندا تابىستى جۇمىس ىستەگەنىن ايتادى. دەرەكپەن سويلەسەك، «قوعامدىق باقىلاۋ» سايدا تاۋكەلەۆانىڭ توبى قازاقستاننىڭ بارلىق ايماعىندا تىنىمسىز جۇمىس ىستەگەن. پاندەميا كەزىندە ولار قازاقستانعا كەلىپ ءتۇسىپ جاتقان گۋمانيتارلىق كومەكتىڭ تاراتىلۋىنا باقىلاۋ جۇرگىزگەن. وسىعان وراي ولار 5 مىڭنان استام مونيتورينگتىك شارالار وتكىزگەن كورىنەدى.
تاعى ءبىر مىسال، پرەزيدەنت اتاپ كورسەتكەن «Birgemiz:umit» جوباسى اياسىندا ءىز-ءتۇسسىز كەتكەن قازاقستاندىق 566 ساربازدىڭ ەسىمى انىقتالعان. جوبا اياسىندا ەرىكتىلەر 1 مىڭنان اسا جوعالعان ازاماتتاردى ىزدەۋگە اتسالىسقان. ۆولونتەرلەر حابارسىز كەتكەن 50 ادامدى تابۋعا كومەكتەسكەن. ءبىزدىڭ ەرىكتىلەر قازاقستاندا عانا ەمەس، بۇۇ دامىتۋ باعدارلاماسى جۇمىسى اياسىندا يوردانيا، كەنيا جانە تۇركيا ەلدەرىندە دە جۇمىس ىستەگەنى ءمالىم بولدى. مىسالى، «ەرىكتىلەر ليگاسى» قوعامدىق ۇيىمىنىڭ جەتەكشىسى ايسۇلۋ ەرنيازوۆا ەرىكتىلەر جىلىن جاريالاپ، جۇمىستىڭ بۇقارالىق سيپات الۋىنا كىقپالىن تيگىزگەن مەملەكەت باسشىسى قاسىم-جومارت توقاەۆقا العىسىن بىلدىرەدى. ونىڭ سوزىنە سەنسەك، ءاربىر سەگىزىنشى قازاقستاندىق ەرىكتىلەر قاتارىن تولتىرىپ تۇر.
راس، ازامىتتىق قوعامدى دامىتۋدا ەرىكتىلەردىڭ ەڭبەگى ەرەن. جانى قىسىلعان جاننىڭ جۇرەگى مەيىرىم مەن ىزگىلىكتى ىزدەيدى. ال جاقسى ادامدار اينالاڭىزدا تولىپ جۇر. سولاردىڭ ءبىرى – ەرىكتىلەر توبى. ولار ادامزاتتى «باۋىرىم» دەپ سۇيەدى. ەرىكتىلەر ەرىگىپ جۇرگەن جوق. ولار جان-تانىمەن ەلگە كومەكتەسىپ ءجۇر.
