Memleket basshysy Qasym-Jomart Toqaev volonterler jylynyń jabylý rásiminde sóz sóıledi.
Aıta ketý kerek, Prezıdent Qasym-Jomart Toqaev eldegi volonterlik uıymdy damytý maqsatynda 2020 jyldy eriktiler jyly dep jarııalaǵany málim. Elbasy jarııalaǵan Jastar jylynyń zańdy jalǵasy retinde bolǵan eriktiler jyly shyn máninde elge qamqor, qaıyrymdy azamattardyń óte kóp ekendigin kórsetti.
Shyndyǵynda da kópke kómek kórsetý, qysylǵan janǵa qol ushyn berý qazaq halqynda burynnan bar nárse. Atap aıtar bolsaq, asarlatyp kómek jasap, aǵaıynnyń úıin salý nemese qolǵabys jasaý álimsaqtan ultty uıystyrǵan ıgi qadam. Bul jaqsy úrdis zaman órkendegen saıyn jaqsaryp, ıgi iske aınalyp keledi.
Rasy kerek, azamattyq qoǵamdy damytýda eriktiler uıymy eldiń rýhyn kóterdi. Azamattyq qoǵamdy damytýdyń 2025 jylǵa deıingi qabyldanǵan tujyrymdamasynda da elimizde eriktiler qozǵalysyn damytý jáne qaıyrymdylyq sharalaryn uıymdastyrý jáne olardy yntylandyrý maqsatynda irgeli sharalar júrgizildi.
Rasy kerek, pandemııa jaılaǵan ýaqytta da volonterler qysylǵan azamattardyń janynan tabyldy. Syrqat jandarǵa kómektesti. Qol ushyn berdi.Kómektesti. Muny memleket basshysy Qasym-Jomart Toqaev volonterler jylynyń jabylý rásiminde sóılegen sózinde naqty aıtty.
–Eriktiler jyly jalyndy jastarymyzdyń boıyndaǵy eń asyl qasıetterdi dáriptegen erekshe jylǵa aınaldy. Bul janashyrlyqqa, jaýapkershilik pen qamqorlyqqa úndegen kezeń boldy. Biz muqtaj jandarǵa qol ushyn berip, túrli qıyndyqtarmen birge kúrestik. Osylaısha, adamgershilik qundylyqtardy joǵary baǵalaıtyn qoǵam ekenimizdi tanyttyq. Álemdi jaılaǵan indet qaıyrym men meıirimniń qanshalyqty mańyzdy ekenin anyq kórsetti.Sondyqtan, Volonter jylynyń dál bıyl ótýi ýaqtyly jáne oryndy boldy dep sanaımyn. Qaýipti dert el-jurttyń densaýlyǵyn ǵana emes, bekem birligin de synǵa aldy. Biz bir el, bir halyq bolyp bul synǵa tótep berdik. Aýqymdy jumystar atqaryp, kóptegen jobany júzege asyrdyq. Barlyq aımaqta ashylǵan Eriktilerdiń front-ofısterinde mańyzdy bastamalar kóterildi. Bul jumysqa myńdaǵan azamattarymyz atsalysty.
Otanǵa qyzmet etýdiń ozyq úlgisin kórsetti. Rasynda, jany taza adam ǵana volonter bola alady. Eriktiler – ózgeniń máselesin óz isindeı kóretin júregi keń, nıeti durys jandar.Bizdiń elimiz dál osyndaı azamattardan kende emes. Sizderdiń qoǵam úshin jasaǵan paıdaly isterińiz, kópshiliktiń ystyq yqylasy men aq batasy – sonyń aıqyn dáleli.
Árqaısyńyz – shynaıy qurmetke laıyqty naǵyz otanshyl azamatsyzdar.
Muny esh kúmánsiz, nyq senimmen aıtýǵa bolady. Sol sebepti, meniń Jarlyǵymmen kóptegen volonterler «Halyq alǵysy» medalimen marapattaldy»,-dedi memleket basshysy Qasym-Jomart Toqaev.
Anyǵyn aıtsaq, memleket basshysynyń tapsyrmasy boıynsha jasalǵan eriktilerdiń «Sabaqtastyq». «Saýlyq», «Taza álem», «Asyl Mura», «Qamqor», «Bilim», «Úmit» baǵyty boıynsha jasaǵan kómegi eresen boldy.
Osyǵan oraı bıylǵy jyly eriktilerdiń sany eki esege artyp, 100 myńǵa jetti. Pandemııanyń kezinde olardyń sany 500 myńnan asty. Joǵaryda atap kórsetilgen jeti baǵyt boıynsha bir jyldyń ishinde 18 qoldaý ortalyǵy, 6 myń daıyndyq ortalyǵy ashyldy. 2 myńnan asa shara ótkizilip, 1 mıllıonnan astam adamǵa kómek kórsetildi. Pandemııa ýaqytynda 3,5 myńnan astam volonter -medıkter, notarıýster, advokattar jáne zań fakýltetiniń stýdentteri azamattarǵa quqyqtyq turǵydan tegin zańdyq keńes berip, qoldaý kórsetti.
Memleket basshysy Qasym-Jomart Toqaev volonterlerdiń jylynyń jabylý rásiminde sóılegen sózinde eriktiler uıymy men qaıyrymdylyq qorlarynyń zańdyq mártebesi joq ekendigin aıta kelip, ««Meniń tapsyrmam boıynsha «Qaıyrymdylyq týraly» arnaıy zań ázirlenip jatyr,- dedi. Osyǵan baılanysty Prezıdent úkimetke birqatar tapsyrmalar berdi. Atap aıtqanda, qaıyrymdylyq qorlarynyń jumysy qalyptasý úshin alǵashqy jyly jeńil nesıe berýdi sheshý kerek. Volonterlik uıymdarǵa memleket jáne bıznes tarapynan qoldaý kórsetken lázim. Sondaı-aq qaıyrymdylyq qorlary qyzmetiniń ashyqtyǵyn qamtamasyz etý úshin olardyń resstrin engizý máselesin sheshken durys. Sonymen qatar, eriktiler uıymy jumysynyń kókjıegin keńeıtý úshin arnaıy granttar bólgen jón. Memleket basshysy eriktiler uıymyna jastar ǵana emes, aǵa urpaq ókilderi de belsene qatysyp jatqanyn aıta kelip, volonterlik qyzmetti qoldaýdyń biryńǵaı standartyn jasaýdy tapsyrdy.
Rasyn aıtý kerek, volonterler jyly shyndyǵynda da tabysty aıaqtaldy. «Adamzattyń bárin súı» baýyrym»,- dep aqyn Abaı atamyzdyń danalyq sóziniń aqıqaty aıqyn kórindi. Bir ǵana mysal, «Qoǵamdyq baqylaý» respýblıkalyq tobynyń úılestirýshisi Saıda Taýkeleva volonterler jylynda tabysty jumys istegenin aıtady. Derekpen sóılesek, «Qoǵamdyq baqylaý» Saıda Taýkelevanyń toby Qazaqstannyń barlyq aımaǵynda tynymsyz jumys istegen. Pandemııa kezinde olar Qazaqstanǵa kelip túsip jatqan gýmanıtarlyq kómektiń taratylýyna baqylaý júrgizgen. Osyǵan oraı olar 5 myńnan astam monıtorıngtik sharalar ótkizgen kórinedi.
Taǵy bir mysal, Prezıdent atap kórsetken «Birgemiz:umit» jobasy aıasynda iz-tússiz ketken qazaqstandyq 566 sarbazdyń esimi anyqtalǵan. Joba aıasynda eriktiler 1 myńnan asa joǵalǵan azamattardy izdeýge atsalysqan. Volonterler habarsyz ketken 50 adamdy tabýǵa kómektesken. Bizdiń eriktiler Qazaqstanda ǵana emes, BUU damytý baǵdarlamasy jumysy aıasynda Iordanııa, Kenııa jáne Túrkııa elderinde de jumys istegeni málim boldy. Mysaly, «Eriktiler lıgasy» qoǵamdyq uıymynyń jetekshisi Aısulý Ernııazova eriktiler jylyn jarııalap, jumystyń buqaralyq sıpat alýyna kyqpalyn tıgizgen memleket basshysy Qasym-Jomart Toqaevqa alǵysyn bildiredi. Onyń sózine sensek, árbir segizinshi qazaqstandyq eriktiler qataryn toltyryp tur.
Ras, azamyttyq qoǵamdy damytýda eriktilerdiń eńbegi eren. Jany qysylǵan jannyń júregi meıirim men izgilikti izdeıdi. Al jaqsy adamdar aınalańyzda tolyp jur. Solardyń biri – eriktiler toby. Olar adamzatty «baýyrym» dep súıedi. Eriktiler erigip júrgen joq. Olar jan-tánimen elge kómektesip júr.
