جەمقورلارعا قانداي تىيىم سالىنادى؟

1608
Adyrna.kz Telegram

قازاقستاندا سىبايلاس جەمقورلىق قىلمىسىن جاساعان ادامدى كۆازيمەملەكەتتىك سەكتور سۋبەكتىلەرىنە جۇمىسقا ورنالاستىرۋعا تىيىم سالىنباق. بۇل تۋرالى قر سىبايلاس جەمقورلىققا قارسى ءىس-قيمىل اگەنتتىگى توراعاسىنىڭ كەڭەسشىسى انار جاروۆا ايتتى، دەپ حابارلايدى «ادىرنا» ۇلتتىق پورتالى قازاقپارات ءتىلشىسىنە سىلتەمە جاساپ.

«كۆازيمەملەكەتتىك سەكتوردا مەملەكەتتىڭ ەلەۋلى اقشا اعىندارى مەن اكتيۆتەرى شوعىرلانعان، سوندىقتان بۇل جەردە سىبايلاس جەمقورلىق كورىنىستەرىنىڭ الدىن الۋ ماسەلەلەرى انتيكوردىڭ ءجىتى نازارىندا. بيىلدىڭ باسىنان بەرى سىبايلاس جەمقورلىق قىلمىستارىن جاساعانى ءۇشىن كۆازيمەملەكەتتىك سەكتوردىڭ 83 لاۋازىمدى تۇلعاسى انىقتالدى. ونىڭ ىشىندە 51-ءى ءارتۇرلى دارەجەدەگى باسشىلار (20-سى رەسپۋبليكالىق، 21-ءى وبلىستىق، 10-ى قالالىق جانە اۋداندىق دەڭگەيدەگى). وسى جىلدىڭ قاڭتار ايىنان باستاپ مەملەكەتتىڭ كەز كەلگەن قاتىسۋ ۇلەسى بار كۆازيمەملەكەتتىك سەكتوردىڭ لاۋازىمدى تۇلعالارى سىبايلاس جەمقورلىق سۋبەكتىلەرىنە جاتقىزىلعانىن اتاپ وتكەن ءجون.

ءتيىستى وزگەرىستەر قىلمىستىق كودەكسكە ەنگىزىلدى»، - دەدى ا. جاروۆا ونلاين بريفينگىدە. ايتا كەتەيىك، ەگەر بۇرىن قاتىسۋ ۇلەسى 50 پايىز جانە ودان جوعارى كومپانيالار عانا سىبايلاس جەمقورلىق سۋبەكتىلەرى بولسا، قازىر ونىڭ اۋقىمى ايتارلىقتاي كەڭەيدى. ياعني، كومپانيادا مەملەكەتتىڭ قاتىسۋىنىڭ 1 پايىزى بولسا دا، مۇنداي كومپانيالاردىڭ لاۋازىمدى ادامدارى سىبايلاس جەمقورلىق باپتارى بويىنشا جاۋاپقا تارتىلاتىن بولادى.

«سىبايلاس جەمقورلىققا قارسى ءىس-قيمىل تۋرالى» زاڭعا سايكەس مەملەكەتتىڭ كەز كەلگەن قاتىسۋ ۇلەسى بار كومپانيالاردا ۇيىمداستىرۋشىلىق-وكىمدىك جانە اكىمشىلىك-شارۋاشىلىق فۋنكتسيالارى بار ادامدار وسىنداي لاۋازىمدى ادامداردىڭ قاتارىنا جاتادى. جاقىندا بۇل ساناتقا بيۋدجەتتەن جانە ۇلتتىق قوردان قارجىلاندىرىلاتىن جوبالاردى ىسكە اسىرۋعا جانە ساتىپ الۋعا جاۋاپتى كۆازيمەملەكەتتىك سەكتور سۋبەكتىلەرىندەگى قۇرىلىمدىق بولىمشەلەردىڭ باسشىلارى دا كىردى.

«ايىپپۇل، شەكتەۋ نەمەسە باس بوستاندىعىنان ايىرۋ تۇرىندەگى نەگىزگى جازادان باسقا، مۇلكى تاركىلەنىپ، بەلگىلى ءبىر لاۋازىمداردى اتقارۋ نەمەسە بەلگىلى ءبىر قىزمەتپەن اينالىسۋ قۇقىعىنان ءومىر بويىنا ايىرۋ تۇرىندەگى قوسىمشا جازا تاعايىندالاتىن بولادى. كۆازيمەملەكەتتىك سەكتورداعى سىبايلاس جەمقورلىق ءۇشىن جاۋاپكەرشىلىكتى كۇشەيتەتىن تاعى دا بىرقاتار تۇزەتۋلەر قازىر پارلامەنتتە قارالۋدا»، - دەدى ا. جاروۆا. ونىڭ سوزىنە قاراعاندا، ەڭبەك كودەكسىنە سىبايلاس جەمقورلىق قىلمىس جاساعان ادامدى كۆازيمەملەكەتتىك سەكتور سۋبەكتىلەرىنە جۇمىسقا ورنالاستىرۋعا تىيىم سالۋ بولىگىندە تۇزەتۋلەر ەنگىزۋ ەسكەرىلىپ وتىر. قولدانىستاعى زاڭناماعا سايكەس، مۇنداي شەكتەۋ باسقارۋشىلىق فۋنكتسيالاردى ورىنداۋمەن بايلانىستى لاۋازىمدارعا تۇسۋگە عانا قاتىستى.

 

پىكىرلەر