2020 جىلدىڭ باسىنان بەرى تەحنوگەندىك سيپاتتاعى توتەنشە جاعدايلار جالپى توتەنشە جاعدايلاردىڭ سانىنىڭ
88,5%-ىن قۇراعان. بۇل تۋرالى «ادىرنا» ۇلتتىق پورتالى توتەنشە جاعدايلار مينيسترلىگىنىڭ رەسمي سايتىندا جاريالانعان اقپاراتقا سۇيەنە وتىرىپ حابارلايدى. تەحنوگەندىك سيپاتتاعى 10 358 وقيعا تىركەلىپ، 605 ادام زارداپ شەككەن (سونىڭ ىشىندە 294 ادام قازا بولدى.
تەحنوگەندىك سيپاتتاعى جاعدايلاردىڭ نەگىزگى ۇلەسى وندىرىستىك جانە تۇرمىستىق ورتكە (96,2%) تيەسىلى بولىپ كەلەدى. 2020 جىلدىڭ ون ايىندا 9 963 ءورت بولسا، ونىڭ زاردابى 497 ادامعا تيگەن، ولاردىڭ 255 ء–ى وكىنىشكە وراي قازا بولدى.
وسى ورتتەردىڭ سالدارىنان كەلتىرىلگەن ماتەريالدىق نۇقسان 2 184,1 ملن. تەڭگەنى قۇرادى.
ءورت سانى وتكەن جىلمەن سالىستسىرعاندا المات، اقتوبە، قاراعاندى، قوستاناي. تۇركىستان، جامبىل، ماڭعىستاۋ وبلىستارىندا، نۇر-سۇلتان قالاسىندا ازايسا، كەرىسىنشە باتىس-قازاقستان، شىعىس-قازاقستان، قىزىلوردا وبلىستارىندا كوبەيگەن.
ءورت كوبىنەسە تۇرعىن ءۇي سەكتورلارىندا ورىن الادى ەكەن، مۇنىڭ ۇلەس سالماعى 62,5 پايىزدى قۇراسا، ەكىنشى ورىندا كولىك-قۇرالدارىنىڭ ورتەنۋى ءجيى كەزدەسەدى، ول 15,3 پايىزعا تەڭ. ال ورمان ءورتىنىڭ ۇلەس سالماعى 6,3 پايىز بولسا، باسقا دا اشىق اۋماقتار 5,7 پايىزدى الادى، ساۋدا كاسىپورىندارى 3,5 پايىزعا، وندىرىستىك ماقساتتاعى عيماراتتار مەن قۇرىلىستار 1,5 پايىزعا، دالالار، شالعىندار، جايىلىمدار 1,2 پايىزعا، اكىمشىلىك-قوعامدىق عيماراتتار 1 پايىزعا، اۋىلشارۋاشىلىق وبەكتىلەرى 0,9 پايىزعا تەڭ.
ال ەندى ءورتتىڭ پايدا بولۋىنىڭ كەڭ تارالعان سەبەپتەرىنە توقتالساق، بۇل جەردە دە ادام قولىمەن جاسالعان، ءبىزدىڭ جاۋاپكەرشىلىگىمىزدىڭ ازدىعىنان بولاتىن ءورتتىڭ ۇلەس سالماعى باسىم ەكەندىگىن بايقاۋعا بولادى. مىسال، 40,4 پايىز جاعدايدا وتتى ابايسىز قولدانۋدىڭ سالدارىنان ءورت شىقسا، 28,2 پايىزدا ەلەكتر جابدىقتارىن تەحنيكالىق پايدالانۋ جانە مونتاجداۋ قاعيدالارىن بۇزۋدان بولىپ ءورت شىعادى ەكەن. 10,3 پايىزى پەشتەردى ورناتۋ جانە پايدالانۋ كەزىندە ءورت قاۋىپسىزدىگى قاعيدالارىن بۇزۋعا تيەسىلى بولسا، انىقتالعان ادەيى ورتەۋدىڭ ۇلەسى 6,2 پايىزعا تەڭ, تۇرمىستىق ەلەكتر اسپاپتارىن پايدالانۋ كەزىندە ءورت قاۋىپسىزدىگى قاعيدالارىن بۇزۋ سالدارىنان بولاتىن ءورتتىڭ ۇلەس سالماعى 3,6 پايىزدى قۇراسا، 3,3 پايىز جاعدايدا نايزاعايدىڭ تىكەلەي سوعۋى جانە ولاردان تۋىنداعان ىقپالدى اسەردەن بولسا، 2,6 پايىزى بالالاردىڭ وتپەن ويناۋىنا تيەسىلى ەكەن.
مىنا ستاتيستيكاعا قاراپ وتىرىپ، ءبىز ءوز-وزىمىزگە وسىنشاما جاۋ بولىپ كەتكەنبىز بە؟ – دەگەن وي تۋادى. ءبىر عانا قاتەلىكتەن بولىپ، ءسال ششالىس باسقاندىقتان، جاۋاپسىزدىعىمىزدىڭ سالدارىنان ورنى تولماس وقيعاعا تاپ بولاتىنىمىزدى بىلە تۇرا، نەگە اباي بولمايمىز ەكەن؟ ءورت ءتىلسىز جاۋ، ونى ءبارىمىز مويىندايمىز. الايدا سول ءتىلسىز جاۋدىڭ سايرانداۋىنا كوپ جاعدايدا ءوز قولىمىزبەن جاعداي جاسايتىنىمىز وكىنىشتى.
ەركە جومارت،
«ادىرنا» ۇلتتىق پورتالى
