قر ورتالىق سايلاۋ كوميسسياسى الداعى سايلاۋ ناۋقانىنا قاتىستى وتىنىشتەرمەن ءتيىمدى جۇمىستى جولعا قويعان. مۇنداي پىكىردى ەۋرازيالىق ينتەگراتسيا ينستيتۋتىنىڭ ساراپشىسى قازىبەك مايگەلدينوۆ ءبىلدىردى، دەپ حابارلايدى “ادىرنا” ۇلتتىق پورتالى قازاقپاراتقا سىلتەمە جاساپ.
«سايلاۋالدى ناۋقان قارقىن الىپ كەلە جاتىر. بۇل رەتتە حالىقتىڭ ازاماتتىق بەلسەندىلىگىمەن قاتار، پارتيالاردىڭ بەلسەندىلىگى دە ارتا تۇسۋدە. دەگەنمەن، قوعام ءۇشىن ءوزىنىڭ ساياسي مادەنيەتىن كوتەرۋ ماڭىزدى. ول ءۇشىن وكىلەتتى ورگاندار كەڭ بۇقارا اراسىندا ازاماتتىق، قۇقىقتىق اعارتۋشىلىق ءۇشىن ءتۇسىندىرۋ جۇمىستارىن ساپالى ءارى رەت-رەتىمەن جۇرگىزۋى ءتيىس»، - دەدى ساراپشى.
وسى رەتتە ول كەشە ورتالىق سايلاۋ كوميسسياسى وتىرىسىن وتكىزىپ، ءوزىنىڭ وكىلەتتىگىنە قاتىستى تۇسىندىرمە بەرگەنىن ايتادى. ماسەلەن، سايلاۋ جاريالانعان كۇن – 21 قازاننان باستاپ بۇگىنگە دەيىن ورتالىق سايلاۋ كوميسسياسىنا 34 ءوتىنىش كەلىپ ءتۇستى. بەسەۋى – جەكە تۇلعالاردان، 29 – زاڭدى تۇلعالاردان، ونىڭ ىشىندە 13 – باق-تان. كوتەرىلەتىن ماسەلەلەردىڭ سيپاتى بويىنشا وتىنىشتەردى بىلايشا بولۋگە بولادى: 50 پايىزى، ياعني 17 ءوتىنىش «سايلاۋ تۋرالى» زاڭنىڭ نورمالارىن ءتۇسىندىرۋ تۋرالى، 17 پايىزى – سايلاۋ پروتسەسىن ۇيىمداستىرۋ ماسەلەلەرى بويىنشا اقپارات بەرۋ، 12 پايىزى – سايلاۋ زاڭناماسىن جانە وسك قىزمەتىن جەتىلدىرۋ جونىندەگى ۇسىنىستار، 21 پايىزى – وزگە دە ماسەلەلەر بويىنشا. كورسەتىلگەن كەزەڭ ىشىندە كەلىپ تۇسكەن 34 ءوتىنىشتىڭ ىشىنەن وسك اپپاراتى تاراپىنان 22-سىنە بەلگىلەنگەن مەرزىمدە ءوتىنىش بەرۋشىلەرگە تولىق جاۋاپ بەرىلدى. 4-ەۋى ورتالىق سايلاۋ كوميسسياسىنىڭ قۇزىرەتىنە كىرمەيتىندىكتەن، زاڭدا بەلگىلەنگەن تارتىپپەن مەملەكەتتىك ورگاندارعا قايتا جولداندى. قايتا جاسالعان ءبىر ءوتىنىش قاراۋسىز قالدىرىلدى.
باق-تىڭ ەكى اقپاراتتىق حابارلاماسى وسك سايتىندا ورنالاستىرىلدى. 5 ءوتىنىش قارالۋدا. ورىندالماعان وتىنىشتەر جوق. «دەر ۋاقىتىندا اقپاراتتاندىرۋدىڭ مۇنداي ءۇردىسىن حالىقتىڭ، سونىمەن قاتار ساياسي پارتيالاردىڭ تاراپىنان ساۋال رەتىندە قابىلداپ، تۇراقتى مونيتورينگ رەجيمىن قولدانا وتىرىپ جالعاستىرۋ قاجەت. سوڭىندا اقپاراتتىق قىسىم مەن قانداي دا ءبىر جاعدايدى قيىس تۇسىندىرۋلەر ورىن المايدى. ال ونداي جاعدايلار سايلاۋ جاقىنداعان سايىن از بولمايتىندىعى تۇسىنىكتى»، - دەدى قازىبەك مايگەلدينوۆ.
