جاقىندا بوزجىرا تابيعي قورىعىنىڭ جانىنان قوناق ءۇي سالۋ جوباسى ۇسىنىلعان بولاتىن. الايدا بۇل جوبا قوعامدا قىزۋ تالقىعا ءتۇستى. مەملەكەت باسشىسى حالىقتىڭ تەرىس پىكىرىن ەسكەرە وتىرىپ، قوناق ءۇي سالۋ ماسەلەسىن قايتا قاراۋدى تاپسىردى. بۇل تۋرالى پرەزيدەنتتىڭ ءباسپاسوز حاتشىسى بەرىك ءۋالي Facebook جەلىسىندەگى رەسمي پاراقشاسىندا جازدى، دەپ حابارلايدى «ادىرنا» ۇلتتىق پورتالى.
«ماڭعىستاۋ وبلىسىندا ءتۋريزمدى دامىتۋ – ۇكىمەتكە جۇكتەلگەن ماڭىزدى مىندەتتەردىڭ ءبىرى. بۇگىندە بۇل باعىتتا جۇمىستار باستالىپ كەتتى. بەس جۇلدىزدى قوناق ءۇي سالىنىپ، جايلى مەيمانحانالاردىڭ تۇتاس جەلىسىن قۇرۋ جوسپارلانىپ وتىر. مۇنداي جۇيەلى جۇمىستار ايماقتىڭ تۋريستىك تارتىمدىلىعىن ارتتىراتىنى ءسوزسىز.
جاقىندا بوزجىرا تابيعي قورىعىنىڭ جانىنان قوناق ءۇي سالۋ جوباسى ۇسىنىلدى. وكىنىشكە قاراي، قازىرگى كەزدە قورىقتىڭ اينالاسىنداعى تۋريزم تابيعاتتى قورعاۋ شارالارىن ساقتاماي، بەيبەرەكەت دامىپ جاتىر. بۇل وسى ەرەكشە تابيعات قوراعىنا وراسان زيانىن تيگىزۋدە»،-دەدى ول.
ءباسپاسوز حاتشىسى پرەزيدەنتتىڭ ەكولوگيالىق ءتۋريزمدى وركەنيەتتى جولمەن دامىتۋدى قولدايتىنىن اتاپ ءوتتى.
«ول ءۇشىن قاجەتتى ينفراقۇرىلىم، ەڭ الدىمەن، جايلى قوناقۇيلەر قاجەت. سوندىقتان مەملەكەت باسشىسى ۇكىمەتكە قوناق ءۇي سالۋ جوباسىن قايتا قاراۋدى تاپسىردى. بىراق، بۇل جوبا وسىمەن توقتايدى دەگەندى بىلدىرمەيدى. قوعامدىق كەڭەستەردىڭ، ەكولوگ ساراپشىلاردىڭ جانە مەملەكەتتىك ۆەدومستۆولاردىڭ وي-پىكىرلەرى ەسكەرىلە وتىرىپ، قوناق ءۇي سالۋعا ارنالعان باسقا ىڭعايلى جەر تاڭدالادى»،- دەپ ءسوزىن قورىتىندىلادى بەرىك ءۋالي.
«ادىرنا» ۇلتتىق پورتالى
