ماجىلىستەگى پارتيالىق تىزىمگە اقتوبە وبلىسىنان ۇسىنىلعان ۇمىتكەرلەردىڭ ىشىندە جاستار جانە مەديتسينا قىزمەتكەرى بار. ولار پارتيانىڭ اقتوبە وبلىستىق فيليالىنىڭ كەزەكتەن تىس XXX كونفەرەنتسياسىندا پىكىرسايىس پەن داۋىس بەرۋ قورىتىندىسى ارقىلى انىقتالدى.
كونفەرەنتسيا بارىسىندا ماجىلىسكە Nur Otan-نىڭ پارتيالىق تىزىمىنە ۇمىتكەرلەر اراسىندا پىكىرسايىس ءوتتى. ولار ءوز سايلاۋالدى باعدارلاماسى بويىنشا ماسەلەلەردى شەشۋ جولدارىن ۇسىنىپ، ءبىر-بىرىنە سۇراقتار قويدى. پىكىرسايىس قورىتىندىسى بويىنشا 15 ۇمىتكەرگە «پرايمەريز» اقپاراتتىق جۇيەسى ارقىلى 109 دەلەگات داۋىس بەردى. ناتيجەسىندە ەڭ كوپ ۇپاي جيناعان تورتەۋى وبلىستىڭ وكىلدىك كۆوتاسىنا سايكەس ماجىلىستەگى پارتيالىق تىزىمگە ۇمىتكەر رەتىندە ەندى.
اتاپ ايتقاندا، گرەك-ريم، ەركىن جانە ايەلدەر كۇرەسى وبلىستىق فەدەراتسياسىنىڭ پرەزيدەنتى راحات سىدىقوۆ ەڭ كوپ داۋىس جينادى. ەكىنشى ورىندى 96 داۋىسپەن مەملەكەتتىك قىزمەتكەر امانعالي بەردالين يەلەندى. سونىمەن قاتار تىزىمگە «DARU Medical Group» باس ديرەكتورى عالىمجان ەلەۋوۆ، «Jas Otan» جاستار قاناتى اقتوبە وبلىستىق فيليالىنىڭ توراعاسى اسىلجان بۇركىتالين كىردى.
– بۇگىنگى پرايمەريز – بۇل ورتاق جەڭىسىمىز. سەبەبى ارمانىمىز ءبىر – ەل مەن حالىققا قىزمەت ەتۋ، مەملەكەتىمىزدى كوركەيتۋ. پىكىرسايىس بارىسىندا ءتۇرلى ماسەلە كوتەرىلدى، ونىڭ شەشۋ جولدارى دا ايتىلدى. مۇندا «جۇزدەن جۇيرىك، مىڭنان تۇلپار» دەگەندەي ەڭ ۇزدىگى انىقتالدى، - دەدى پارتيانىڭ وبلىستىق فيليالىنىڭ توراعاسى، وبلىس اكىمى وڭداسىن ورازالين.
كونفەرەنيادا وبلىستىق ماسليحاتقا 50 ادامنان تۇراتىن پارتيالىق ءتىزىم بەكىتىلدى. ونىڭ ىشىندە ايەلدەردىڭ ۇلەسى 9 پايىزدان 30 پايىزعا دەيىن، ال 35 جاسقا دەيىنگى جاستار - 20 پايىزعا ارتتى. قازىرگى قىزمەت ەتىپ وتىرعان ءماسليحاتتىڭ قۇرامىمەن سالىستىرعاندا ورتاشا جاس 6 جاسقا، ياعني 52-دەن 46 جاسقا دەيىن جاساردى.
تىزىمدەگىلەردىڭ 41 پايىزىن شاعىن جانە ورتا بيزنەس وكىلدەرى قۇرادى. ال ءبىلىم بەرۋ سالاسى 13 پايىز، كۆازيمەملەكەتتىك سەكتور– 8 پايىز. سونداي-اق، كونفەرەنتسيادا وبلىستىق سايلاۋالدى باعدارلاما بەكىتىلىپ، پارتيانىڭ كەزەكتەن تىس XX سەزىنە دەلەگاتتار سايلاندى.
ايتا كەتۋ كەرەك، وبلىس بويىنشا پرايمەريزدىڭ ءبىرىنشى كەزەڭىنە 460 ۇمىتكەر قاتىستى. ونىڭ 36,7 پايىزىن – ايەلدەر، 28 پايىزىن – 35 جاسقا دەيىنگى جاستار قۇرادى. كانديداتتاردىڭ 50,4 پايىزى باستاۋىش پارتيا ۇيىمدارىنان ۇسىنىلسا، ال 49,6 پايىزى – ءوزىن-ءوزى ۇسىنۋشىلار. داۋىس بەرۋگە 28,6 مىڭنان استام پارتيا مۇشەسى قاتىستى.
