ءۇندىستان 24 جەلتوقسان كۇنى LVM3 زىمىراندىق كەشەنى ارقىلى AST SpaceMobile كومپانياسىنىڭ BlueBird 6 بايلانىس سپۋتنيگىن وربيتاعا شىعاردى، دەپ حابارلايدى "ادىرنا" ۇلتتىق پورتالى.
بۇل – ءموبيلدى تەلەفوندارمەن تىكەلەي بايلانىس ورناتاتىن جاڭا بۋىن اپپاراتىنىڭ العاش قادامدارى.
ەلدىڭ عارىشتىق زەرتتەۋ ۇيىمى (ISRO) تاريحىنداعى ەڭ اۋىر سپۋتنيك رەتىندە ەسەپتەلەتىن BlueBird 6 شامامەن 6,1 توننا سالماققا يە.
سپۋتنيك ساتيشا دحاۆان اتىنداعى كوسمودرومنان ۇشىرىلىپ، شامامەن 15 مينۋتتان كەيىن ءساتتى وربيتاعا شىقتى.
ISRO باسشىسى ۆ. ناراياناننىڭ ايتۋىنشا، بۇل ميسسيا – ءۇندىستاننىڭ عارىشتاعى اۋقىمدى جۇمىسىنىڭ ءبىر بولىگى. ەل بۇرىننان 434 سپۋتنيكتى 34 مەملەكەتكە شىعارعان، ونىڭ ىشىندە 72 اپپارات OneWeb توپتاماسىنا جاتادى.
AST SpaceMobile كومپانياسىنىڭ نەگىزىن قالاۋشى ءارى باس ديرەكتورى ابەل اۆەليان سپۋتنيكتىڭ شتاتتىق رەجيمدە جۇمىس ىستەپ جاتقانىن جانە تەلەمەتريالىق باقىلاۋدىڭ نورماسىندا ەكەنىن حابارلادى. BlueBird 6 فازالى انتەننالىق تورىنىڭ اۋماعى شامامەن 223 شارشى مەتردى قۇرايدى، بۇل ونى BlueBird 1–5 سپۋتنيكتەرىنەن 3,5 ەسە ۇلكەن ەتەدى.
كومپانيانىڭ جوسپارىنا سايكەس، 2026 جىلدىڭ سوڭىنا دەيىن 45–60 جاڭا سپۋتنيك وربيتاعا شىعارىلىپ، اقش پەن باسقا نارىقتاردا ءماتىن، داۋىس جانە 5G دەرەكتەرىن جەتكىزۋ قىزمەتىن تولىق قامتاماسىز ەتۋ كوزدەلگەن. ءار سپۋتنيك كادىمگى سمارتفوندارمەن تىكەلەي بايلانىس ورناتا الادى.
