قازاقستاننىڭ ەڭبەك سىڭىرگەن قايراتكەرى، بەلگىلى اكتەر، ستسەناريست، كينودراماتۋرگ نۇرلان سەگىزباەۆ ومىردەن ءوتتى. قايعىلى حابارلى قر مادەنيەت جانە اقپارات مينيسترلىگى حابارلاپ، مارقۇمنىڭ وتباسى مەن جاقىن تۋىستارىنا، تۋعان حالقىنا قايعىرا كوڭىل ايتتى، دەپ حابارلايدى “ادىرنا”.
“نۇرلان سانجارۇلى – قازاق مادەنيەتى مەن ونەرىنىڭ دامۋىنا ەلەۋلى ۇلەس قوسقان تۇلعا. ول ءوز عۇمىرىن شىعارماشىلىققا، ۇلتتىق رۋحانياتقا ارناپ، كەيىنگى ۇرپاققا ونەگە بولاتىن مول مۇرا قالدىردى. ونەرسۇيەر جۇرتشىلىققا ءالى كۇنگە قۇندىلىعىن جويماي كەلە جاتقان ابدوللا قارساقباەۆتىڭ «مەنىڭ اتىم قوجا» فيلمىندەگى باستى رولىمەن تانىمال ونەر يەسى قازاق كينو ونەرىندەگى دارا تۇلعا بولدى. ونىڭ ەكراندا جاساعان كوركەم بەينەلەرى وتاندىق ونەر تاريحىندا ايرىقشا ورىن الادى.
نۇرلان سانجارۇلىنىڭ جارقىن بەينەسى، شىعارماشىلىق مۇراسى مەن عيبراتتى عۇمىر جولى حالقىمىزدىڭ جادىندا ماڭگى ساقتالادى دەپ سەنەمىز.
مارقۇمنىڭ جانى ءجانناتتا، يمانى سالامات، توپىراعى تورقا بولعاي”، دەلىنگەن مينيسترلىك حابارلاماسىندا.
