اقش پرەزيدەنتى دونالد ترامپ يراننىڭ ەڭ باستى يادرولىق نىسانى ورنالاسقان نۇكتەگە سوققى جاساماق بولعان، دەپ حابارلايدى «ادىرنا» ۇلتتىق پورتالى. ول ءوزىنىڭ كەڭەسشىلەرىمەن اقىلداسقاننان كەيىن وسى ماسەلەگە قاتىستى تاعى دا شاعىن جيىن وتكىزگەن.
الايدا ۆيتسە-پرەزيدەنت مايك پەيس، مەملەكەتتىك حاتشى مايك پومپەو جانە قورعانىس ءمينيسترى قىزمەتىن اتقارۋشى كريستوفەر ميللەر مەن اقش اۋە كۇشتەرى كوميتەتى شتابىنىڭ باسشىسى, گەنەرال مارك ميللي پرەزيدەنت ترامپتى رايىنان قايتارعان كورىنەدى.
The New York Times باسىلىمىنىڭ جازۋىنا قاراعاندا، بۇل جيىن 12 قاراشا كۇنى وتكەن. دونالد ترامپتىڭ ماڭايىنداعى اتالعان شەنەۋنىكتەر ەگەر يرانننىڭ يادرولىق نىسانىنا اقش تاراپىنان سوققى جاسالا قالعان جاعدايدا مۇنىڭ زاردابى زور بولاتىنىن ايتقان. سونىمەن قاتار، الەمدىك اۋقىمدا جاڭا تەكەتىرەس جانە شۋلى داۋ تۋىنداۋى مۇمكىن ەكەندىگىن ەسكەرتكەن. سودان كەيىن عانا بارىپ، دونالد ترامپ ايتقانىنان قايتقان.
الايدا ءالى دە ءوز جەڭىلىسىن مويىنداماي وتىرعان ترامپ يرانعا قاتىستى كەيبىر ماسەلەلەرگە دەيلىكپەي وتىرعان سياقتى. Axios اقپاراتتىق پورتالىنىڭ جازۋىنا قاراعاندا، جاقىن ۋاقىتتاردا يزرايل جانە پارسى شىعاناعىنداعى بىرنەشە ەلدەرمەن بىرگە يران ەكونوميكاسىنا نۇقسان كەلتىرەتىن ءبىرقاتار سانكتسيالار سالماق. پرەزيدەنت ترامپ مۇنىڭ ءبارىن قاڭتار ايىندا وتەتىن بايدەننىڭ يناۋگۋراتسياسىنا دەيىن جاساماق نيەتتە.
ەسكەرتە كەتەيىك، اقش پەن يراننىڭ اراسى وتكەن جىلدىڭ باسىندا باعدات حالىقارالىق اۋەجايىنا قونباق بولعان يران گەنەرالى كاسەم سۋلەيمانيدىڭ ۇشاعى اتىپ تۇسىرىلگەننەن كەيىن ۋشىعا ءتۇسكەن. وعان جاۋاپ رەتىندە يران تاراپى يراك بازالارىنا بىرنەشە رەت راكەتامەن سوققى جاساعانى بەلگىلى. قالاي ايتقاندا دا، دونالد ترامپ پرەزيدەنتتىكتەن كەتەر الدىندا اق ءۇيدىڭ جاڭا باسشىسى دجو بايدەنگە حالىقارالىق جاعدايدى ۋشىقتىراتىن ءتۇيىندى ماسەلەلەر قالدىرىپ كەتپەك.
ەركىن قالدان،
«ادىرنا» ۇلتتىق پورتالى
