AQSh prezıdenti Donald Tramp Irannyń eń basty ıadrolyq nysany ornalasqan núktege soqqy jasamaq bolǵan, dep habarlaıdy «Adyrna» ulttyq portaly. Ol óziniń keńesshilerimen aqyldasqannan keıin osy máselege qatysty taǵy da shaǵyn jıyn ótkizgen.
Alaıda vıe-prezıdent Maık Peıs, Memlekettik hatshy Maık Pompeo jáne Qorǵanys mınıstri qyzmetin atqarýshy Krıstofer Mıller men AQSh Áýe kúshteri komıteti shtabynyń basshysy, general Mark Mıllı prezıdent Trampty raıynan qaıtarǵan kórinedi.
The New York Times basylymynyń jazýyna qaraǵanda, bul jıyn 12 qarasha kúni ótken. Donald Tramptyń mańaıyndaǵy atalǵan sheneýnikter eger Irannnyń ıadrolyq nysanyna AQSh tarapynan soqqy jasala qalǵan jaǵdaıda munyń zardaby zor bolatynyn aıtqan. Sonymen qatar, álemdik aýqymda jańa teketires jáne shýly daý týyndaýy múmkin ekendigin eskertken. Sodan keıin ǵana baryp, Donald Tramp aıtqanynan qaıtqan.
Alaıda áli de óz jeńilisin moıyndamaı otyrǵan Tramp Iranǵa qatysty keıbir máselelerge deılikpeı otyrǵan sııaqty. Axios aqparattyq portalynyń jazýyna qaraǵanda, jaqyn ýaqyttarda Izraıl jáne Parsy shyǵanaǵyndaǵy birneshe eldermen birge Iran ekonomıkasyna nuqsan keltiretin birqatar sankııalar salmaq. Prezıdent Tramp munyń bárin qańtar aıynda ótetin Baıdenniń ınaýgýraııasyna deıin jasamaq nıette.
Eskerte keteıik, AQSh pen Irannyń arasy ótken jyldyń basynda Baǵdat halyqaralyq áýejaıyna qonbaq bolǵan Iran generaly Kasem Sýleımanıdyń ushaǵy atyp túsirilgennen keıin ýshyǵa túsken. Oǵan jaýap retinde Iran tarapy Irak bazalaryna birneshe ret raketamen soqqy jasaǵany belgili. Qalaı aıtqanda da, Donald Tramp prezıdenttikten keter aldynda Aq úıdiń jańa basshysy Djo Baıdenge halyqaralyq jaǵdaıdy ýshyqtyratyn túıindi máseleler qaldyryp ketpek.
Erkin QALDAN,
«Adyrna» ulttyq portaly
