«مير» تەلەارناسى كەڭەس وداعىن اڭساي مa?

2085
Adyrna.kz Telegram

قازىرگى ۋاقىتتا كورەرمەننىڭ مۇمكىندىگى كوپ. ينتەرنەت نەمەسە ارنايى كابەلدىك تەلەارنا ارقىلى دۇنيەنىڭ حابارىن ەستىپ، كينوسىن كورە الادى.

ايتايىن دەگەنىمىز، «مير» اتتى تەلەارنا بار. بۇكىل تمد كەڭىستىگىنە تارايدى. مۇنى بۇرىنعى كەڭەس وداعى ەلدەرىنىڭ كورەرمەندەرى كورەدى. دۇرىس-اق دەلىك. بىراق وسى تەلەارنانى ارنايى  قاراپ وتىرساڭىز، مۇندا ارنايى ايدار بار. كەلمەسكە كەتكەن كەڭەس وداعىن اڭساي ما، ودان حابارىمىز جوق. بىراق ادەيى «وتدەل سسسر» دەپ ايدار اشىپ قويعان. بۇل بولىمدە تمد اۋماعىنداعى اقپاراتتار، ناقتى ايتساق، بۇرىن كسرو كەزىندە تۇسىرىلگەن كينوتۋىندىلار كورسەتىلەدى. ءبىر قىزىعى، كورىپ وتىرعان كينوڭ بىتكەنشە، «وتدەل سسسر» دەگەن جازۋ ەكراننىڭ ءبىر شەتىندە تايعا تاڭبا باسقانداي ۇنەمى كورىنىپ  تۇرادى. راس، ادامزاتتىق ىزگىلىكتى تۋ ەتكەن كەڭەس كينولارىنىڭ جامانى جوق. بىراق قىزىل كوممۋنيستەر باسشىلىق ەتكەن، قۇردىمعا كەتكەن يمپەريانى قايتا-قايتا ەسكە  سالا بەرۋدىڭ  قاجەتى بار ما؟

بۇل تەلەارنا باسشىلىعىنىڭ ىشكى جۇمىسى شىعار. بىراق «وتدەل سسسر» دەمەي-اق، باسقا ايدار تاعىپ، كورەرمەندەردىڭ ىستىق ىقىلاسىنا بولەنۋگە بولادى ەمەس پە؟ كورەرمەندى تەلەارناعا تارتۋدىڭ جولى كوپ قوي. راس، كەڭەس وداعى كەزىندە كينو ونەرىنىڭ التىن جاۋھارلارى كوپ تۇسىرىلگەنىنەن جوققا شىعارا المايمىز. بىراق حابار تاراتۋدىڭ، ايدار قويۋدىڭ دا ءوز ءتارتىبى، ادەبى بار ەمەس پە؟  

سوندا كرەمل وتكەندى كوكسەي مە؟ «مير» تەلەارناسى نەنى اڭسايدى؟ كەڭەس وداعىن با؟ وتكەن ۋاقىتتىڭ كينوسى دۇرىس شىعار، بىراق يمپەريالىق پيعىلمەن جوق مەملەكەتتى ەسكە تۇسىرە  بەرۋ «مير» تەلەارناسىنا قانشالىقتى كەرەك؟

...ايتپاعىمىز وسى ەدى.

ەركىن قالدان،

«ادىرنا» ۇلتتىق پورتالى

پىكىرلەر