Qazirgi ýaqytta kórermenniń múmkindigi kóp. Internet nemese arnaıy kabeldik telearna arqyly dúnıeniń habaryn estip, kınosyn kóre alady.
Aıtaıyn degenimiz, «Mır» atty telearna bar. Búkil TMD keńistigine taraıdy. Muny burynǵy Keńes Odaǵy elderiniń kórermenderi kóredi. Durys-aq delik. Biraq osy telearnany arnaıy qarap otyrsańyz, munda arnaıy aıdar bar. Kelmeske ketken Keńes Odaǵyn ańsaı ma, odan habarymyz joq. Biraq ádeıi «Otdel SSSR» dep aıdar ashyp qoıǵan. Bul bólimde TMD aýmaǵyndaǵy aqparattar, naqty aıtsaq, buryn KSRO kezinde túsirilgen kınotýyndylar kórsetiledi. Bir qyzyǵy, kórip otyrǵan kınoń bitkenshe, «Otdel SSSR» degen jazý ekrannyń bir shetinde taıǵa tańba basqandaı únemi kórinip turady. Ras, adamzattyq izgilikti tý etken keńes kınolarynyń jamany joq. Biraq qyzyl kommýnıster basshylyq etken, qurdymǵa ketken ımperııany qaıta-qaıta eske sala berýdiń qajeti bar ma?
Bul telearna basshylyǵynyń ishki jumysy shyǵar. Biraq «Otdel SSSR» demeı-aq, basqa aıdar taǵyp, kórermenderdiń ystyq yqylasyna bólenýge bolady emes pe? Kórermendi telearnaǵa tartýdyń joly kóp qoı. Ras, Keńes Odaǵy kezinde kıno óneriniń altyn jaýharlary kóp túsirilgeninen joqqa shyǵara almaımyz. Biraq habar taratýdyń, aıdar qoıýdyń da óz tártibi, ádebi bar emes pe?
Sonda Kreml ótkendi kókseı me? «Mır» telearnasy neni ańsaıdy? Keńes Odaǵyn ba? Ótken ýaqyttyń kınosy durys shyǵar, biraq ımperııalyq pıǵylmen joq memleketti eske túsire berý «Mır» telearnasyna qanshalyqty kerek?
...Aıtpaǵymyz osy edi.
Erkin QALDAN,
«Adyrna» ulttyq portaly
