ون جىلدان استام ۋاقىت بويى قازاقستان پرەزيدەنتى نۇرسۇلتان نازارباەۆتىڭ ەسىمىمەن اتالعان ارمەنيانىڭ شيراك وبلىسى، ارتيك اۋدانى، اريچ اۋىلىنداعى كوشە اتاۋسىز قالدى، دەپ حابارلايدى «ادىرنا» ۇلتتىق پورتالى ازاتتىق راديوسىنا سىلتەمە جاساپ.
"نازارباەۆ ارمەنياعا كەلمەدى"
اريچ اۋىلى اكىمشىلىگىنىڭ باسشىسى رولاند نازارەتياننىڭ ايتۋىنشا، نازارباەۆ كوشەسىنىڭ اتاۋىن وزگەرتۋ تۋرالى شەشىم وتكەن اپتادا اۋىل اقساقالدارى كەڭەسىنىڭ وتىرىسىندا قابىلدانعان.
— ءبىز دۇرىس ارەكەت جاسادىق دەپ ويلايمىز. سەبەبى نازارباەۆ ارمەنياعا كەلگەمەدى. ول: ء"ازىربايجاندار – ءبىزدىڭ باۋىرىمىز، ارمياندار ولاردى ءولتىردى", - دەدى. بۇل نەنى بىلدىرەدى؟ - دەپ اۋىل باسشىسى سۇراق قويادى.
جاقىندا تاۋلى قاراباق ايماعىنداعى قاقتىعىستار كەزىندە قازاقستان پرەزيدەنتى ارمەنيا مەن ءازىربايجاندى قاقتىعىستى بەيبىت جولمەن شەشۋگە شاقىردى. نازارەتيان ايتقان مالىمدەمە بولماعان ەدى.
بىرنەشە كۇن بۇرىن اريچ اۋىلىندا "نازارباەۆ كوشەسى"دەگەن بەلگى الىنىپ تاستالدى. كوشەگە جاڭا اتاۋ ءالى بەرىلگەن جوق.
- اتاۋلاردىڭ ءتورت-بەس نۇسقاسى بار. ازىرگە ناقتى شەشىم قابىلدانعان جوق، - دەيدى رولاند نازارەتيان.
اريچ اۋىلىندا نازارباەۆ اتىنداعى كوشەدەن باسقا، جەرگىلىكتى كىتاپحانادا وعان ارنالعان بۇرىش بار. نازارەتيان بۇرىشقا قول تيگىزبەگەنىن، بىراق قابىرعادان نازارباەۆتىڭ ۇلكەن پورترەتىن الىپ تاستادى دەيدى.
اريچ اۋىلىنىڭ تۇرعىنى تيگران مانۆەلياننىڭ ايتۋىنشا، تاۋلى قاراباق سالدارىنان ءازىربايجان مەن ارمەنيا اراسىنداعى قاقتىعىس جاقىندا شيەلەنىسىپ، وسى وقيعالارعا بايلانىستى قازاقستان تاراپىنان ايتىلعان مالىمدەمەلەردەن كەيىن اۋىل تۇرعىندارى قاتتى اشۋلانعان. جوعارىدان نازارباەۆ كوشەسىنىڭ اتاۋىن وزگەرتۋ تۋرالى نۇسقاۋ كەلىپ ءتۇستى جانە اقساقالدار كەڭەسى ءتيىستى شەشىم قابىلداعان.
- شىنىمدى ايتسام، ءبىزدىڭ اكىمشىلىك بارىنشا قارسى تۇردى. بىراق ءسىز بىلەسىز بە، بۇل مۇمكىن بولمادى. ويتكەنى جوعارىدان ولار قاتتى قىسىم جاساپ، تالاپ ەتتى. مىندەتتى تۇردە باسقا ەسىم ەمەس، ءبىزدىڭ قۇرمەتتى نازارباەۆتىڭ ەسىمىن الىپ تاستاۋ كەرەك بولدى. اۋىل تۇرعىندارى دا بۇعان قاتتى اشۋلاندى. سەبەبى بۇل سوعىستا (تاۋلى قاراباحتاعى قارۋلى قاقتىعىس - رەد.) جاستار شەيىت بولدى، - دەيدى تيگران مانۆەليان.
قازاقستان ەلشىلىگى نە دەيدى؟
جەرگىلىكتى تۇرعىنداردىڭ ايتۋىنشا، اريچ اۋىلىندا نازارباەۆ اتىنداعى كوشە 1995 جىلى ەكى حالىق اراسىنداعى دوستىق قارىم-قاتىناس قۇرمەتىنە اشىلعان. قازاقستاننىڭ ارمەنياداعى ەلشىلىگىنىڭ باستاماسىمەن 2011 جىلى اۋىلدىق كىتاپحانادا پرەزيدەنت نۇرسۇلتان نازارباەۆقا ارنالعان بۇرىش اشىلدى. بۇعان دەيىن ازاتتىق قازاقستان ەلشىلىگى جەرگىلىكتى كىتاپحاناعا جىلىنا بىرنەشە رەت سىيلىقتار بەرەتىنىن جازعان بولاتىن.
دەگەنمەن، قازاقستاننىڭ ارمەنياداعى ەلشىلىگىنىڭ وكىلدەرى اريچتا "نازارباەۆ كوشەسى رەسمي تۇردە مۇلدە جوق" دەپ وتىر.
- رەسمي تۇردە ول جەردە (اريچ اۋىلىندا – رەد.) مۇنداي كوشە جوق. اۋىل تۇرعىندارى وزدەرى كوشەنىڭ اتى جازىلعان تاقتايشانى ءىلىپ قويعان، - دەيدى ەلشىلىك وكىلى اسكەر كيىكوۆ.
الايدا اريچ اۋىلى اكىمشىلىگىنىڭ باسشىسى رولاند نازارەتيان كوشەگە نازارباەۆتىڭ ەسىمىن بەرۋ تۋرالى ارنايى شەشىم بولعانىن ايتادى.
نازارباەۆ اتىنداعى كوشە اتاۋىنىڭ كۇشىن جويۋعا 8 ساۋىردە ەرەۆاندا وتكىزۋ بەلگىلەنگەن ەەوكو-عا قاتىسۋشى مەملەكەتتەردىڭ پرەمەر-مينيسترلەرىنىڭ ۇكىمەتارالىق كەڭەسى وتىرىسىنىڭ بۇزىلۋى سەبەپ بولدى. قازاقستان پرەمەر-ءمينيسترى كارىم ءماسىموۆ وسى ءسامميتتى ماسكەۋدە وتكىزۋدى ۇسىنىپ، ەرەۆانعا بارۋدان باس تارتقاننان كەيىن وتىرىس توقتاتىلعان. ارمەنيا تاۋلى قاراباق توڭىرەگىندەگى قاقتىعىستىڭ كەزەكتى شيەلەنىسۋى بارىسىندا ازەربايجاندى قولداۋ ءۇشىن قازاقستان ەرەۆاندا ەەوكو ءسامميتىن وتكىزۋگە قارسى شىقتى دەپ ەسەپتەدى.
اريچ ارميان اۋىلىنداعى كوشە نازارباەۆتىڭ ەسىمىمەن ءبىرىنشى بولىپ اتالماعان. وتكەن جىلى تاتارستان استاناسى قازاندا ەسپەرانتو كوشەسى جەرگىلىكتى تۇرعىنداردىڭ نارازىلىعىنا قاراماستان نازارباەۆ اتىنداعى كوشە بولىپ وزگەرتىلدى. سونداي-اق بىلتىر تۇركيادا ادان قالاسىندا نازارباەۆ اتىنداعى كوشە پايدا بولدى. بۇل – تۇركياداعى نازارباەۆ اتىنداعى ءتورتىنشى كوشە. بىراق ارميان اۋىلىنداعى كوشە پرەزيدەنت نۇرسۇلتان نازارباەۆتىڭ ەسىمى جوعالىپ كەتكەن العاشقى كوشە بولدى.
اۆتور: ماقپال مۇقانقىزى
ورىس تىلىنەن اۋدارىپ، دايىنداعان ايجان پەردەبەكقىزى
«ادىرنا» ۇلتتىق پورتالى
