قازاقستاننىڭ حالىق جازۋشىسى، مەملەكەتتىك سىيلىقتىڭ يەگەرى، قازاق پوەزياسىنىڭ كورنەكتى ەپيك اقىنى حاميت ەرعاليەۆتىڭ تۋعانىنا 100 جىل تولۋىنا بايلانىستى سالتاناتتى كەش ءوتتى.
مۇحتار اۋەزوۆ اتىنداعى اكادەميالىق دراما-تەاتىرىندا وتكەن شارادا «حاماڭ» تۋرالى ەستەلىكتەر ايتىلىپ، دەرەكتى فيلم كورسەتىلدى. قۇرمانعازى اتىنداعى حالىق اسپاپتار وركەستىرى جيىلعان جۇرتشىلىقتى كۇيىمەن تەربەتسە، رامازان ستامعازيەۆ، نۇرجان جانپەيىسوۆ، جانارگۇل ساركەنوۆا، فارحات كوبەيەۆ، قايىرجان بەردىباەۆتار اننەن شاشۋ شاشتى.
حاميت ەرعالي (14.10.1916-13.12.1997) اتىراۋ وبلىسى، يساتاي اۋدانى، حاميت ەرعالي (بۇرىنعى اتى نوۆوبوگات) اۋىلىندا دۇنيە كەلدى. 1939 جىلى قازاق مەملەكەتتىك ۋنيۆەرسيتەتىنىڭ فيلولوگيا فاكۋلتەتىنە وقۋعا قابىلداندى. 1940-45 جىلدارى سوۆەت ارمياسىنىڭ قاتارىندا، ۇلى وتان سوعىسىنىڭ مايداندارىندا بولدى. 1945-50 جىلدارى رەسپۋبليكالىق قازىرگى «ەگەمەن قازاقستان» گازەتىندە ءتىلشى، 1959 جىلعا دەيىن قازاقستان جازۋشىلار وداعىنىڭ پوەزيا سەكتسياسىنىڭ، قازاقتىڭ مەملەكەتتىك كوركەم əدەبيەت باسپاسى ءبولىمىنىڭ مەڭگەرۋشىسى قىزمەتىن اتقارعان. 1959 جىلدان ءومىرىنىڭ اقىرىنا دەيىن بىرىڭعاي شىعارماشىلىق جۇمىسپەن اينالىسقان. «Əكە سىرى»، «ۇلكەن جولدىڭ ۇستىندە»، «ءبىزدىڭ اۋىلدىڭ قىزى»، «قۇرمانعازى»، «كۇي داستان»، «ورالداعى وتتى ءتۇن»، «اڭىز اتا»،«قىز-حيسسا»، «جىلدار، جىلدار»، «سۋىت ءجۇرىس»، ت.ب. داستاندارى بار. اۋدارماشى رەتىندە پۋشكين مەن لەرمونتوۆتىڭ، شەكسپير مەن بايروننىڭ، سوفوكل، ناۋاي، ش.پەتەفي، ماياكوۆسكي، ر.گامزاتوۆ تۋىندىلارىن قازاق وقىرماندارىنا جەتكىزدى. قىرعىزدىڭ «ماناس»، قاراقالپاقتىڭ «قىرىق قىز» اتتى حالىقتىق جىرلارىن قازاقشالادى.
بۇل كەشتە اقىننىڭ تاڭداۋلى دەگەن ولەڭدەرى دە وقىلدى. سونىڭ ءبىرى «كوڭىل كۇيى» ولەڭى.
ماعان جات – تىنباق، سارقىلماق،
قالجىراپ كورگەن جوق جانىم،
وتەرمىن ءوزىم جارقىلداپ،
وزەگىم تولى اق جالىن
ءبىر كەزەك ىستىق، قويىنعا
دالانىڭ گۇلىن ءۇزىپ ساپ
ءبىر كەزەك قارلى قۇيىنعا
قۇيعىتا كىرەم قىزىقتاپ.
تەڭىزدەن اق باس تولقىنىن
كەۋدەمە كەيدە ورانام.
دەمەيمىن وتتان ولقىمىن،-
نايزاعاي مەنىڭ، كارى انام.
قىزىقپان قۇرعاق ماداققا،
بەرىلمەن كەسىر كەڭەسكە!
مىندەتىن ۇلدىڭ ارداقتاپ،
ارمانسىز جاتام دوڭەستە.
مىنەزدىڭ البىرت ءتۇرى دە،
ايتىلار ءالى وعان سىن:
ءمىنىم بار دەيدى-اۋ تىرىدە.
كولەڭكەم قايدا جوعالسىن؟!
جۇرەسىڭ جارقىن جاننىمدا،
كورىنىپ كەيدە كولەڭكەم!
سەنى دە مەندەي جادىندا
ۇزاققا ساقتار كەڭ ولكەم!
اينۇر يبراەۆا
