الماتىدا مادەنيەت جانە سپورت مينيسترلىگىنىڭ قولداۋىمەن «ابايدان-امانات» كونتسەرت سپەكتاكلىنىڭ ونلاين ءتۇسىرىلىمى عابيت مۇسىرەپوۆ اتىنداعى بالالار جانە جاسوسپىرىمدەر تەاترىنىڭ تەاتر ساحناسىندا ءوتتى. كونتسەرت سپەكتاكل قۇرمانعازى اتىنداعى قازاق مەملەكەتتىك اكادەميالىق حالىق اسپاپتارى وركەسترى مەن عابيت مۇسىرەپوۆ اتىنداعى بالالار جانە جاسوسپىرىمدەر تەاترىنىڭ اباي اتامىزدىڭ 175 جىلدىق مەرەيتويىنا ارنالعان بىرلەسكەن جوباسى. كونتسەرتتىڭ تەلەۆيزيالىق جوباسىن تۇسىرگەن «Abai.tv» ارناسى.
ونەر سالاسىندا بولماعان تىڭ جوبا – قۇرمانعازى وركەسترىنىڭ باسقا كونتسەرتتەرىنەن وزگەشە، ويتكەنى اتاۋلى جوباعا تەاتر اكتەرلەرى دە ءوز ۇلەستەرىن قوسىپ، كونتسەرت سپەكتاكلدى اسەرلەندىرە تۇسكەن. اباي اندەرى مەن كۇيلەرىنە، جىر جولدارىنا قۇرىلعان جوبا ءبىر ساتكە اباي الەمىنە ەنۋگە مۇمكىندىك بەرەدى.
«ابايدان-امانات» كونتسەرت سپەكتالىندە جاس ابايدىڭ ءرولىن جاس اكتەر – ەردەن جاقسىبەكوۆ، توعجاندى – «سەرپەر» سىيلىعىنىڭ لاۋرەاتى ايدا جانتىلەۋوۆا، ابايدىڭ اجەسىن – قازاقستان رەسپۋبليكاسىنىڭ ەڭبەگى سىڭگەن ءارتيسى – ليديا كادەنوۆا سومدادى.
دانيار بازارقۇلوۆ: (عابيت مۇسىرەپوۆ اتىنداعى بالالار جانە جاسوسپىرىمدەر تەاترىنىڭ كوركەمدىك جەتەكشىسى، جوبانىڭ رەجيسسەرى)
- مادەنيەت جانە سپورت مينيسترلىگىنىڭ تاپسىرماسىمەن قۇرمانعازى اتىنداعى وركەسترى جانە ع.مۇسىرەپوۆ اتىنداعى تەاترمەن بىرلەسكەن «ابايدان-امانات» جوباسىن جاساپ جاتىرمىز. بۇل ءىس-شارا تىكەلەي اباي اتامىزدىڭ 175 جىلدىق مەرەيتويىنا ارنالادى. اباي اتامىزعا تاعزىم، جاستارعا امانات رەتىندە ساحنالانىپ وتىر. كونتسەرت-سپەكتاكلدىڭ جانرىن – ابايعا فانتازيا دەپ قويدىم. سەبەبى ءوزىمىزدىڭ كوزىمىزبەن ابايدى قالاي كورەمىز، سونى ساحناعا شىعارۋعا تىرىستىم. ياعني ابايعا بالا كوزىمەن قاراۋ. العاشقى ساحنادا بالا ساحناعا شىعىپ ابايدىڭ ولەڭىن وقيدى. سول ساتتە اباي الەمىنە قيال-عاجايىپ ارقىلى ەنىپ كەتەدى. كونتسەرت-سپەكتاكل سونىسىمەن ەرەكشە. كەلەسى ساحنا جاس ابايدىڭ شابىتتانعان كەزى، توعجانعا عاشىق بولعان ساتىنە اۋىسادى. عاشىعىمەن كەزدەسۋى، وعان ءان ارناۋى مۇنىڭ ءبارى رەجيسسەرلىك فانتازيا. ودان كەيىن اجەسى زەرەگە ەركەلەۋى، ونى جاقسى كورۋى، اجەسىنىڭ ابايعا دەگەن ماحابباتى كورسەتىلەدى. جانە دە ابايدىڭ ءبىرجان سالمەن كەزدەسكەن ءساتىن وسى كونتسەرت-سپەكتاكلدەن كورۋگە بولادى.
مەدەت قۋانىشەۆ: (قۇرمانعازى اتىنداعى قازاق مەملەكەتتىك اكادەميالىق حالىق اسپاپتارى وركەسترىنىڭ ديرەكتورى)
- مەملەكەت باسشىسىنىڭ جارلىعىمەن بيىلعى جىلدىڭ «اباي جىلى» دەپ جاريالانعانىن بىلەسىزدەر. وسى ورايدا قر مادەنيەت جانە سپورت مينيستلىگىنىڭ قولداۋىمەن ەكى ونەر ۇجىمى «ابايدان-امانات» قويىلىمىن ساحناعا شىعاردى. قويىلىم تەلەۆيزيالىق جوباسىن «Abai.tv» ارناسى ءتۇسىرىپ جاتىر. كونتسەرت-سپەكتالدە ابايدىڭ بالا كەزىنەن قارتايعان ساتىنە دەيىن كورسەتىلەدى. قويىلىمدى قۇرمانعازى وركەسترى جاندى دىبىسپەن سۇيەمەلدەيدى. ديريجەر، قۇرمانعازى وركەسترىنىڭ باس ديريجەرى، مەملەكەتىك «دارىن» جاستار سىيلىعىنىڭ لاۋرەاتى – ابىلاي تىلەربەرگەن. تەلەۆيزيالىق ءتۇسىرىلىمدى جاقىن ارادا «Abai.tv» ارناسىنان كورەرمەن قاۋىمعا ونلاين فورماتتا ۇسىنامىز. سونىمەن قاتار ەكى ونەر ۇجىمىنىڭ الەۋمەتتىك جەلىدەگى پاراقشالارى ارقىلى كورسەتىلەدى. ەلباسى نۇرسۇلتان ءابىشۇلى نازارباەۆ «بولاشاققا باعدار: رۋحاني جاڭعىرۋ» اتتى ماقالاسىندا قوعامدىق سانانى قايتا تۇلەتۋدىڭ ماڭىزدىلىعى تۋرالى ايتىپ وتكەن بولاتىن. وسى ورايدا اباي مۇراسىنىڭ، اباي شىعارماشىلىعىنىڭ تيگىزەر ۇلەسى زور دەپ ەسەپتەيمىن. سوندىقتان «ابايدان-امانات» كونتسەرت-سپەكتالىنىڭ ماڭىزى ەرەكشە بولماق.
قۇرمانعازى وركەسترىنىڭ ءباسپاسوز
قىزمەتى
