پارلامەنت ءماجىلىسى سايلاۋىنا كاسىپوداقتار تاۋەلسىز باقىلاۋشى رەتىندە قاتىسۋعا نيەتتى. بۇل تۋرالى بۇگىن، باتىس قازاقستان وبلىستىق كاسىپوداقتار ورتالىعىنىڭ ءتورايىمى – ايگۇل ەسەكەنوۆا بقو كاسىپوداقتار ورتالىعى ۇيلەستىرۋ كەڭەسىنىڭ وتىرىسىندا ايتىپ ءوتتى، دەپ حابارلايدى «ادىرنا» ۇلتتىق پورتالى.
ەسكە سالا كەتسەك، اعىمداعى جىلدىڭ 9 قاراشا كۇنى قازاقستان رەسپۋبليكاسى كاسىپوداقتار فەدەراتسياسى توراعاسىنىڭ ءبىرىنشى ورىنباسارى – مۇحتار تىنىكەەۆ باسپاسوزدەگى مالىمدەمەسىندە قازاقستان رەسپۋبليكاسىنداعى ەڭ ءىرى قوعامدىق بىرلەستىك رەتىندە كاسىپوداقتار فەدەراتسياسى ماڭىزدى ىشكى ساياسي پروتسەستەردەن تىس قالمايتىنىن، سوندىقتان كاسىپوداقتار فەدەراتسياسى قازاقستان رەسپۋبليكاسى پارلامەنتى ءماجىلىسى دەپۋتاتتارىنىڭ سايلاۋىنا ەلدىڭ سايلاۋ زاڭناماسىنىڭ بارلىق نورمالارىنىڭ ساقتالۋىن بايقاۋشى رەتىندە قاتىسۋعا نيەتتى ەكەندىگىن جەتكىزگەن بولاتىن.
بيىل قازاقستان رەسپۋبليكاسى كاسىپوداقتار فەدەراتسياسى ەلىمىزدىڭ جەتەكشى ساياسي ۇيىمى -«Nur Otan» پارتياسىمەن بىرگە ءوزارا ارىپتەستىك مەموراندۋمىنا قول قويىپ، جىل باسىنان بەرى بىرلەسكەن ءىس-شارالاردى اتقارىپ كەلەدى. قركف ءوز كەزەگىندە ساياسي پارتيانىڭ سايلاۋ تاريحىندا العاش رەت ورىن الىپ جاتقان پرايمەريزگە بەلسەندى قاتىسىپ، كوبىرەك ەڭبەك ادامىنىڭ ەلدىڭ ساياسي دامۋى جولىندا ىقپال ەتىپ، ۇلەس قوسۋىنا جاعداي جاسادى. سونىمەن قاتار، بۇل بەلسەندىلىكتى ءارى قاراي جالعاستىرۋعا بەل بۋىپ، 2021 جىلدىڭ 10 قاڭتارى كۇنى وتەتىن سايلاۋعا باقىلاۋشى رەتىندە قاتىسپاقشى.
باتىس قازاقستان وبلىستىق كاسىپوداقتار ۇيىمدارىنىڭ اتىنان 200-گە جۋىق ەڭبەك ادامى سايلاۋعا تاۋەلسىز باقىلاۋشى رەتىندە قاتىسۋعا نيەتتى.
«ادىرنا» ۇلتتىق پورتالى
