31 قازان كۇنى الماتى قالاسى ت. شەۆچەنكو كوشەسىنىڭ بويىنداعى ش. ءۋاليحانوۆتىڭ ەسكەرتكىشىنىڭ الدىندا رۇقسات ەتىلگەن ميتينگ وتكەن بولاتىن. ميتينگى الاڭىنا ايەل كيىمىن كيگەن ەر ادامنىڭ كەلىپ، ءوز قۇقىعىن تالاپ ەتۋى – كوپشىلىكتى تاڭداندىرىپ، كەيبىرىنىڭ ىزاسىن تۋدىرىپ، سوڭىنان وعان قول جۇمساۋعا دەيىن جەتكىزگەن ەدى.
ازامات يۋري تولوچكو Facebook پاراقشاسىندا ءوزىنىڭ بۇل ارەكەتىنە قاتىستى «كوە-چتو و فاكتاح» دەگەن تاقىرىپپەن ارنايى مالىمدەمە جاسادى.
ول: «جۋىردا جەلىدە كوپتەگەن جالعان اقپاراتتار تارالا باستادى، قانداي دا ءبىر سەبەپتەرمەن ادامدار ونى ناقتى دايەككە بالاپ جاتىر. بۇل 31 قازاندا الماتىدا وتكەن ميتينگ پەن ونداعى اماندانىڭ (مەن ايەل بەينەسىندەگى) توبە كورسەتۋىنە قاتىستى. وسىعان قاتىستى مەن بىرنەشە تۇسىنىكتەمە بەرگىم كەلەدى", - دەپ باستايدى.
"مەن تۋرالى ميتينگتى بۇزۋ ءۇشىن ارنايى قازاقستانعا الدىرىلعان ايگىلى ۋكراين اكتەرى دەپ جازىپ جاتىر.
ءتۇسىندىرىپ بەرەيىن: مەن ۋكراينادا 1985 جىلى دۇنيەگە كەلدىم، بىراق 1990 جىلدان باستاپ قازاقستاندا تۇرامىن. ياعني، مەن ءومىرىمنىڭ كوپ بولىگىن وسىندا وتكىزدىم (30 جىل از ۋاقىت ەمەس) جانە مەن وسى ەلدىڭ ازاماتىمىن.
كوپشىلىك مەنى «نۇر-وتان» پارتياسىنىڭ مۇشەسى دەپ جازىپ جاتىر (سول سەبەپتەن ميتينگتى بۇزۋعا مۇددەلى دەپ ويلايدى). وسى پارتيانىڭ وكىلدەرىمەن تۇسكەن سۋرەتكە سىلتەمە بەرىپ كورسەتۋدە.
ءتۇسىندىرىپ بەرەيىن: مەن كوپشىلىك الدىندا سويلەۋ، ەموتسيونالدى ينتەللەكت، ۆەربالدى ەمەس داعدىلار سالاسىنداعى بىرەگەي مامانمىن. مەن ترەنينگتەر وتكىزەمىن (جۇمىس ءوتىلى – 12 جىل). مەنىڭ كليەنتتەرىم مەن ستۋدەنتتەرىمنىڭ اراسىندا ارتىستەر، تەلەجۇرگىزۋشىلەر، كاسىپكەرلەر، بيزنەس-جاتتىقتىرۋشىلار، جۋرناليستەر، ءارتۇرلى سالانىڭ قىزمەتكەرلەرى بار. مەن، ءتىپتى، پارتيانىڭ 18 جانە 19 سەزدەرىنە سپيكەرلەر دە دايىندادىم. باسقا ەشتەڭە جوق.
مەن ەشقاشان پارتيانىڭ مۇشەسى بولعان ەمەسپىن (ەشبىرىندە). قاۋىمداستىقتاردىڭ دا مۇشەسى بولمادىم. ءاردايىم «مەن جالعىز ءوزىم ەشتەڭە ىستەي المايمىن» پوزيتسياسىنان شىقتىم؟
ايتپاقشى، مەندە وپپوزيتسيا وكىلدەرىمەن دە بىرگە تۇسكەن فوتوسۋرەتتەر بار (ول دا نۇروتانشىلارمەن تۇسكەن سۋرەتتەر سەكىلدى مۇلدەم ەشتەڭە بىلدىرمەيدى). ءاردايىم پوزيتسيا ءبىرىنشى نەمەسە ەكىنشى بولا بەرمەيدى – ۇشىنشىسى دە بار.
جازىپ جاتقاندار ميتينگكە «شال، كەت!» دەپ ايقايلاعان كەزدە شىققانىمدى ايتادى. ميتينگتى توقتاتۋ ءۇشىن مەن كەلگەم (سۇراق: مەن نەگە كەش كەلدىم؟).
ءتۇسىندىرىپ بەرەيىن: مەن جاي عانا ۇشاققا كەشىگىپ قالدىم (تەكسەرۋىڭىزگە بولادى). مەن ساعات 9.20-دا ۇشۋىم كەرەك ەدى (Scat اۆياكومپانياسى), بىراق 11.30-دا ۇشتىم (Air Astana اۆياكومپانياسى). مەن الماتى اۋەجايىنان ساعات 13.20-دا شىقتىم.
ولار مەنى ۇرعان جىگىت مەنىڭ ارىپتەسىم، ءبىز بۇل سپەكتاكلدى بىرلەسىپ قويدى دەپ تە جازادى. پوليتسەيلەرگە مەن وعان قارسى ارىز جازباعانىمدى سەنىممەن دە جازىپ جاتىر.
ءتۇسىندىرىپ بەرەيىن: مەن وقيعادان كەيىن بىردەن جازدىم (ارىزىم بار). مەن جىگىتتىڭ كىم ەكەنىن بىلمەيمىن. ول تابىلعان جاعدايدا ءبىزدىڭ تانىستىعىمىزدى تەكسەرە الاسىز (ال قازىر گيپوتەزالاردى فاكت رەتىندە ۇسىنۋدىڭ ماعىناسى جوق).
سونداي-اق ءبىرىنشى بولىپ ول جىگىتتى مەنىڭ ۇردى دەيدى.
ءتۇسىندىرىپ بەرەيىن: بۇل جىگىت مەنى ەكى رەت ميتينگ اۋماعىنا كىرگىزبەي، توقتاتپاق بولدى. سودان كەيىن، مىنبەگە جاقىنداعانىمدا، ول مەنىڭ شاشىمدى جۇلىپ الدى (بۇل ونىڭ 3-ءشى ارەكەتى), مەن ونى الۋعا اسىعىپ، سوققىعا جىعىلدىم. مەنى باسقا ادامدار دا يتەرىپ جىبەردى، ءوزىمدى قورعاۋ ءۇشىن ولاردى دا يتەرۋگە تۋرا كەلدى.
ولار مەنى ۇقك قىزمەتكەرى نەمەسە ولارمەن بايلانىسى بار دەپ جازىپتى.
ءتۇسىندىرىپ وتەيىن: بۇل تۇستا مەنىڭ ولارمەن بايلانىسىم جوق ەكەنىن دالەلدەۋ قيىنعا سوقپاق، دالىرەك ايتسام، قالاي دالەلدەۋگە بولاتىنىن بىلمەيمىن (ولاردان انىقتاما الۋىم كەرەك پە؟ قالاي؟) الايدا، ەشكىم دە بايلانىستى دالەلدەي المايدى. سونىمەن بۇل جورامالدار دا سول كۇيى قالا بەرسىن.
ولار مەن ميتينگتى "بەيبىت ەمەس" دەپ اتاماۋىم جانە "ميتينگ قۇقىعىنا يە بولۋ كەرەك"دەگەن پىكىرىمدى بىلدىرمەۋىم كەرەك دەپ جاتىر. سول سەبەپتەن دە مەن بارلىق ميتينگشىلەردى كىنالادىم، بارلىق نارازىلىق بىلدىرۋشىلەردى ايىپتادىم.
ءتۇسىندىرىپ وتەيىن: بىرىنشىدەن، مەنىڭ ويلاۋعا قۇقىعىم بار (باسقالاردان وزگەشە ويلاۋعا). ەكىنشىدەن، مەن ءبارىن كىنالامادىم. ماعان تيىسپەگەندەر دە بولدى، ءتىپتى ماعان تيىسپەۋگە دە شاقىردى (ولار مەنىڭ ويىمشا، ميتينگكە شىعۋعا قۇقىلى). بىراق اراسىندا سوڭىندا مەنى سوققىعا جىققان جىگىتتەن بولەك، مەنى بىرنەشە رەت شىعارىپ جىبەرگىسى كەلگەن ادامدار دا بولدى. ولار مەنى يتەرىپ، قۋىپ جىبەردى (سوققىعا جىققانعا دەيىن دە، كەيىن دە). شەتتەتۋ تەك مەنىڭ سىرتقى كەلبەتىمە بايلانىستى (ويتكەنى مەنەن نە ءۇشىن كەلگەنىمدى ەشكىم سۇرامادى، ماعان كوپشىلىكتىڭ اراسىندا تۇرۋعا رۇقسات ەتپەدى).
كەلگەن ماقساتىمدى كەيىن، مەنى ميتينگ «پەريمەترىنەن» شىعارىپ جىبەرىپ، جۋرناليستەر مەنى قۋىپ جەتكەن كەزدە ايتتىم. ولار قۋىپ جەتپەسە، مەنىڭ نەگە بارعانىمدى ەشكىم بىلمەس ەدى. ادامداردىڭ ءبىر توبى وزدەرىن دۇرىس ۇستاعان (ادەكۆات), ال ەكىنشى ءبىر توبى يتەرىپ، قورلاپ (سىرتقى كەلبەتىنە بولا), قۋعاندىقتان جانە ولار كوپ بولعاندىقتان، مەن مۇنى بەيبىت ميتينگ دەپ اتاي المايمىن.
ايتپاقشى، مەن بۇل كەيىپتە ترانسگەندەرلەر ماسەلەسىن ەمەس، باسقا ويدى دا جەتكىزە الار ەدىم. بىراق ولار ءبارىبىر مەنى تەپكىلەيتىن ەدى. ايتپاقشى، مەن پوليتسيا جاقسى قىزمەت كورسەتتى دەپ ايتا المايمىن (ويتكەنى ولار مەنى جىلدام قۇتقارۋعا تىرىسپادى، ارينە، ءبارى وتە تەز بولدى، دەگەنمەن مەنى قورعايدى دەپ كۇتتىم). ءاىىب-دە ولار وزدەرىن دۇرىس ۇستادى.
ءارى قاراي نەگە مۇنداي فورمادا كەلگەنىم تۋرالى دا جازادى.
ءتۇسىندىرىپ وتەيىن: بىرىنشىدەن، تەڭ قۇقىقتار مەن دەموكراتيالىق بوستاندىقتاردى جاقتايتىن ادامدار ءۇشىن سىرتقى ءتۇردىڭ قانداي دا ماڭىزى بار ما؟ نەمەسە «دەموكراتتاردا» كەمسىتۋگە ورىن بار ما؟ رۇقسات ەتىلگەن ميتينگىگە بارلىعىن شاقىردى ما؟
ءيا، مەن ەلدىڭ نازارىن اۋدارۋ ءۇشىن وسىلاي كيىندىم (بۇل انىق). وسىنداي قويىلىمداردىڭ كومەگىمەن مەن ءوزىمدى مازالايتىن ماسەلەلەرگە نازار اۋدارتا الامىن. ءيا، حايپ جاساۋ ماعان راحات تا سىيلايدى. جانە مەن مۇنى جاساي الدىم»، - دەپ تۇسىنىك بەرىپ، ميتينگىگە نەلىكتەن شىققاندىعىن ايتادى.
راسىندا، يۋري تولوچكونىڭ بۇل ارەكەتىن
">الەۋمەتتىك جەلىدە ارنايى تاپسىرىس رەتىندە باعالاعاندار كوپ بولدى. ءبىرى ونىڭ بۇل ارەكەتى ءۇشىن اقى تولەنگەنىن ايتسا، ەندى ءبىرى ونى «نۇر-وتان» پارتياسى جالداعانىن دەيدى. حالىق اراسىندا ونىڭ ماڭىزدى ميتينگىنىڭ شىرقىن بۇزىپ، وسىنداي كەيىپتە بارعانى ءۇشىن ايىپتاۋشىلار دا بار. سونىمەن قاتار ءيۋريدىڭ بۇل ارەكەتىن جاقتاۋشى ازاماتتار دا كەزدەسەدى. ال ءسىز نە دەيسىز، قۇرمەتتى وقىرمان؟
