مەملەكەت باسشىسى قاسىم-جومارت توقاەۆ ءوزىنىڭ 2019 جىلعى 2 قىركۇيەكتەگى «سىندارلى قوعامدىق سۇحبات - قازاقستاننىڭ تۇراقتىلىعى مەن گۇلدەنۋىنىڭ نەگىزى» اتتى حالىققا جولداۋىندا «ەستۋشى مەملەكەت» تۇجىرىمداماسىن ىسكە اسىرىپ، ازاماتتىق قوعامدى نىعايتۋعا شاقىردى.
«ازاماتتاردىڭ بارلىق سىندارلى ءوتىنىش-تىلەكتەرىن جەدەل ءارى ءتيىمدى قاراستىراتىن «حالىق ۇنىنە قۇلاق اساتىن مەملەكەت» تۇجىرىمداماسىن ىسكە اسىرۋ – بارىمىزگە ورتاق مىندەت. بيلىك پەن قوعام اراسىندا تۇراقتى ديالوگ ورناتۋ ارقىلى عانا قازىرگى گەوساياسي احۋالعا بەيىمدەلگەن ۇيلەسىمدى مەملەكەت قالىپتاستىرۋعا بولادى»،-دەدى ول.
«ەستۋشى مەملەكەت» تۇجىرىمداماسى اياسىندا قانداي شارالار جۇزەگە اسپاق؟
ەڭ ءبىرىنشى تۇجىرىمدامانىڭ ەڭ باستى قاعيداتىنىڭ مىندەتىنە توقتالىپ وتەلىك. ول — مەملەكەتتىك ورگانداردىڭ اشىقتىعى. وسى ورايدا مىنا شارالار جۇزەگە اسۋى ءتيىس:
ءبىرىنشى. پارتيا قۇرىلىسى ۇدەرىسىن جالعاستىرۋ
ەكىنشى. حالىقپەن ءتيىمدى كەرى بايلانىس ورناتۋ
ءۇشىنشى. ميتينگتەر تۋرالى زاڭنامانى جەتىلدىرۋ
ءتورتىنشى. قوعامدىق كەلىسىمدى نىعايتۋ
تۇجىرىمداما قالاي ىسكە اسىپ جاتىر؟
ۇلتتىق قوعامدىق سەنىم كەڭەسىنىڭ قۇرىلۋى – پرەزيدەنتتىڭ ەڭ ماڭىزدى باستاماسىنىڭ ءبىرى. ول 2019 جىلى 17 شىلدەدە قۇرىلدى. نەگىزگى ماقساتى – جۇرتشىلىقتىڭ، ساياسي پارتيالاردىڭ، ازاماتتىق قوعامنىڭ وكىلدەرىمەن كەڭىنەن تالقىلاۋ نەگىزىندە مەملەكەتتىك ساياساتتىڭ وزەكتى ماسەلەلەرى بويىنشا ۇسىنىستار مەن ۇسىنىمدار تۇجىرىمداۋ.
سونداي-اق، مەملەكەت باسشىسى اقوردا سايتىندا ۆيرتۋالدى قابىلداۋ اشقان بولاتىن. بۇگىنگە دەيىن وعان 9 مىڭعا جۋىق حات كەلىپ تۇسكەن.
قر پارلامەنتى سەناتى توراعاسىنىڭ ورىنباسارى اسقار شاكىروۆ ءوز مالىمدەمەسىندە «پرەزيدەنتتىڭ ەكى جولداۋىنىڭ اراسىندا وسى باعىتتا ايتارلىقتاي جۇمىستار اتقارىلدى: ساياسي پارتيالار تۋرالى; سايلاۋ تۋرالى; بەيبىت جينالىستار تۋرالى; پارلامەنتتىڭ قىزمەتى تۋرالى، ونىڭ ىشىندە پارلامەنتتىك وپپوزيتسيانىڭ بولۋىن كوزدەيتىن زاڭدار قابىلداندى، جەكە ادامنىڭ قۇقىقتارىن قورعاۋ سالاسىنداعى زاڭناما جەتىلدىرىلۋدە.
مەملەكەت باسشىسى ايتقانداي، بۇل رەفورمالاردىڭ باستاماسى عانا»،-دەدى.
اعىمداعى جىلدىڭ قازان ايىنان باستاپ الەۋمەتتىك جەلىلەردەگى مەديا-پورتالدار مەن مەملەكەتتىك باعدارلامالاردىڭ پاراقتارى ىسكە قوسىلدى. پورتالداردا كەرى بايلانىس ورناتىلدى جانە قازاقستاندىقتار وزدەرىن قىزىقتىرعان بارلىق ماسەلەلەر بويىنشا رەسۋرستاردا جاريالانعان (ونىڭ ىشىندە مەملەكەتتىك ورگانداردا جۇمىس جاسايتىندارمەن) ماماندارمەن بايلانىسا الادى. بۇل بايلانىس ءادىسى ورتالىق جانە جەرگىلىكتى اتقارۋشى مەملەكەتتىك ورگانداردىڭ «ەستۋشى مەملەكەت» تۇجىرىمداماسىن ىسكە اسىرۋ شەڭبەرىندە ازاماتتىق قوعاممەن جۇمىسىنىڭ تيىمدىلىگىن ارتتىرۋعا ارنالعان.
اقپارات جانە قوعامدىق دامۋ ءمينيسترى ايدا بالاەۆانىڭ ايتۋىنشا، بارلىق مينيسترلەر، اكىمدەر حالىققا دا، جۋرناليستەرگە دە اشىق. ولاردىڭ ارنايى بلوكتارى بار، سايتتارى قىزمەت ەتەدى. كەيبىر مەملەكەتتىك ورگانداردىڭ تەلەگرام ارنالارى بار. بارلىق كەلىپ تۇسكەن سۇراقتارعا دەر كەزىندە جاۋاپ قايتارۋ ماسەلەلەرى دۇرىس جولعا قويىلعان.
سونداي-اق، استانادا 2019 جىلدىڭ تامىز ايىنىڭ سوڭىندا «جانۇيا» وتباسى ينستيتۋتىن قولداۋ ورتالىعى اشىلدى. بۇل ورتالىق قالا تۇرعىندارىنا «ءبىر تەرەزە» قاعيداسى بويىنشا 70-تەن استام مەملەكەتتىك قىزمەت ءتۇرىن كورسەتەدى. «جانۇيا» ورتالىعى اشىلعاننان بەرى بۇگىنگە دەيىن 26 مىڭنان استام قالا تۇرعىنىنا كومەك كورسەتىلگەن.
قازاقستان حالىق ۇنىنە قۇلاق اساتىن مەملەكەت پە؟ «ادىرنا» ءتىلشىسى سۇراپ كوردى.
ايدا اسانقىزى، ساتۋشى:
- «ەستۋشى مەملەكەت» تۇجىرىمداماسى قارقىندى تۇردە جۇزەگە اسىپ جاتىر. كۇنى كەشە ءبىلىم جانە ءمينيسترى ءبىلىم باسقارمالارى باسشىلارىنىڭ جەكە تەلەفون نومىرلەرىن جاريالاۋىنىڭ ءوزى ۇلكەن قادام بولدى. قازىر قانداي دا ءبىر ماسەلەگە تاپ بولساق، بىردەن جاۋاپتى ورگاندارعا حابارلاسامىز. اكىمدەرىمىز دە حالىققا ءبىر قادام جاقىنداي تۇسكەندەي.
ارمان تاسقالي، ستۋدەنت:
- شىنى كەرەك، ەلىمىزدى تولىعىمەن حالىقتى «ەستۋشى مەملەكەت» قاتارىنا جاتقىزا المايمىن. ءالى دە بولسىن شەشىلمەي جۇرگەن ماسەلەلەرىمىز بارشىلىق. بيلىك اۋىلدىق جەرلەردەگى قاراپايىم حالىقتىڭ جانايقايىنا نازار اۋدارسا دەيمىن.
جامال شاحاەۆا، زەينەتكەر:
- شىمكەنت قالاسىندا تۇرامىن. اكىم ورىنباسارىنىڭ جەكە بايلانىس ءنومىرى بار. بىراق ءالى حابارلاسىپ كورمەدىم.
«ادىرنا» ۇلتتىق پورتالى
