قوقىس جاشىگىنە جيرينوۆسكيدىڭ ەسىمى بەرىلدى

2096
Adyrna.kz Telegram

جاقىنداعى ءبىر سۇحباتىندا رەسەيلىك ساياساتكەر ۆلاديمير جيرينوۆسكي الماتىداعى ماسانچي كوشەسىنىڭ اتاۋىن ءوزىنىڭ قۇرمەتىنە اۋىستىرۋدى ارماندايتىنىن ايتقان، سەبەبى، ونىڭ جارتى ءومىرى وسى كوشەدەگى 79-ۇيدە وتكەن ەكەن. ونىڭ وسى تىلەگىن «نامىس» جاستار بىرلەستىگىنىڭ بەلسەندىلەرى ورىندادى. الايدا، كوشەگە ەمەس، ونىڭ ەسىمى قالاداعى باسقا زاتقا بەرىلدى دەپ حابارلايدى  «Adyrna.kz» ءتىلشىسى zakon.kz-كە سىلتەمە جاساپ.

جيرينوۆسكي 1946 جىلى 25 ساۋىردە الماتى قالاسىندا دۇنيەگە كەلگەن. ماسانچي كوشەسىندەگى، 79 ۇيدە تۇردى، 1964 جىلى 3 شىلدەدە قازاقستاننان كەتكەن. ۆلاديمير ۆولفوۆيچ ءوزىنىڭ سۇحباتتارى مەن كوپشىلىك الدىندا سويلەگەن سوزىندە قازاقستان مەن قازاقستاندىقتار تۋرالى ەكىۇشتى مالىمدەمەلەر جاساعان ەدى. 2005 جىلى قازاقستاننىڭ سىرتقى ىستەر مينيسترلىگى لدپر ليدەرى ۆلاديمير جيرينوۆسكيدىڭ ەلگە كەلۋىن قاجەتى جوق دەپ رەسمي حابارلاعان ەدى.

الايدا، جيرينوۆسكي جاقىندا بەرگەن سۇحباتىندا الماتىنى ساعىنعانىن جانە ءوزىنىڭ ەسىمىن ءوزى تۋعان قالادا ماڭگى قالدىرعىسى كەلەتىنىن ايتقان بولاتىن. «نامىس» جاستار بىرلەستىگىنىڭ بەلسەندىلەرى ونىڭ تىلەگىن ورىنداپ، ماسانچي، 79 مەكەن-جايىنداعى ءۇيدىڭ اۋلاسىنداعى... قوقىس جاشىگىنە جيرينوۆسكيدىڭ ەسىمىن بەردى.

جيرينوۆسكيدىڭ سۋرەتىمەن شىققان باننەردىڭ قوقىس جاشىگىندە قانشا ۋاقىتقا ءىلىنىپ تۇراتىنى ءالى بەلگىسىز، دەگەنمەن، وسىلايشا قوعام نازارىن ساياساتكەردىڭ مالىمدەمەلەرىنە اۋدارۋدى جاستار ءجون ساناپتى.

دۋمان امانجولۇلى،

«ادىرنا» ۇلتتىق پورتالى

فوتو: اشىق دەرەككوزدەن

پىكىرلەر