بۇگىن سىبايلاس جەمقورلىققا قارسى ءىس-قيمىل اگەنتتىگى جانىنداعى رەسپۋبليكالىق اقپاراتتىق-اعارتۋشىلىق شتاب جەتەكشىسى ىرزا تۇرسىنزادا جانە اگەنتتىكتىڭ پاراساتتىلىق دەپارتامەنتىنىڭ ديرەكتورى عانيجان اسانۇلى مەگاپوليسكە جۇمىس ساپارىمەن كەلدى.
سىبايلاس جەمقورلىقتىڭ الدىن الىپ، قوعامدا پاراساتتىلىق قۇندىلىقتارىن قالىپتاستىرۋدى كوزدەگەن اگەنتتىك جانە شتاب وكىلدەرى قالا اكتيۆىمەن كەزدەستى.
قالا اكىمى مۇرات ايتەنوۆ توراعالىق ەتكەن جيىنعا اگەنتتىكتىڭ شىمكەنت قالاسى بويىنشا دەپارتامەنتىنىڭ باسشىسى ا.جۇماعالي، «شىمكەنت-ادالدىق الاڭى» جوبالىق كەڭسەسىنىڭ، قالالىق اقپاراتتىق-اعارتۋشىلىق شتابىنىڭ مۇشەلەرى مەن جەرگىلىكتى اتقارۋشى ورگاندار، دەنساۋلىق ساقتاۋ سالاسىنىڭ باسشىلارى قاتىستى.
كەزدەسۋدە قالا اكىمى ەلباسى مەن مەملەكەت باسشىسىنىڭ سىبايلاس جەمقورلىققا قارسى كۇرەستە ناقتى باسىمدىقتار قويعانىن اتاپ ءوتىپ، قوعام مەن مەملەكەت يگىلىگى ءۇشىن جەمقورلىقتى جويۋ باعىتىندا بىرلەسە جۇمىس جاساۋ قاجەتتىگىنە توقتالدى.
- قالادا جەمقورلىققا قارسى ءىس-قيمىل بويىنشا بىرقاتار جوبالار جۇزەگە اسىرىلىپ جاتىر. ماسەلەن بيىل پەداگوگ ماماندارىن جۇمىسقا قابىلداۋعا ارنالعان hr-process پورتالىن ىسكە قوستىق. وسىعان دەيىن وقۋشىلاردى مەكتەپكە قابىلداۋ، بالاباقشاعا ورنالاستىرۋ تولىعىمەن ەلەكتروندى جۇيەگە وتكەن بولاتىن. ءبىز ەكى جول ارقىلى ناتيجەگە جەتەمىز. ءبىرى – جەمقورلىق ارەكەتتەرىنىڭ ورىن الۋىنا مۇمكىندىك بەرمەۋ بولسا، ەكىنشىسى سالدارىن ءتۇسىندىرىپ الدىن الۋ. سونداي-اق «شىمكەنت-ادالدىق الاڭى» جوبالىق كەڭسەسى مەملەكەتتىك ورگانداردىڭ جاڭاشا باعىتتا جۇمىس جاساۋىندا تيىمدىلىگىن كورسەتىپ وتىر. قالا اكىمىنىڭ اپپاراتى جانە 4 اۋدان اكىمدىگىندە سەرۆيستىك اكىمدىكتەر اشىلىپ، 197 مەكەمە OpenSpace فورماتىندا جۇمىس جاساۋدا، - دەدى شاھار باسشىسى.
جيىن بارىسىندا اقپاراتتىق-اعارتۋشىلىق شتابتىڭ جەتەكشىسى ىرزا تۇرسىنزادا جەمقورلىقتىڭ الدىن الۋداعى ناسيحاتتىق جۇمىستار وڭ اسەر بەرەتىنىن اتاپ ءوتتى.
ءوز كەزەگىندە، اگەنتتىكتىڭ پاراساتتىلىق دەپارتامەنتىنىڭ ديرەكتورى ع.اسانۇلى اقپاراتقا قولجەتىمدىلىكتى وڭتايلاندىرۋ، ازاماتتاردىڭ مەملەكەتتىك بيلىككە دەگەن سەنىمدەرىن ارتتىرۋ جانە بيلىك پەن ازاماتتىق قوعام اراسىنداعى بايلانىستىڭ تىكەلەي ارناسىن قۇرۋ ماقساتىندا قۇرىلعان «اشىق بيۋدجەتتەردىڭ ينتەراكتيۆتى كارتاسى» جوباسىمەن تانىستىردى.
كەزدەسۋدى قورىتىندىلاعان قالا اكىمى مۇرات ايتەنوۆ جەمقورلىقتىڭ الدىن الۋداعى جۇمىستار جالعاسىن تاباتىندىعىن جەتكىزدى.
شىمكەنت قالاسى اكىمىنىڭ ءباسپاسوز قىزمەتى
