Búgin Sybaılas jemqorlyqqa qarsy is-qımyl agenttigi janyndaǵy respýblıkalyq aqparattyq-aǵartýshylyq shtab jetekshisi Yrza Tursynzada jáne Agenttiktiń Parasattylyq departamentiniń dırektory Ǵanıjan Asanuly megapolıske jumys saparymen keldi.
Sybaılas jemqorlyqtyń aldyn alyp, qoǵamda parasattylyq qundylyqtaryn qalyptastyrýdy kózdegen Agenttik jáne Shtab ókilderi qala aktıvimen kezdesti.
Qala ákimi Murat Áıtenov tóraǵalyq etken jıynǵa Agenttiktiń Shymkent qalasy boıynsha departamentiniń basshysy A.Jumaǵalı, «Shymkent-adaldyq alańy» jobalyq keńsesiniń, qalalyq aqparattyq-aǵartýshylyq shtabynyń músheleri men jergilikti atqarýshy organdar, densaýlyq saqtaý salasynyń basshylary qatysty.
Kezdesýde qala ákimi Elbasy men Memleket basshysynyń sybaılas jemqorlyqqa qarsy kúreste naqty basymdyqtar qoıǵanyn atap ótip, qoǵam men memleket ıgiligi úshin jemqorlyqty joıý baǵytynda birlese jumys jasaý qajettigine toqtaldy.
- Qalada jemqorlyqqa qarsy is-qımyl boıynsha birqatar jobalar júzege asyrylyp jatyr. Máselen bıyl pedagog mamandaryn jumysqa qabyldaýǵa arnalǵan hr-process portalyn iske qostyq. Osyǵan deıin oqýshylardy mektepke qabyldaý, balabaqshaǵa ornalastyrý tolyǵymen elektrondy júıege ótken bolatyn. Biz eki jol arqyly nátıjege jetemiz. Biri – jemqorlyq áreketteriniń oryn alýyna múmkindik bermeý bolsa, ekinshisi saldaryn túsindirip aldyn alý. Sondaı-aq «Shymkent-adaldyq alańy» jobalyq keńsesi memlekettik organdardyń jańasha baǵytta jumys jasaýynda tıimdiligin kórsetip otyr. Qala ákiminiń apparaty jáne 4 aýdan ákimdiginde servıstik ákimdikter ashylyp, 197 mekeme OpenSpace formatynda jumys jasaýda, - dedi shahar basshysy.
Jıyn barysynda aqparattyq-aǵartýshylyq shtabtyń jetekshisi Yrza Tursynzada jemqorlyqtyń aldyn alýdaǵy nasıhattyq jumystar oń áser beretinin atap ótti.
Óz kezeginde, Agenttiktiń Parasattylyq departamentiniń dırektory Ǵ.Asanuly aqparatqa qoljetimdilikti ońtaılandyrý, azamattardyń memlekettik bılikke degen senimderin arttyrý jáne bılik pen azamattyq qoǵam arasyndaǵy baılanystyń tikeleı arnasyn qurý maqsatynda qurylǵan «Ashyq bıýdjetterdiń ınteraktıvti kartasy» jobasymen tanystyrdy.
Kezdesýdi qorytyndylaǵan qala ákimi Murat Áıtenov jemqorlyqtyń aldyn alýdaǵy jumystar jalǵasyn tabatyndyǵyn jetkizdi.
Shymkent qalasy ákiminiń baspasóz qyzmeti
