بيىل ەلىمىزدىڭ ءار وڭىرىندە قازاقتىڭ كەمەڭگەر، ۇلى اقىنى اباي قۇنانباەۆتىڭ تۋعانىنا 175 جىل تولۋىنا وراي ءارتۇرلى مادەني ءىس-شارالار، كارانتيندىك تالاپتاردى ساقتاي وتىرىپ وتكىزىلىپ كەلەدى. وسى ورايدا قازاقتىڭ «الاش قالاسى» اتانعان سەمەيدەگى ابايدىڭ «جيدەباي-ءبورىلى» تاريحي-مادەني جانە ادەبي-مەموريالدىق قورىق-مۋزەيىنىڭ ەڭبەگى قوماقتى دەسە بولادى. سەبەبى، مۋزەيدىڭ اباي ءومىرى مەن شىعارماشىلىعىن، ونىڭ اقىندىق-ونەر اينالاسىن، سول زامانداعى تاريح پەن مادەنيەت قۇبىلىستارىن، زاتتىق، قۇجاتتىق جادىگەرلەردى زەرتتەۋ، ساقتاۋ، ناسيحاتتاۋ، قورعاۋ جۇمىستارى جاقسى جولعا قويىلعان. ونىڭ ۇستىنە اتالمىش مۋزەيدىڭ قۇرىلعانىنا بيىل 80 جىل تولىپ وتىر. ۇلى اقىننىڭ 175 جىلدىق مەرەي تويى مەن مۋزەيدىڭ 80 جىلدىق مەرەكەسى تۇسپا-تۇس كەلگەن ۋاقىتتا مۋزەيدىڭ ءباسپاسوز حاتشىسى اراي تالعاتقىزىمەن مۋزەيدىڭ قۇرىلۋ تاريحى، ونىڭ بۇگىنگى تىنىس-تىرشىلىگى جايىندا اڭگىمەلەسكەن ەدىك.
ءتىلشى: - اراي تالعاتقىزى، الدىمەن مۋزەيدىڭ قۇرىلۋ تاريحىنان سۇحباتىمىزدى باستاساق.
- ىرگەتاسىنىڭ قالانعانىنا بيىل 80 جىل تولعان ەلىمىزدەگى ءىرى مەكەمەلەردىڭ ءبىرى ابايدىڭ «جيدەباي-ءبورىلى» تاريحي-مادەني جانە ادەبي-مەموريالدىق قورىق-مۋزەيى قازاقتىڭ كەمەڭگەر جازۋشىسى م.و.اۋەزوۆتىڭ ۇسىنىسى بويىنشا ابايدىڭ 95 جىلدىق مەرەيتويى قارساڭىندا، 1940 جىلى قازاق سسر-نiڭ حالىق كوميسسارلار كەڭەسiنىڭ 1 ساۋiردەگى قاۋلىسى نەگىزىندە قۇرىلىپ، سول جىلى 16 قازاندا اشىلعان. قازىرگى تاڭدا مۋزەي قورىندا جالپى ەكسپوناتتاردىڭ سانى – 21832 بولسا، كىتاپ قورىندا 14743 كىتاپ بار. قازاقستان تاريحىنداعى تۇڭعىش ادەبي مۋزەي بولىپ تابىلادى. 1990 جىلى ابايدىڭ 150 جىلدىق مەرەيتويىنا وراي قازاق سسر مينيسترلەر كەڭەسىنىڭ قاۋلىسى بويىنشا اقىننىڭ ادەبي-مەموريالدىق مۋزەيى ابايدىڭ «جيدەباي-ءبورiلi» مەملەكەتتiك تاريحي-مادەني جانە ادەبي-مەموريالدىق قورىق-مۋزەيى بولىپ قايتا قۇرىلدى. قازىرگى كەزدە مۋزەي ادەبي-مەموريالدىق مۋزەيدەن رەسپۋبليكاداعى ءىرى قورىق-مۋزەيدىڭ بىرىنە اينالدى. قورىق-مۋزەي قۇرامىندا سەمەي قالاسى جانە شىعىس قازاقستان وبلىسىنىڭ اباي جانە ءۇرجار اۋداندارىندا ورنالاسقان 8 مۋزەي بار.
ءتىلشى: - بيىل اباي قۇنانبايۇلىنىڭ 175 جىلدىق مەرەيتويى ەلىمىزدە كەڭىنەن اتالىپ وتۋدە. سىزدەردىڭ ءوز تاراپتارىڭىزدان بۇل شاراعا قوسقان ۇلەستەرىڭىز قانداي؟
- اقىن مۋزەيى جىل باسىنان بەرى اباي قۇنانبايۇلىنىڭ 175 جىلدىق مەرەيتويىن ءتۇرلى باعىتتا مەرەكەلەۋدى باستاپ كەتكەن بولاتىن. ەلىمىزدىڭ بىرقاتار قالالارىنا، ياعني نۇر-سۇلتان، الماتى، اقتوبە، وتىرار، پاۆلودار، اتباسار سياقتى قالالارعا جىلجىمالى كورمەلەر ۇيىمداستىرىلىپ، حاكىم ابايدىڭ ءومىرى مەن شىعارماشىلىعىن، اقىننىڭ قولىنىڭ تابى قالعان قۇندى جادىگەرلەردى ناسيحاتتاۋ ماقساتىندا جۇمىستار اتقارىلدى. بۇكىل الەمدى جالماعان پاندەميا سالدارىنان العا قويعان جوسپارلار ورىندالماي قالدى دەسەك تە، كارانتين ۋاقىتىندا دا مۋزەي قىزمەتكەرلەرى الەۋمەتتىك جەلى ارقىلى ونلاين كەزدەسۋلەر، كونفەرەنتسيالار، سۇحباتتار ۇيىمداستىرىپ، مۋزەي قورىنداعى قۇندى جادىگەرلەردى جەلى ارقىلى ناسيحاتتادى. سونىمەن قاتار، بيىل ابايدىڭ «جيدەباي-ءبورىلى» مەملەكەتتىك تاريحي-مادەني جانە ادەبي-مەموريالدىق قورىق-مۋزەيىنە 80 جىل تولىپ وتىر. قازاقستان تاريحىنداعى تۇڭعىش ادەبي مۋزەيدىڭ ابايدىڭ 175 جىلدىعىمەن قاتار كەلگەن مەرەيتويى قارساڭىندا الەۋمەتتىك جەلىلەر ارقىلى «ۋاقىت شەرتكەن سىر: مۋزەي تاريحىنان 80 دەرەك» ايدارى كورەرمەن قاۋىمعا ۇسىنىلدى. 1940 جىلى 16 قازاندا مۋزەيدىڭ اشىلۋى جايىندا اقپاراتپەن باستاۋ العان بۇل ايدارمەن 1 قىركۇيەكتەن باستاپ كۇنىنە ەكى دەرەكتەن 15 قازانعا دەيىن جاريالانىپ وتىردى. العاشقى جىلدارى مۋزەي ورنالاسقان، ابايدىڭ سەمەيگە كەلگەندە ءتۇسىپ جۇرگەن ۇيلەردىڭ ءبىرى ءانيار مولداباەۆ ءۇيى، جيدەبايداعى اباي مۋزەي-ءۇيىنىڭ اشىلۋى، بورىلىدەگى مۇحتار اۋەزوۆ مۋزەي-ءۇيىنىڭ اشىلۋى، اقىن وقىعان احمەت-ريزا مەدرەسەسىمەن جالعاسىپ، مۋزەي قاراماعىنداعى بولىمدەردىڭ بارلىعى قامتىلدى.
ءتىلشى: - اباي مۋزەيىنىڭ قۇرىلۋ تاريحىندا اقىننىڭ تۋعان-تۋىس، جاقىندارىنىڭ كومەگى بولدى ما؟
- ارينە، حاكىم ابايدىڭ حالقىمىزدىڭ جۇرەگىندە ماڭگىلىك ساقتالۋىنا قىزمەت قىلىپ، ونىڭ ادەبي مول مۇراسىن ەل اراسىندا كەڭىنەن ناسيحاتتاۋ ماقساتىندا اشىلعان مۋزەيدىڭ ۇيىمداستىرىلۋ، قالىپتاسۋ ىسىنە ابايدىڭ ءوز تاربيەسىندە بولعان نەمەرە ءىنىسى ءارحام ىسقاقوۆ پەن قايىم مۇحامەدحانوۆ، احات شاكارىمۇلى مول ەڭبەك ءسىڭىردى. وسىنداي تۇلعالار جانە مۋزەي سالاسىندا كوپ جىلدار ەڭبەك ەتىپ، مۋزەي قورىنا ولشەۋسىز ءىز قالدىرعان جاندار دا قالىس قالمادى. سونداي-اق، مۋزەي قورىنداعى اباي تۋىستارى تاپسىرعان جادىگەرلەر، زاتتار، كىتاپ قورى، قولجازبالار، حاتتار، ارحيۆ دەرەكتەرى، بەينەلەۋ ونەر تۋىندىلارى، ىدىس-اياق جانە فوتوسۋرەتتەر دە جەلى وقىرماندارىنا جول تارتتى.
ءتىلشى: - ۇلى ابايدىڭ 175 جىلدىعى مەن اقىن مۋزەيىنىڭ 80 جىلدىق مەرەيتويىندا ايتارلىقتاي قانداي جۇمىستار جاسالدى دەپ ايتا الاسىز؟
- مۋزەيدىڭ 80 جىلدىق تاريحىندا ەلىمىزدىڭ بىرقاتار قالالارىنا، سونىمەن قاتار شەتەل اۋماعىنا ۇيىمداستىرىلعان كورمەلەر، عىلىمي ءىس-ساپارلار مەن كونفەرەنتسيالاردىڭ وزىندىك ورنى بار. مۋزەي تاريحىنان ەرەكشە ورىن العان ساتتەردىڭ ءبىرى، اقىن مەرەيتويلارى، ەلباسى ن.نازارباەۆتىڭ جانە بىرقاتار قوعام قايراتكەرلەرى، الەم ەلشىلەرىنىڭ مۋزەيگە كەلۋى جايىندا اقپاراتتار فوتوسۋرەتتەرمەن بىرگە ۇسىنىلدى. تاريحي دەرەكتەر اباي مۋزەيىنىڭ مادەنيەت جانە سپورت مينيسترلىگىنىڭ باستى نازارىندا ەكەندىگىنە توقتالىپ، بيىلعى جىلعى ايتۋلى وقيعا ابايدىڭ 175 جىلدىعى قارساڭىندا پرەزيدەنت ق.توقاەۆتىڭ قاۋلىسىمەن جاڭارتىلعان مۋزەيدىڭ جاڭا ەكسپوزيتسياسىنىڭ اشىلۋىمەن ءتامامدالدى. زامان تالابىنا ساي، يننوۆاتسيالىق تەحنولوگيالاردى پايدالانا وتىرىپ جۇرگىزىلگەن مۋزەيلەندىرۋ جۇمىستارىنىڭ ناتيجەسىنە مەملەكەت باسشىسى ارنايى كەلىپ، وڭ باعاسىن بەرىپ، اشقاندىعى سەكسەنىنشى دەرەك بولىپ جاريالاندى.
كوپشىلىك نازارىنا ۇسىنىلا بەرمەيتىن، مۋزەي قورىندا ساقتالعان قۇندى جادىگەرلەر، تاريحتان سىر شەرتكەن فوتوسۋرەتتەر مەن قولجازبالار ەرەكشە نازارعا الىندى. «مۋزەي تاريحىنان 80 دەرەك» ايدارىنىڭ ءبىر جارىم اي ارالىعىنداعى كورەرمەن سانى 150 مىڭنان استى. الەۋمەتتىك جەلى وقىرماندارى پىكىر ءبىلدىرىپ، ەلىمىزدىڭ شالعايدا ورنالاسقان ەلدى-مەكەندەر تاراپىنان مۋزەيگە ساياحات جاساعانداي اسەر ءۇشىن مۋزەي ۇجىمىنا العىستارىن جەتكىزىپ جاتتى.
سونداي-اق، مەرەيتوي قارساڭىندا ازىرلەنگەن جاڭا عىلىمي كونتسەپتسيا نەگىزىندە «ابايتانۋ ماسەلەلەرى» 100 تومدىق سەريالىق عىلىمي-زەرتتەۋ جيناعى قولعا الىنسا، سونىڭ 5 تومى جارىق كوردى. جاڭا مۋزەيگە قىزىعۋشىلىق ارتتىرۋ ماقساتىندا بىرنەشە بۋكلەتتەر دە باسىلىپ شىقتى. «اباي مۋزەيى. 80 جىل» ەنتسيكلوپەدياسى، «جيدەباي» اتلاسى ت.ب. كولەمدى ەڭبەكتەر دايىندالۋدا.
سەمەي قالاسىنا جۇمىس ساپارىمەن كەلگەن پرەزيدەنت قاسىم-جومارت توقاەۆ مۋزەي اۋماعىنداعى «ۇلى اقىن اباي ۇلدارىمەن» ەسكەرتكىشىن اشقانى بەلگىلى. وسى ورايدا اباي قۇنانبايۇلىنىڭ ەكى فوتوسۋرەتى عانا ساقتالعاندىعىن ايتا كەتسەك، سونىڭ ءبىرى 1896 جىلى سەمەي قالاسىندا فوتوگراف ن.گ.كۋزنەتسوۆ سالونىندا ۇلدارى اقىلباي جانە تۋراعۇلمەن تۇسكەن سۋرەتى. سول فوتوسۋرەتى نەگىزىندە بوي كوتەرگەن ەسكەركىشتىڭ اۆتورى – ۇلدارىنىڭ ۇلى اكەسىنە دەگەن ەرەكشە ماحابباتى مەن شەكسىز ماقتانىش سەزىمىن بەينەلەۋدى ماقسات ەتكەن، ءمۇسىنشى نۇربول قاليەۆ. قولادان تۇرعىزىلعان ەسكەرتكىشتىڭ بيىكتىگى – 5 مەتر.
كومپوزيتسيا دانىشپان اباي قۇنانبايۇلىنىڭ 175 جىلدىق مەرەيتويىنا وراي اشىلدى. اباي ۇلدارى اقىلبايمەن جانە تۋراعۇلمەن بىرگە بەينەلەنگەن ەسكەرتكىش تە قازىرگى تاڭدا اقىن مۋزەيىمەن ۇندەسىپ، ەرەكشە اسەر قالدىرارى ءسوزسىز.
ءتىلشى: - قازىرگى تاڭدا اباي مۋزەيىنە قانداي جاڭارتۋ جۇمىستارى جۇرگىزىلدى؟
- مەملەكەت باسشىسى قاسىم-جومارت توقاەۆتىڭ 2019 جىلعى 30 مامىرداعى قاۋلىسى بويىنشا اباي قۇنانبايۇلىنىڭ 175 جىلدىق مەرەيتويى قارساڭىندا بيىلعى جىلى اباي مۋزەيى تولىقتاي جاڭارتىلدى. سونداي-اق، «اباي جانە ءححى عاسىرداعى قازاقستان» ماقالاسىندا كورسەتىلگەندەي مۋزەي قۇرامىنداعى كوپەس ءۇيى عيماراتىندا عىلىمي-تانىمدىق ورتالىق ۇيىمداستىرىلدى. مۋزەي اۋماعىنداعى اباي وقىعان احمەت ريزا مەدرەسەسى دە جاڭعىرتىلدى.
كۇمبەزدى عيماراتتاعى مۋزەيدىڭ جاڭا ەكسپوزيتسياسى 11 زالدا ورنالاسقان. اتاپ ايتار بولساق: «اباي. جىل مەزگىلدەرى»، «دالا اۋەندەرى»، «اقىننىڭ بالالىق شاعى»، «اقىننىڭ قالىپتاسۋى»، «اباي شىعارماشىلىعى»، «ابايدىڭ اقىندىق مەكتەبى»، «ابايدىڭ وتباسى»، «قارا سوزدەر»، «اباي مۇراسى»، «مۋلتيمەديالىق زال» جانە «بالالار بولمەسى».
مەملەكەتتىڭ نەگىزى، بەرەكە-بىرلىكتىڭ بەينەسى بولىپ سانالاتىن شاڭىراق استىنداعى ەكسپوزيتسيادا ابايدىڭ 1885 جىلى سەمەيدەگى ولكەتانۋ مۋزەيىنە تاپسىرعان زاتتارى ەرەكشە ورىن الادى.
«قۇلاقتان كىرىپ بويدى الار، اسەم ءان مەن ءتاتتى كۇي» دەپ اقىننىڭ ءوزى ايتقانداي «دالا اۋەنى» زالىندا قازاقتىڭ مۋزىكالىق اسپاپتارىن تاماشالاۋ كەزىندە ارنايى قوندىرعىدان باعىتتالعان دىبىس جۇيەسىمەن اسپاپتىڭ ءۇنىن ەستۋگە بولادى.
«اقىننىڭ بالالىق شاعى» زالىن اقىننىڭ اتا-تەگى، شەجىرەسىمەن جالعاسادى. سونداي-اق، اجەسى زەرە مەن بالا ابايدىڭ بايكوكشە اقىندى تىڭداۋ كەزىندەگى ينستالياتسياسى كورسەتىلەدى. تاچ-ەكراندى قوسۋ ارقىلى زەرە اجەنىڭ ەرتەگىلەرىن تىڭداپ، قازاق ءۇيدىڭ تورىنەن كولەڭكەلى تەاتر قويىلىمىن تاماشالاۋعا بولادى.
«اقىننىڭ قالىپتاسۋى» زالىندا ابايدىڭ تۇلعالىق قالىپتاسۋىنا ەڭ ءبىرىنشى اسەر ەتكەن تۇلعا – قازاقتىڭ بەدەلدى ەل بيلەۋشىسى، بي، اعا سۇلتان، قاجى، اقىننىڭ اكەسى قۇنانباي وسكەنبايۇلى. 1855-1859 جىلدار ارالىعىندا اباي وقىعان احمەت ريزا مەدرەسەسى. ابايدىڭ العاش ورىس ادەبيەتىمەن تەرەڭ تانىسۋعا سەبەپ بولعان ومبى كادەت كورپۋسىندا وقىعان ءىنىسى حاليوللا بەينەسىنە ەكسپوزيتسيادا ورىن بەرىلگەن.
سونداي-اق، سەمەي قالاسىنا جەر اۋدارىلىپ كەلگەن اقىننىڭ ورىس دوستارى ە.ميحاەليس، ن.دولگوپولوۆ، س.گروسس، پ.لوبونوۆسكي، ن.كونشين جايلى دەرەكتەرمەن تانىسىپ، تاچ-ەكرانداردان م.اۋەزوۆ ايتقانداي اباي شىعارماشىلىعىنا ءنار بەرگەن ءۇش قاينار بۇلاعىمەن تانىسۋعا مۇمكىندىك جاسالعان.
ەكسپوزيتسيادان لەد-ەكران ارقىلى تۋراعۇلدىڭ «اكەم اباي تۋرالى» ەستەلىگىن تاماشالاۋعا بولادى. جانە دە اباي سەمەيگە كەلگەندە ءتۇسىپ جۇرگەن ۇيلەردىڭ ءبىرى – ءانيار مولداباەۆ ءۇيىنىڭ ينتەرەرى كورسەتىلگەن.
«اباي شىعارماشىلىعى» زالىندا اقىننىڭ ءار جىلدارى جازىلعان شىعارمالارى جانە اۋدارمالارى جايلى مالىمەت بەرىلگەن. ابايدىڭ جيدەبايداعى ءوزى سالدىرعان قىستاۋ ءۇيىنىڭ ماكەتى قويىلعان.
اقىننىڭ ءومىرى مەن شىعارماشىلىعىنا كۋا بولعان شىڭعىستاۋ جەرلەرىنىڭ كورىنىستەرى، ابايدىڭ قالاعا قاتىناعان تارانتاسىنىڭ كوشىرمەسى ورنالاسقان.
«ابايدىڭ اقىندىق مەكتەبى». م.اۋەزوۆ: «ابايدىڭ تولىق ماعىنادا ءتورت شاكىرتى بار. ونىڭ ەكەۋى ءوز بالاسى – اقىلباي مەن تۋراعۇل، جانە ەكەۋى شاكارىم مەن كوكباي» دەگەن. بۇل زالدا ۇستاز-اقىننىڭ تىكەلەي ءتالىم-تاربيەسىندە بولىپ، اباي ءداستۇرىن جالعاستىرعان اقىن-شاكىرتتەرىنىڭ ءومىر جولدارى جانە ادەبي مۇرالارىمەن ۆيترينا سورەلەرىنە قويىلعان ەكسپوناتتار جانە مەديا زونادا ورنالاسقان تاچ-ەكراندار ارقىلى تانىستىرىلادى.
ابايدىڭ وتباسى مەن ۇرپاقتارى تۋرالى اقپارات «ابايدىڭ وتباسى» زالىندا بەرىلگەن جانە ابايدىڭ 1896 جىلعى فوتوسۋرەتىنىڭ ينستالياتسياسى قويىلعان. سول زاماننان كورىنىس بەرەتىن فوتوكامەرا، گرامموفون سياقتى زاتتار دا كورسەتىلىپ، اقىن وتباسىنا قاتىستى زاتتار ايگەرىمنىڭ ەرتوقىمى، ەركەجاننىڭ كويلەگى مەن كامزولى مەن زەرگەرلىك اشەكەي بۇيىمدار قويىلدى.
«ابايدىڭ قارا سوزدەرى». بۇل زال اقىننىڭ «قارا سوزدەرىنە» ارناپ جاسالعان. زالدا 360 گرادۋستىق پروەكتر ورناتىلعان، سول ارقىلى كورەرمەندى ويعا سالاتىن حاكىمنىڭ دانالىق سوزدەرىن ۇش تىلدە اقۋعا مۇمكىندىك جاسالعان.. «باتامەنەن ەل كوگەرەر» دەگەن قازاق حالقىنىڭ دانالىعىنا سۇيەنەر بولساق ءدال وسى جەردە ارنايى قوندىرعى كومەگىمەن كەلۋشىلەر اقىننىڭ باتاسىنان الىپ، رۋحاني قۋاتتانادى.
«اباي مۇراسى» زالىندا اباي قۇنانبايۇلىنىڭ مۇراسىنىڭ ناسيحاتتالۋ كەزەڭدەرى كورسەتىلگەن. سونىمەن قاتار، الەم ەلدەرىندەگى اباي ەسكەرتكىشتەرى مەن اقىن ەسىمى بەرىلگەن قالالار تۋرالى مالىمەت قابىرعاداعى كارتادا پروەكتور ارقىلى كورسەتىلەدى. اباي شىعارمالارىنىڭ الەمنىڭ قانشا تىلگە اۋدارىلعانى تۋرالى دا وسى زالدان بىلۋگە بولادى.
مۋزەيدىڭ ەكىنشى قاباتىندا ابايدىڭ مۋزىكالىق شىعارمالارى، ءار جىلدارى اقىن تۋرالى تۇسىرىلگەن فيلمدەر مەن تەلەباعدارلامالار، سپەكتاكل، وپەرا، كونتسەرتتەردى زاماناۋي قوندىرعىلار ارقىلى كورىپ، تىڭداۋعا مۇمكىندىك جاسالعان مۋلتيمەديالىق زال بار. وندا تەك اباي اندەرىنىڭ 200-گە جۋىق جازباسى ەنگىزىلگەن.
بالالار بولمەسىندە مۋزەيدىڭ كىشكەنتاي كورەرمەندەرى ءۇشىن ويىن الاڭى مەن ابايدىڭ سۇيىكتى ويىنى – توعىزقۇمالاقتى ۇيرەنۋگە مۇمكىندىك جاسالعان.
كوپەس ءۇيى عيماراتىنداعى عىلىمي-تانىمدىق ورتالىقتا «ابايتانۋ»، «تاۋەلسىزدىك جانە ابايتانۋ»، «اباي بەينەلەۋ ونەرىندە»، «كورمە زالى» بولىپ جاسالسا، مەدرەسەدە «مەدرەسە تاريحى»، «اباي جانە شىعىس»، «بالالار شىعارماشىلىعى» زالدارى كورەرمەن نازارىنا ۇسىنىلادى.
بورىلىدەگى مۇحتار اۋەزوۆ مۋزەي-ۇيىندە، جيدەبايداعى اباي مۋزەي-ۇيىندە زامان تالابىنا ساي، يننوۆاتسيالىق تەحنولوگيالاردى پايدالانا وتىرىپ مۋزەيلەندىرۋ جۇمىستارى جۇرگىزىلدى. اتاپ ايتاتىن بولساق، مۋزەيدىڭ مازمۇنىن، تاقىرىبى كەڭ كولەمدە كورسەتەتىن تاچەكراندار، اۋديوگيد، تاعى باسقا تسيفرلىق جاڭارۋلار مۋزەيدىڭ حالىقارالىق تالاپتارعا ساي وزگەرىستەرىنىڭ كورىنىسى.
ءتىلشى: - مۋزەيدىڭ وسى جاڭعىرتۋ جۇمىستارى قاي مەردىگەر كومپانيا تاراپىنان جاسالىندى؟
- مۋزەيدىڭ جاڭعىرتۋ جۇمىستارىن جاساۋعا كەلىسىم جاسالعان مەردىگەر «BF CREاGROUP» جاۋاپكەرشىلىگى شەكتەۋلى سەرىكتەستىگى مەن اباي مۋزەيىنىڭ عىلىمي قۇرامىنىڭ بىرلەسىپ اتقارعان جۇمىسىنىڭ ناتيجەسىندە اقىن مۋزەيى جاڭاشا كەيىپكە ەنىپ، كورەرمەندەرىن قابىلداۋدا.
ءتىلشى: - سۇحباتىڭىزعا راحمەت اراي تالعاتقىزى! كونەنىڭ كوزىن، بابالار اماناتىن ساقتاپ وتىرعان مۋزەي الداعى ۋاقىتتا دا كەلۋشىلەر مەن جەلى وقىرماندارىن تىڭ جاڭالىقتار جانە جەتىستىكتەرىمەن قۋانتا بەرسىن دەپ تىلەيمىز.
دۋمان ارعىنگەلدى،
“ادىرنا” ۇلتتىق پورتالى
