مامانداندىرىلعان حالىققا قىزمەت كورسەتۋ ورتالىعىنىڭ اۋماعىندا كولىك جۇرگىزۋشىلەرى ءۇشىن «ەكى ەسە تولەمە!» اكتسياسى ۇيىمداستىرىلدى. شىمكەنت قالاسىندا جۇرگىزۋشى كۋالىگى مەن اۆتوكولىكتەردى دەلدالسىز تىركەۋگە ناسيحاتتايتىن ءىس-شارا ءوتتى.
ازاماتتارعا ارنالعان ۇكىمەت مەملەكەتتىك كورپوراتسياسىنىڭ ماماندارى، قازاقستان رەسپۋبليكاسىنىڭ مەملەكەتتىك قىزمەت ىستەرى اگەنتتىگىنىڭ وكىلدەرى، شىمكەنت قالاسىنىڭ پوليتسيا دەپارتامەنتىنىڭ قىزمەتكەرلەرى «ەكى ەسە تولەمە» اتتى ۇگىت-ناسيحات جۇمىسىن جۇرگىزدى.
مەملەكەتتىك قىزمەتتەردى «كومەكشىلەرسىز» قالاي الۋعا بولاتىندىعى تۋرالى حححح-تان استام كولىك يەسى اقپاراتتاندىرىلدى. ولارعا «جۇرگىزۋشى كۋالىكتەرىن بەرۋ» جانە «كولىك قۇرالدارىن تىركەۋ» مەملەكەتتىك قىزمەتتەرىن ونلاين رەجىمدە الۋ پروتسەسى كورسەتىلدى.
مەملەكەتتىك كورپوراتسيا فيليالىنىڭ ديرەكتورى دانابەك يسابەكوۆ اتاپ وتكەندەي، ازاماتتار مامانداندىرىلعان حقو-عا بارماي-اق، اۆتوكولىكتى قايتا راسىمدەپ، جۇرگىزۋشى كۋالىگىن اۋىستىرا الادى. بۇل ازاماتتاردىڭ ۋاقىتى مەن شىعىندارىن ۇنەمدەيدى.
- مۇندا كۇن سايىن 500-گە جۋىق جۇرگىزۋشى كۋالىگى بەرىلىپ، 1500-دەن استام كولىك قۇرالى تىركەلەدى. كوپتەگەن مەملەكەتتىك قىزمەت ەلەكتروندىق فورماتقا كوشۋدە. ونلاين تىركەۋ مامانداندىرىلعان حقو-عا جۇگىنبەي-اق، اۆتوكولىكتى راسىمدەۋگە جانە جۇرگىزۋشى كۋالىگىن اۋىستىرۋعا مۇمكىندىك بەرەدى. بۇل ازاماتتاردىڭ ۋاقىتىن ايتارلىقتاي ۇنەمدەيدى جانە كەزەك كۇتۋ قاجەتتىلىگىن جويادى، - دەدى فيليال ديرەكتورى.
دانابەك يسابەكوۆتىڭ ايتۋىنشا، مۇنداي ءىس-شارالار حالىقتىڭ تسيفرلىق ساۋاتتىلىعىن ارتتىرۋعا جانە دەلدالدارمەن كۇرەسۋگە كومەكتەسەدى.
قازاقستان رەسپۋبليكاسى مەملەكەتتىك قىزمەت ىستەرى اگەنتتىگىنىڭ دەپارتامەنت باسشىسى ءالي كومەكباەۆتىڭ ايتۋىنشا، كومپيۋتەردى پايدالانۋ مۇمكىندىگى جوق ازاماتتار مەملەكەتتىك قىزمەتتەردى قالادا ورنالاسقان egov ايماقتارىندا الا الادى.
مۇنداي ءاربىر قىزمەت كورسەتۋ سەكتورى كەرەكتى تەحنيكامەن جابدىقتالىپ، ەلەكتروندىق ۇكىمەت پورتالى مەن باسقا دا مەملەكەتتىك رەسۋرستاردى پايدالانۋعا مۇمكىندىك بەرەدى. شىمكەنتتىكتەر وزدەرىنە جاقىن نۇكتەلەردى 2گيس قوسىمشاسى ارقىلى تابا الادى.
انىقتاما: 2020 جىلى شىمكەنت قالاسىنداعى مامانداندىرىلعان حقو قىزمەتكەرلەرى ازاماتتارعا 52 مىڭعا جۋىق جۇرگىزۋشى كۋالىگىن بەرىپ، اۆتوكولىكتەردى قايتا تىركەۋ بويىنشا 195 مىڭنان استام قىزمەت كورسەتتى.
جىل باسىنان بەرى 7 مىڭنان استام قىزمەت الۋشى جۇرگىزۋشى كۋالىگىن ەلەكتروندى ءوتىنىش بەرۋ ارقىلى اۋىستىردى. سونىمەن قاتار، كولىكتى قايتا تىركەۋ بويىنشا 10 مىڭعا جۋىق اۆتوكولىك يەسى ونلاين قىزمەتتى پايدالاندى.
ەستەرىڭىزگە سالا كەتەيىك، شىمكەنت قالاسىندا 3 مامانداندىرىلعان حالىققا قىزمەت كورسەتۋ ورتالىعى جۇمىس ىستەيدى.
