شىمكەنت قالاسىنداعى بۇرىنعى قورعاسىن زاۋىتىنىڭ قالدىقتارىن جويۋ ماسەلەسى شەشىمىن تاپتى. جەتپىس جىلدان استام ۋاقىتتان بەرى جينالعان ءوندىرىس قالدىقتارى قورشاعان ورتا مەن ەكولوگياعا زيانىن تيگىزىپ كەلدى. جىلدار بويى قوردالانعان تۇيتكىلدى ماسەلەنىڭ وڭتايلى شەشىمى تابىلدى.
بۇگىن مۇندا ءوندىرىس قالدىقتارىن وڭدەپ، ءتۇستى مەتالل كونتسەنتراتىن شىعاراتىن ءوندىرىس ورنى ىسكە قوسىلدى. كاسىپورىننىڭ زياندى قالدىقتاردى زالالسىزداندىرۋدا ەكولوگيالىق ماڭىزى زور.
قالامىزداعى بىرەگەي جوبانىڭ جۇمىسىمەن بۇگىن قر يندۋستريا جانە ينفراقۇرىلىمدىق دامۋ ءمينيسترى ب.اتامقۇلوۆ پەن شىمكەنت قالاسىنىڭ اكىمى مۇرات ايتەنوۆ تانىستى.
مەملەكەتتىك يندۋستريالىق-يننوۆاتسيالىق دامۋ باعدارلاماسىنا ەنگىزىلەتىن جوبانى «Standard Steel KZ» جشس-گى جۇزەگە اسىردى. مۇندا جىلىنا 400 مىڭ توننا ءوندىرىس قالدىقتارى قايتا وڭدەلەدى.
بۇگىنگى تاڭدا جوبانىڭ جىلىنا 250 مىڭ توننا قالدىقتاردى وڭدەيتىن ءبىرىنشى جەلىسى جۇمىسىن باستادى. زاۋىت بيىل قاراشا-جەلتوقسان ايلارىندا تولىعىمەن ىسكە قوسىلعاندا 400 ادام جۇمىسپەن قامتىلادى.
بۇگىندە قورشاعان ورتانى قورعاۋ، ءتۇستى مەتال ءوندىرىسىن دامىتۋدا قالدىقتاردى قايتا وڭدەۋدىڭ ماڭىزى وتە زور. جوبا تولىعىمەن ىسكە قوسىلسا، ەكولوگيانى زياندى قالدىقتاردان تازارتۋعا زور ۇلەس قوسپاق.
كاسىپورىن جۇمىسىمەن تانىسقان بەيبىت اتامقۇلوۆ اتالعان ءوندىرىس ورنىنىڭ ەكولوگيالىق تيىمدىلىگىمەن قاتار، الەۋمەتتىك-ەكونوميكالىق ءرولى دە زور ەكەنىن اتاپ ءوتتى.
ءوندىرىس وشاعى تولىق قۋاتتىلىعىندا جۇمىس ىستەگەندە، اۋماق زياندى قالدىقتاردان 3-4 جىلدا تازارتىلاتىن بولادى.
شىمكەنت قالاسى اكىمىنىڭ ءباسپاسوز قىزمەتى
