شىمكەنت: جاستارعا ارنالعان دەنساۋلىق ورتالىعىنىڭ تانىستىرىلىمى ءوتتى

1281
Adyrna.kz Telegram

شىمكەنت قالاسىندا جاڭادان اشىلعان جاستار دەنساۋلىق ورتالىعىنىڭ تانىستىرىلىمى ءوتتى. №13 قالالىق ەمحانا بازاسىندا ورنالاسقان ورتالىقتا گينەكولوگ، ۋرولوگ، پسيحولوگ، الەۋمەتتىك قىزمەتكەر سىندى ماماندار جۇمىس ىستەيدى. بۇل تۋرالى دەنساۋلىق ساقتاۋ باسقارماسى حابارلادى.

بۇگىن اتالعان ەمحانانىڭ ماماندارى قالا جاستارى مەن باق وكىلدەرىنە ورتالىقتىڭ جۇمىسىمەن تانىستىردى.

مۇندا 10-19 جاس ارالىعىنداعى جاستارعا تولىقتاي تەگىن قىزمەت كورسەتىلەتىن بولدى.
ماماندار ورتالىققا كەلۋشىلەردىڭ جاس ەرەكشەلىكتەرىن ەسكەرە وتىرىپ، ولارعا كەشەندى مەديتسينالىق، پسيحولوگيالىق، الەۋمەتتىك جاعىنان كومەك كورسەتەدى. ونىڭ ىشىندە، وتباسىن جوسپارلاۋ، ماسكۇنەمدىك پەن ناشاقورلىقتىڭ، ايتۆ ينفەكتسياسىنىڭ، سترەستى جانە قۇلازۋ جاعدايلارىنىڭ، قاتىگەزدىك پەن زورلىق-زومبىلىقتىڭ الدىن الۋ جۇمىستارى جۇرگىزىلەدى جانە قۇقىقتىق كەڭەستەر بەرىلەدى. سونىمەن بىرگە، باستاپقى مەديتسينالىق-سانيتارلىق كومەك، دياگنوستيكالىق-كەڭەس مەديتسينالىق كومەگى دە كورسەتىلەدى.

«جاستار اراسىندا ولاردىڭ دەنساۋلىعىنا جاۋاپكەرشىلىكپەن قاراۋدى قالىپتاستىرۋ ءبىزدىڭ باستى ماقساتىمىز بولىپ تابىلادى، ءبىز ونى جاستار دەنساۋلىق ورتالىعىنا ەنگىزىپ، ناسيحاتتاپ جاتىرمىز. جاس ۇرپاقتاردىڭ جىنىستىق قاتىناس ماسەلەسىنە ءبىلىمدى ءارى قاۋىپسىز تاسىلمەن قاراۋى جىنىستىق جولمەن بەرىلەتىن ينفەكتسيالاردىڭ قاۋپىن ازايتادى. بۇل دا ورتالىقتىڭ باستى مىندەتتەرىنىڭ ءبىرى. |جاستار دەنساۋلىق ورتىلىعى جاستار اراسىندا تانىمال بولىپ كەلەدى جانە ءبىز جۇمىستىڭ تيىمدىلىگىن كورىپ وتىرمىز»، – دەيدى №13 قالالىق ەمحانانىڭ باس دارىگەرى مولدىباەۆا ءاليا.

شىمكەنت قالاسى اكىمىنىڭ ءباسپاسوز قىزمەتى

پىكىرلەر