شىمكەنت قالاسىنا - 2018 جىلى ەلباسى جارلىعىمەن رەسپۋبليكالىق ماڭىزى بار قالا ستاتۋسى بەرىلگەن بولاتىن. بۇل تاريحي شەشىم قالامىزدىڭ ورتالىق ازياداعى ءىرى مەگاپوليستەرمەن تەرەزەسىن تەڭ الىپ جۇرۋگە جول اشتى، ەكونوميكالىق دەربەستىك بەردى.
قالامىزدىڭ 2050 جىلعا دەيىنگى دامۋ ستراتەگياسى، 2023 جىلعا دەيىنگى كەشەندى دامۋ جوسپارى ازىرلەنىپ، بەكىتىلدى. ەكى جىلدا قالادا كوپتەگەن وڭ وزگەرىستەر بولىپ، الەۋمەتتىك-ەكونوميكالىق كورسەتكىشتەر جاقساردى.
ماسەلەن، قالانىڭ دامۋ پارامەترلەرىنە قارايتىن بولساق، وتكەن ەكى جىلدا ەكونوميكانىڭ ءوسىم ديناميكاسىن بايقاۋعا بولادى.
اتاپ ايتقاندا، ونەركاسىپ ءوندىرىسى 1,3 ەسەگە، اۋىلشارۋاشىلىق ءونىم كولەمى 1,2 ەسەگە، كاسىپكەرلىك سۋبەكتىلەرىنىڭ سانى 15 مىڭعا، ولارمەن وندىرىلگەن ءونىم 1,5 ەسەگە ارتقان. سونىمەن قاتار، وسى جىلدار ىشىندە قالاعا 782 ملرد.تەڭگەدەن استام ينۆەستيتسيا تارتىلدى، 1 ميلليون شارشى مەترگە جۋىق تۇرعىن ءۇي سالىندى.
ورتالىقتاندىرىلعان اۋىز سۋمەن قامتۋ كورسەتكىشى 93 پايىزدان 94,7 پايىزعا، بالاباقشامەن قامتۋ كورسەتكىشى 94,3 پايىزدان 100 پايىزعا جەتتى.
يندۋستريالدى-يننوۆاتسيالىق دامۋ باعدارلاماسى اياسىندا 2 جىلدا 18 كاسىپورىن اشىلىپ، 1 مىڭنان استام ادام تۇراقتى جۇمىسپەن قامتىلدى.
بۇدان بولەك، مەگاپوليستىڭ بيۋدجەتى ارتىپ، بيىلعى جىلى قالا بيۋدجەتى 452,5 ملرد. تەڭگەدەن اسىپ وتىر، ونىڭ 47 پايىزى الەۋمەتتىك سالاعا باعىتتالعان.
شىمكەنت قالاسى اكىمىنىڭ ءباسپاسوز قىزمەتى
