بۇگىن اقپاراتتىق-كوممۋنيكاتسيالىق ورتالىعىندا شىمكەنت قالالىق ەنەرگەتيكا جانە كوممۋنالدىق شارۋاشىلىق باسقارماسىنىڭ باسشىسى جولشىبەك شايحسلاموۆتىڭ قاتىسۋىمەن باسقارما تاراپىنان اتقارىلعان جۇمىستار مەن قالانىڭ جىلۋ ماۋسىمىنا دايىندىعى، اۋىز سۋ، تابيعي گازبەن قامتۋ، كوشەلەردى جارىقتاندىرۋ جونىندە بريفينگ ءوتتى.
ءباسپاسوز ءماجىلىسى بارىسىندا جولشىبەك مۇحتارۇلى، ەڭ الدىمەن، جىلۋ بەرۋ جايىن ايتتى.
– ءبىز كۇن رايى مەن بەكىتىلگەن ستاندارتتار بويىنشا جۇمىس ىستەيمىز. ياعني، قالادا اۋا تەمپەراتۋراسى 3-5 تاۋلىك ىشىندە +8 °س جانە ودان تومەن بولعان جاعدايدا جىلۋ جۇيەسى ىسكە قوسىلادى. جىلۋمەن ەڭ اۋەلى بالاباقشا، مەكتەپ، اۋرۋحانا جانە الەۋمەتتىك ماڭىزى بار عيماراتتار قامتاماسىز ەتىلەدى. جالپى، قالادا ورتالىقتاندىرىلعان جىلۋ جۇيەسىنە 1896 كوپقاباتتى تۇرعىن ءۇي قوسىلعان. ونىڭ 1801-ءى (95%) قىسقى ماۋسىمعا دايىن، – دەدى ج.شايحسلاموۆ.
باسقارما باسشىسىنىڭ ايتۋىنشا، قىسىممەن تەكسەرۋ جۇمىستارى تولىق جۇرگىزىلگەن. مەگاپوليستىڭ ماگيسترالدىق، ىشكى ورامدىق جىلۋ جۇيەلەرىن تەكسەرۋ بارىسىندا كەزدەسكەن اقاۋدىڭ ءبارى قالپىنا كەلتىرىلگەن. سونداي-اق، قالانىڭ جىلۋ تاسىمالداۋشى مەكەمەلەرى «قۋاتجىلۋورتالىق-3» مكك جانە «نۇر-ارىستان» جشس-ءى تاراپىنان ينۆەستيتسيالىق باعدارلامالارى اياسىندا 4,2 شاقىرىم جىلۋ جۇيەلەرىندە كۇردەلى جوندەۋ جۇمىستارى جۇرگىزىلگەن. ال ورتالىقتاندىرىلعان جىلۋ جۇيەسىندەگى 17 سورعى ستانسانىڭ 15-ءسى دايىن. قالعان ەكى ستانسانىڭ جۇرگىزىلىپ جاتقان جۇمىسىن جىلۋ ماۋسىمىنا دەيىن اياقتاۋ جوسپارلانعان.
سونىمەن قاتار، شاhارداعى 479 بيۋدجەتتىك نىساننىڭ 470-ءسى (98%) قىسقى ماۋسىمعا دايىن. قالعان 9 نىساندا كۇردەلى جوندەۋ جۇمىستارى جۇرگىزىلۋدە. ال كىشى قازاندىقتارمەن جىلىتىلاتىن بيۋدجەتتىك نىساندارعا 5940 توننا كومىر، 222 توننا سۇيىق وتىن قاجەتتىلىگى انىقتالىپ، كومىر مەن سۇيىق وتىن ءجۇز پايىز جەتكىزىلگەن. ال ينفراقۇرىلىم جەلىلەرى مەن نىساندارىنىڭ (ەلەكتر، اۋىز سۋ، كارىز، تابيعي گاز) قىسقى ماۋسىمعا دايىندىق جۇمىستارى تولىق اياقتالعان.
ايتا كەتەيىك، شىمكەنت قالاسى تۇرعىندارىنىڭ قاتتى وتىنعا (كومىر) قاجەتتىلىگى – 73,7 مىڭ توننا، ال تۇرعىندارعا جەتكىزىلگەنى 53,2 مىڭ توننانى (72%) قۇراپ وتىر. قالانىڭ كومىر قويمالارىندا 45,0 مىڭ توننا قاجەتتى كومىر قورى بار. ءوز كەزەگىندە تۇرعىندارعا قاتتى وتىندى ۋاقىتىلى ساتىپ الۋ تۋرالى ءتۇسىندىرۋ جۇمىستارى جۇرگىزىلۋدە.
شىمكەنت اقپاراتتىق-كوممۋنيكاتسيالىق ورتالىعى
