قازاقتىڭ جەرىنە ەندى ارابتار اۋىز سالا باستاعان با؟

3907

ارابتار تۇركىستان، قىزىلوردا وبلىستارىنداعى قۇنارلى جەرلەردى اقىرىنداپ ساتىپ الىپ جاتىر. بۇل تۋرالى جەر ماسەلەسىمەن اينالىسىپ جۇرگەن تاجىريبەلى زاڭگەر باقىتجان بازاربەك ءوزىنىڭ الەۋمەتتىك جەلىدەگى پاراقشاسىندا حابارلادى دەپ جازادى «ادىرنا» ۇلتتىق پورتالى.

زاڭگەر وزىنە وسىعان دەيىن دە مۇنداي اقپاراتتاردىڭ كەلگەنىن جاسىرمايدى. «ارابتار ءبىزدىڭ ەلدەگى جەر كودەكسىنە قاراماستان، الدەبىر زاڭدى تۇلعانىڭ اتىنان قۇنارلى جەرلەردى ساتىپ الۋدا ەكەن. ول جەرلەر اناۋ مىناۋ ەمەس، تابيعي قورعاۋ جانە اڭشىلىق جاساۋ ايماقتارىنا تيەسىلى جەرلەر» دەگەن زاڭگەر قولىندا بىرىككەن اراب امىرلىگىنىڭ ء(باا) ەلىمىزدەگى وكىلىنىڭ حاتى بارىن مالىمدەدى.

«ءباا قازاقستانداعى ەلشىسى مۇحاممەد احماد الدجابەردىڭ حاتى ەكولوگيا مينيسترلىگىنە قاراستى ورمان جانە اڭشىلىق كوميتەتىنىڭ ادرەسىنە جولدانعان. "Hunting Kazakhstan" جانە "Qyzylorda invest group" كومپانيالارىنا تيەسىلى كەرەمەت جەرلەر بىرىككەن اراب امىرلىگى ازاماتىنىڭ مەنشىگىنە وتكەن. ءوز حاتىندا ەلشى ءباا ازاماتى قازاقستاندا كومپانيا قۇرعانىن، اتالعان جەرلەر سول كومپانيانىڭ بالانسىنا قارايتىنىن ايتادى» دەپ جازادى باقىتجان بازاربەك. دەمەك، وتاندىق زاڭدى تۇلعا ارقىلى ارابىڭىز جەردىڭ قوجايىنىنا اينالعان. ويتكەنى جەر كودەكسى بويىنشا جەردى يەلەنۋشى سول جەردىڭ قوجايىنى بولا الادى. ياعني، ءبىز ءسوز ەتىپ وتىرعان قۇنارلى جەرلەرىمىزدىڭ يەسى شەتەلدىك ازامات بولعانى عوي؟ وسى ماسەلە بيىنشا زاڭدىق تۇرعىدان باعاسىن بەرىپ، اقيقاتىن انىقتايتىنىن جەتكىزەدى. زاڭگەردىڭ بولجامىنشا اتالعان جەرلەر الدەبىر جشس ارقىلى ارابتىڭ مەنشىگىنە وتكەن نە اۋىلشارۋاشىلىق جەرى، نە بولماسا اڭشىلىق قۇراتىن قوڭدى جەرلەر بولۋى مۇمكىن.

حاتتىڭ كوشىرمەسى زاڭگەردىڭ پاراقشاسىنان الىندى.

قالاي دەسەك تە، قازاقتىڭ جەرىنە شەتەل ازاماتى قوجايىن بولا المايتىنىن نازاردا ۇستاعان ءجون. قىتاي جەرىمىزدى الىپ قويادى دەپ شۋلاپ جۇرگەنىمىزدە، ارابتارىڭىز اقىرىنداپ ارانىن اشا باستاعان جوق پا، قالاي ويلايسىز؟ قىتاي جەرىمىزدى السا، قىتايلانىپ قۇريمىز دەۋشى ەدىك. ال اراب جەرىمىزگە اۋىز سالسا، ناعىز ءدىني، قاندى سوعىستىڭ كوكەسىن كورمەسىمىزگە كەپىلدىك بار ما؟ ونسىز دا توقىراۋ جىلدارىندا اراب تۇبەگىن جاعالاپ، ءدىني ءبىلىم الىپ كەلەدى دەگەن جاستارىمىز بۇل كۇندە ءدىني ەمەس، بۇلىك ءبىلىمىن الىپ كەلگەندەي، قوعامدى ىشتەن ىرىتە باستاعانى شىندىق. يسلام ءدىنىن بەتپەردەسىنە اينالدىرىپ، سالافيتتەر سويقان سالىپ، ۋاحاببيتتەر ەل ءىشىن ءبۇلدىرىپ ءبىتتى. ال ەندى ءبىر ءدىندى پالەن تارماققا جىكتەگەن ارابتاردىڭ ءوزى جەرىمىزگە دەندەپ كىرە باستاسا، جاعداي قالاي بولماق؟ بۇل ماسەلە زاڭدى، ساياسي جانە الەۋمەتتىك تۇرعىدان قاتاڭ باقىلاۋعا الىنباسا، الداعى ۋاقىتتا بارماق شاينار حالگە تۇسىرەرى ءسوزسىز.

 

مەرۋەرت حۋساينوۆا، «ادىرنا» ۇلتتىق پورتالى.

پىكىرلەر
رەداكتسيا تاڭداۋى