Arabtar Túrkistan, Qyzylorda oblystaryndaǵy qunarly jerlerdi aqyryndap satyp alyp jatyr. Bul týraly jer máselesimen aınalysyp júrgen tájirıbeli zańger Baqytjan BAZARBEK óziniń áleýmettik jelidegi paraqshasynda habarlady dep jazady «Adyrna» ulttyq portaly.
Zańger ózine osyǵan deıin de mundaı aqparattardyń kelgenin jasyrmaıdy. «Arabtar bizdiń eldegi Jer Kodeksine qaramastan, áldebir zańdy tulǵanyń atynan qunarly jerlerdi satyp alýda eken. Ol jerler anaý mynaý emes, tabıǵı qorǵaý jáne ańshylyq jasaý aımaqtaryna tıesili jerler» degen zańger qolynda Birikken Arab Ámirliginiń (BÁA) elimizdegi ókiliniń haty baryn málimdedi.
«BAÁ Qazaqstandaǵy elshisi Muhammed Ahmad Aldjaberdiń haty Ekologııa mınıstrligine qarasty Orman jáne ańshylyq Komıtetiniń adresine joldanǵan. "Hunting Kazakhstan" jáne "Qyzylorda invest group" kompanııalaryna tıesili keremet jerler Birikken Arab Ámirligi azamatynyń menshigine ótken. Óz hatynda elshi BÁA azamaty Qazaqstanda kompanııa qurǵanyn, atalǵan jerler sol kompanııanyń balansyna qaraıtynyn aıtady» dep jazady Baqytjan Bazarbek. Demek, otandyq zańdy tulǵa arqyly arabyńyz jerdiń qojaıynyna aınalǵan. Óıtkeni Jer Kodeksi boıynsha jerdi ıelenýshi sol jerdiń qojaıyny bola alady. Iaǵnı, biz sóz etip otyrǵan qunarly jerlerimizdiń ıesi sheteldik azamat bolǵany ǵoı? Osy másele bıynsha zańdyq turǵydan baǵasyn berip, aqıqatyn anyqtaıtynyn jetkizedi. Zańgerdiń boljamynsha atalǵan jerler áldebir JShS arqyly arabtyń menshigine ótken ne aýylsharýashylyq jeri, ne bolmasa ańshylyq quratyn qońdy jerler bolýy múmkin.
Hattyń kóshirmesi zańgerdiń paraqshasynan alyndy.
Qalaı desek te, qazaqtyń jerine shetel azamaty qojaıyn bola almaıtynyn nazarda ustaǵan jón. Qytaı jerimizdi alyp qoıady dep shýlap júrgenimizde, arabtaryńyz aqyryndap aranyn asha bastaǵan joq pa, qalaı oılaısyz? Qytaı jerimizdi alsa, qytaılanyp qurımyz deýshi edik. Al arab jerimizge aýyz salsa, naǵyz dinı, qandy soǵystyń kókesin kórmesimizge kepildik bar ma? Onsyz da toqyraý jyldarynda Arab túbegin jaǵalap, dinı bilim alyp keledi degen jastarymyz bul kúnde dinı emes, búlik bilimin alyp kelgendeı, qoǵamdy ishten irite bastaǵany shyndyq. Islam dinin betperdesine aınaldyryp, salafıtter soıqan salyp, ýahabbıtter el ishin búldirip bitti. Al endi bir dindi pálen tarmaqqa jiktegen arabtardyń ózi jerimizge dendep kire bastasa, jaǵdaı qalaı bolmaq? Bul másele zańdy, saıası jáne áleýmettik turǵydan qatań baqylaýǵa alynbasa, aldaǵy ýaqytta barmaq shaınar halge túsireri sózsiz.
Merýert HÝSAINOVA, «Adyrna» ulttyq portaly.
