بۇگىن پارلامەنت سەناتىنىڭ جالپى وتىرىسىندا دەپۋتات باۋىرجان قانيەۆ پرەمەر-مينيستر اسقار ءماميننىڭ اتىنا ساۋال جولداپ، اقتوبە وبلىسىندا ساپاسىز جول جىل سايىن نەشە ادامنىڭ ولىمىنە سەبەپ بولعانىن باياندادى.
دەپۋتات ايتىپ وتىرعان ۋچاستوك «نۇرلى جول» باعدارلاماسىنىڭ ەكىنشى كەزەڭىندەگى وتىز جوبانىڭ ىشىنە كىرگەن. باۋىرجان قانيەۆ «ورتالىق-باتىس» اتتى جوبا ىشىندە «قاندىاعاش-شالقار-ىرعىز» جولىنا تەزىرەك قارجى ءبولىنۋى كەرەك دەپ سانايدى.
«نۇرلى جول» باعدارلاماسىنىڭ 2020-2025 جىلدارعا ارنالعان ەكىنشى كەزەڭىندە 30 جوبانى ىسكە اسىرۋ كوزدەلگەن. وسىنداي ءىرى جوبالاردىڭ ءبىرى - «ورتالىق-باتىس» تاس جولى. جالپى «ورتالىق-باتىس» اۆتوموبيل ءدالىزى
نۇر-سۇلتاندى اقمولا، قوستاناي، اقتوبە، اتىراۋ جانە ماڭعىستاۋ وبلىستارىمەن بايلانىستىرادى، وسىلايشا ءتورت قالالىق اگلومەراتسيانىڭ ەكەۋىن جانە قازاقستان ۇكىمەتىنىڭ وڭىرلەردى دامىتۋ باعدارلاماسىندا كورسەتىلگەن ەكىنشى دەڭگەيدەگى ەكى قالانى بىرىكتىرەدى»، - دەپ اقپارات بەردى دەپۋتات.
جالپى، «نۇر-سۇلتان-ارقالىق-تورعاي-ىرعىز-شالقار-قاندىاعاش» اۆتوموبيل جولىنداعى وسى "ورتالىق-باتىس" اۆتوموبيل ءدالىزىنىڭ ۇزىندىعى 1292 شاقىرىم، ونىڭ ىشىندە اقتوبە وبلىسىنىڭ اۋماعىندا 518 شاقىرىمى جاتىر.
«قازىرگى تاڭدا،«ورتالىق-باتىس» جوبا اياسىندا پروبلەمالىق سۇراقتار تۋىنداپ وتىر. ەڭ الدىمەن، قولدانىستاعى رەسپۋبليكالىق ماڭىزى بار «قاندىاعاش-شالقار-ىرعىز» اۆتوموبيلدىك جولى قاناعاتتانارلىقسىز جاعدايدا تۇر. سوڭعى جىلدارى اقتوبە وبلىسىنىڭ اۆتوموبيل جولدارىنىڭ ناشارلىعىنا بايلانىستى جول-كولىك وقيعالارى بويىنشا وبلىس ستاتيستيكاسى كوڭىل كونشىتپەيدى. ماسەلەن، 2018 جىلى 643 جول اپاتى ورىن الىپ، 95 ادام قازا بولىپ، 796 ادام جاراقات الدى. ال 2019 جىلى 870 جاعدايعا دەيىن ءوستى، وندا 110 ادام قازا تاۋىپ، 1173 ادام جاراقات الدى»، - دەيدى دەپۋتات.
بۇل جولدىڭ ماسەلەسى مەملەكەت باسشىسى قاسىم-جومارت توقاەۆ 2019 جىلى 22 مامىردا اقتوبە وبلىسىنىڭ جۇرتشىلىعىمەن كەزدەسۋ كەزىندە دە ايتىلعان. پرەزيدەنت اتالعان ۋچاسكەنىڭ ستراتەگيالىق ماڭىزدىلىعىن نازارعا الىپ، 2020-2025 جىلدارعا ازىرلەنىپ جاتقان «نۇرلى جول» مەملەكەتتىك ينفراقۇرىلىمدىق دامۋ باعدارلاماسى شەڭبەرىندە «قاندىاعاش - شالقار - ىرعىز» جولدارىن رەكونسترۋكتسيالاۋدى قارجىلاندىرۋدى قاراستىرۋ تۋرالى ۇكىمەتكە تاپسىرما بەرگەن بولاتىن.
«اتالعان ۋچاسكە بويىنشا جوبالىق-سمەتالىق قۇجاتتاما دايىن.جوبانى ىسكە اسىرۋ اقتوبە وبلىسى مەن قازاقستان رەسپۋبليكاسىنىڭ كولىك الەۋەتىن ەداۋىر كەڭەيتۋگە، سونداي-اق اۆتوكولىكتىڭ نەعۇرلىم قاۋىپسىز قوزعالىسىن قامتاماسىز ەتۋگە مۇمكىندىك بەرەدى. باياندالعانعا بايلانىستى، مەملەكەت باسشىسىنىڭ تاپسىرماسىن ورىنداۋ ءۇشىن ۇكىمەت جوعارىدا اتالعان جوبانىڭ قارجىلاندىرۋ كوزدەرىن ايقىنداۋ جانە ونى ۋاقتىلى اياقتاۋ جونىندە شارالار قابىلداۋدى سۇرايمىز»، - دەيدى دەپۋتات.
«ادىرنا» ۇلتتىق پورتالى
