ۇلتتىق نامىس، ۇيات دەگەن ۇعىمدار ءالى وتارشىلدىقتىڭ قاتپارىندا ۇيىقتاپجاتىر سەنات دەپۋتاتى پارلامەنت سەناتىنىڭ دەپۋتاتى مۇرات باقتيارۇلى الەۋمەتتىك جەلىدەگى بەلسەندى دەپۋتاتتاردىڭ ءبىرى. جوعارى پالاتادا ماندات الىپ وتىرعان مۇرات باقتيارۇلى رەسمي پاراقشاسى ارقىلى تاعى دا وزەكتى ماسەلە كوتەرىپ وتىر، دەپ حابارلايدى “ادىرنا”
دەپۋتات بۇل جولى بۇكىل زاڭىمىزدىڭ الدىمەن رەسمي تىلدە جازىلىپ، كەيىن قازاق تىلىنە اۋدارىلاتىنىن ۇلكەن سىنعا تەڭەپ وتىر. ءسوز سوڭىندا دەپۋتات بۇكىل زاڭىمىزدى قازاق تىلىندە جازاتىنداي زاڭ قابىلدامايىنشا، ءتىل تۋرالى ايتىپ كەلە جاتقان ۇگىت-ناسيحاتتىڭ ءبارى بەكەر دەيدى.
«پارلامەنت - كونستيتۋتسيا بويىنشا بيلىكتىڭ ۇلكەن تارماعى، ياعني زاڭدار قابىلدايتىن مەملەكەتتىك ورگان. وكىنىشكە قاراي، وسى كەزگە دەيىن ەلىمىزدە تەك ەكى زاڭ عانا مەملەكەتتىك تىلدە، قالعانداردىڭ بارلىعى رەسمي تىلدە جازىلعان.
الەمدى بىلاي قويىپ، بۇرىنعى كەڭەستەر وداعى مەملەكەتتەرىنىڭ ىشىندە كولەمى جاپىراقتاي بالتىقماڭى، كاۆكاز، كورشى ورتا ازيا ەلدەرى سوڭعى وتىز جىلدان بەرى زاڭدارىن ءوز تىلدەرىندە جازىپ، قاجەت بولسا ورىس تىلىنە اۋدارادى. ءبىز رەسمي تىلدە جازامىز، سوسىن قازاق تىلىنە اۋدارامىز. ايتارعا ءسوز جوق. ۇلتتىق نامىس، ۇيات دەگەن ۇعىمدار تاۋەلسىز ەل بولعانىمىزعا وتىز جىلداي بولسا دا وتارشىلدىق سانانىڭ قاتپارىندا ءالى ۇيىقتاپ جاتىر»، - دەپ جازادى سەناتور.
دەپۋتات زاڭداردى الدىمەن قازاق تىلىندە جازۋ كەرەك دەگەن ۇسىنىستى پارلامەنتتىڭ بۇعان دەيىنگى دەپۋتاتتارى دا، قازىرگى دەپۋتاتتارى دا « شىرىلداپ» ايتادى، بىراق، ماسەلە «باياعى جارتاس ءبىر جارتاس قالپىندا» دەيدى ول.
«ۇلتتىڭ — ۇلت ەكەنىن ايقىندايتىن ەڭ نەگىزگى بەلگىسى - ونىڭ ءتىلى. ويلانىپ كورەيىكشى، مەملەكەتتىڭ ءتىلى - سول قوعامنىڭ بارلىق سالاسىندا تولىققاندى قولدانىلماسا ونى قانداي ۇلتقا جاتقىزامىز؟ ءبىر نارسە اقيقات، ءبىزدىڭ بارلىق بيلىك تارماقتارى مەن زاڭدارىمىز مەملەكەتتىڭ اتىن يەمدەنگەن ۇلت تىلىندە سويلەيتىندەي زاڭ قابىلدامايىنشا، شيرەك عاسىردان بەرى ءتىل تۋرالى ايتىلىپ كەلە جاتقان ۇگىت- ناسيحات جۇمىسىنىڭ ناتيجەسى ماردىمسىز بولىپ قالا بەرەدى. ساياسي شەشىم قابىلدايتىن ۋاقىت الدەقاشان كەلدى»، - دەيدى سەناتور.
«ادىرنا» ۇلتتىق پورتالى
