مەملەكەتتىڭ وزگە ەلدەر الدىنداعى بەرەشەگى بەس جىلدان كەيىن 25 تريلليون 692 ميلليارد تەڭگەگە جەتپەك. دەپۋتاتتار مۇنى ەستىپ جاعاسىن ۇستادى، دەپ جازادى «ادىرنا» ۇلتتىق پورتالى ernur.kz پورتالىنا سىلتەمە جاساپ.
"ۇكىمەت ەسەبىنە سۇيەنسەك، مەملەكەت قارىزى وسى جىلى ءجىو-گە شاققاندا 29,2 پايىز بولادى. بۇل بيۋدجەت تۇجىرىمداماسىندا بەلگىلەنگەن شەكتەۋدەن 27 پايىزدان اسادى. مەملەكەتتىك قارىز سوماسى وسەدى، سايكەسىنشە رەسپۋبليكالىق بيۋدجەتكە سالماق تۇسەدى. سەبەبى، ونى وتەۋگە قاجەتتى شىعىندار ارتادى" - دەيدى ءماجىلىس دەپۋتاتى ءدانيا ەسپاەۆا.
ءماجىلىس وتىرىسىنداعى اڭگىمە بيۋدجەتتىك ساياسات تۇجىرىمداماسىندا كورسەتىلگەن شەكتى دەڭگەي تۋرالى بولىپ وتىر.
پرەمەر-ءمينيستردىڭ ورىنباسارى ءاليحان سمايىلوۆتىڭ سوزىنشە، ۇكىمەت ناقتى ءليميتتى بەلگىلەگەن. ول 27 پايىز دەپ بەكىتىلىپتى. سوندىقتان مەملەكەتتىك قارىزدىڭ مولشەرى قاۋىپسىز دەڭگەيدە ساقتالىپ وتىر دەيدى. ءارى بۇل حالىقارالىق ۇيىمدار بەكىتكەن 50 پايىز ليميتتەن الدەقايدا تومەن ەكەن. دەپۋتاتتاردى بوس داۋرىقپاۋعا شاقىرعان قارجى ءمينيسترى دە جاعدايدى كۇندە سۇزگىدەن وتكىزىپ جۇرگەنىن العا تارتتى. ءبىر جاعىنان، مينيسترلەر كابينەتى مەملەكەت قارىزىنا قىزمەت كورسەتۋ شىعىندارىن باقىلاۋعا بيۋدجەت تاپشىلىعىن قىسقارتۋدى كوزدەپ وتىر. ياعني بەرەشەك جالپى ىشكى ونىمگە شاققاندا ءۇش جىلدان سوڭ 2,1 پايىزعا ازايتىلماق. قارجى ءمينيسترى ەرۇلان جاماۋباەۆ وزگە ەلدەردىڭ قارىزدارىن تىزە بەرگەنى سول ەدى، ول تومەنگى پالاتا سپيكەرىنە ۇناماي قالدى.
"مەملەكەتتىك قارىز ايتارلىقتاي قاۋىپسىز دەڭگەيدە ەكەنىن ەش كۇمانسىز ايتقىم كەلەدى. بۇعان ءبىز كۇن سايىن مونيتورينگ جاساپ وتىرامىز. قازاقستاننىڭ قارىزىن ەكونوميكاسى جاعىنان جاقىن باسقا ەلدەرمەن دە سالىستىرار بولساق، مىسالى، تۇركيادا مەملەكەت قارىزى 40 پايىز، مەكسيكادا 55 پايىز، يندونەزيادا 37 پايىز" - دەدى قر قارجى ءمينيسترى ەرۇلان جاماۋباەۆ.
سالىستىراتىن ەلدەردى دە «تاۋىپتى» ءبىزدىڭ شەنەۋنىكتەر. اينالايىندار اۋ، تۇركيانىڭ مەملەكەتتىك قارىزى 40 پايىز بولسا، ونىڭ حالقى ءجۇز ميلليونعا جۋىق. ول از دەسەڭىز، تۇرىكتەر كيىم تىگىپ ساتسا دا، قارىزىنان قۇتىلادى. ونى دا از كورسەڭىز، تۇرىكتىڭ اسكەري قارۋ جاراقتارىنا كوزىن ءسۇزىپ وتىرعان بۇكىل الەم قارىزىن ءاپ ساتتە كەشىپ جىبەرۋگە دايار ەمەس پە؟!
مەكسيكانىڭ قارىزىمەن سالىستىرۋ ءتىپتى ماسقارا ەمەس پە؟! تىم قۇرىعاندا، سول مەكسيكا سەكىلدى تەكيللا مەن كوفە وندىرە الماي وتىر ەمەس پە ءبىزدىڭ قازاقستان؟ تەڭىز ونىمدەرى مەن پالما مايىمەن الەمدى اۋزىنا قاراتقان يندونەزيا حالقى مەملەكەتتىك قارىزدان قايىرشىعا اينالادى دەپ ويلاي ما قازاقستاندىق شەنەۋنىكتەر؟ قازاقستاننىڭ سىرتقى قارىزى راسىمەن قاۋىپتى ماسەلە. سەبەبى، قارىز الۋ بار دا، ونى قايتارۋ بارىن اقىماق ادام دا بىلەدى. قازاقستان قارىزىن قالاي قايتارادى؟ كوفەمەن بە، ءسۇت، ماي، شايمەن بە؟ بۇرىن مۇنايىنا سەنگەن ەل ەدىك. قازىر مۇنايىمىز سۋدىڭ قۇنىنا تەڭەلۋدىڭ الدىندا تۇر. ولاي بولسا، بيلىكتەگى شەنەۋنىكتەردىڭ باس اۋرۋى ەڭ ءبىرىنشى قارىزدان قالاي قۇتىلامىز دەگەن سۇراق بولۋى كەرەك شىعار؟
راۋانا ديماشقىزى،
"ادىرنا" ۇلتتىق پورتالى.
فوتو اشىق دەرەككوزدەن الىندى.
